MATTHAI 21

Jesu pahtawi a Jerusalem a, a luutna

1Huleh Jerusalem a tun kuan va, Olive taang a Bethphage a tun un, Jesu’n nungjuite nih a sawl a, 2A kawmvah, Na mazawn va khua ah va chiah un; huleh sabiltung kikhit a kawma, a nou toh na va mupah diing uhi; hute chu suut unla, ka kawmah hung kai unla. 3Huleh mi a koi aha in na kawmva soi a neih leh, Lalpa’n amahuh a mamoh hi, na chi diing va, huchi'n ama’n ahung sawlpah diing hi, a chi a. 4Hite zousiah chu zawlnei kam a kisoisa ahung taangtun theihna diingin ahi. 5Zion tanu chu hilh inla, Ngai in, na Kumpipa chu kingaingiam tahin sabiltung tungah, sabiltung nou tunga tuangin na kawmah a hung hi, chi'n, a chih chu. 6Huin nungjuite chu a chiah va, Jesu’n amahuh thu a piah bangin a bawl va, 7Huleh sabiltung leh a nou chu ahung kai va, a tungah a puante uh a phah va, a tungah Jesu a tousah uhi. 8Huleh mipi tamtahmei in lampi ah a puante uh a phah va, a dangte’n singbawh a saatkhia va, lampi ah a phah uhi. 9Huleh mipi a ma a chiahte leh a nunga juite’n kikou in, David Tapa, Hosanna; Lalpa mina hung pai chu a hampha hi; Tungnungpen ah. Hosanna, a chi va. 10Huleh Jerusalem khosung a luut tahin, Hipa koi ahiai? chi'n khopi pumpi a liing hial uhi. 11Huleh mipite'n, Hipa hi zawlnei Jesu, Galili gam a Nazareth khua a mi ahi, a chi uhi.

Biahinn a suhsiangna

12Huleh Jesu chu Pathian biahinn ah a luut a, biahinn a sil zuah leh lei zousiah a delhdoh a, huleh sum hengtute dohkaan haw leh vakhu zuahte touna haw a sawnpuuhsah a. 13Huleh a kawmah, Ka Pa inn chu haamteina inn a kichi diing, chih gelh ahi; hizongleh nangun suammangte khuuhin na siam uhi, a chi a. 14Huleh Pathian biahinn ah, mittawte leh keengbaite a kawmah a hung va, ama’n amahuh chu ana sudam hi. 15Hizongleh siampu lalte leh lehkhagialtute’n a silmah bawlte leh biahinn a, David Tapa, Hosanna, chia naupang kikoute a muh un a lungkim sih mahmah va. 16Huleh a kawmah, Hite’n bang ahiai a soi uh na ja ei? a chi va. Huleh Jesu’n a kawmvah, hi, naungeehte leh nawiteep nalaite kam a pawt in paahtawina na sukimta, chih na sim ngei sih u'maw? a chi a. 17Huleh amahuh nusia in khopi apat a pawt a, Bethani ah a chiah a; huah a giahta hi.

Theipi kung gahlou

18Huleh a zing a khopi lama a kilehkiit in a gil ahung kialta a. 19Huleh lam gei ah theipi kung a mu a, a bula ava chiah leh a nah loungal bangmah a muta sih a, huin theipi kung kawmah, Tu apat kumtuang in na gah kiit nawn sin, a chi a. Huin theipi kung chu a vulpah ngal hi. 20Huleh nungjuite’n huchu a muh un, Bangchidan ahiai theipi kung chu a vulpah mei? chi'n thumah a sa mahmah va. 21Jesu’n a dawng a, a kawmvah, Chihtahzetin ka hung hilh ahi, Ginna na neih va, na ginlelh louh uleh theipi kung a bawl bang chauh na bawl sih diing va, hi taang kawmah zong, Kisuandoh inla, tui khang lian ah kipaai in chileh uchin, na chih bang un a um diing hi. 22Huleh bangkim gingta a haamteia na nget u’chu na mu diing uhi, a chi hi.

Jesu thuneihna a ginlelhna uh

23Huleh amah Pathian biahinn a, a luut a thu a hilh laiin, siampu lalte leh vaantaang upate a kawmah a hung va, Bang thuneihna in ahiai hi silte na bawl? Kuan ahiai hi thuneihna hung pia? a chi va. 24Jesu’n a dawng a, a kawmvah, Ke'n zong thu khat ka hung dong diing a, huchu na hung hilh uleh, ke'n zong koi thu in ahiai hi sil ka bawl ka hung hilh ve diing hi. 25John baptisma hi khoi apatin ahiai? vaan apatin aha, ahihlouhleh mihing apat? a chi a. Huleh amahuh a kingaihtuah va, Vaan akipat chilehang lah, huchi ahihleh bang diinga gingta lou? a chi diing a. 26Hizongleh mihing a kipat chilehang lah mipite i lau ngal a; mi zousiah in John chu zawlnei a, a seh jiahun, a chi va. 27Huchi'n Jesu a dawng va, Ka he sih uh, a chi va. Huin ama’n a kawmvah, Ke'n zong bang thuneihna in ahiai hi silte ka bawl chih ka hung hilh sih diing hi.

Tapa nihte tehkhinthu

28Hizongleh nangun bang na chi ngaih viai? Mi koi aha in tapa nih a nei a; huleh a khatna kawmah a hung a, Tapa, tuni in ka grephuan ah va tong in, a chi a. 29Ama’n a dawng a, Ut sing, a chi a; hizongleh a khonung in a lungsim a hengta a, a va kuanta hi. 30Huin a nihna kawmah a hung a, huchimahbangin a chi a. Huleh ama’n a dawng a, Pu, ka chiah diing hi, a chi a; hizongleh a chiahta sih a. 31Amahuh gel koi zaw in a pa uh deihlam a bawl viai le? a chi a. Amahun a kawmah, A masazaw in, a chi va Jesu’n a kawmvah, Chihtahzetin ka hung hilh ahi, Siahdongte leh nohchizuahte’n Pathian gam ahung luut khelh diing uhi. 32Ajiahchu John chu dihtatna lam thu ah na kawmvah a hung a, amah na gingta sih uh; hizongleh siahdongte leh nohchizuahte’n amah a gingta uhi; huleh nangun hu na muh un, amah na gintaatna diingun na kisiih nuam tuan sih uhi.

Grephuan tehkhinthu

33Tekhinthu dang ngaikhia un; Inn neitu mi koiaha khat a um a, hupa’n chu grephuan a bawl a, daai in a uum kiimvel a, hu sungah grep suuhna kokhuuh a lai a, innsaang a lam a, huchi'n loubawlmite kawmah hohloh diingin a pekhia a, gam dangah a chiahta a. 34Huleh a gah loh a hun diing kuan in, a suaahte chu a gah la diingin a enkolte kawmah a sawl a. 35Huleh a enkolte’n a suaahte chu a man va, khat a vua va, khat a that va, khat suang in a sep uh. 36Huin ama’n a suaahte a masa haw sanga tamzaw a sawl kiit a; amahuh tungah zong huchimahin ana bawl va. 37A tawp ah, Ka tapa a zahtaatkha diing uh chi'n, a tapa chu a sawl a. 38Hizongleh a enkolte’n a tapa chu a muh un, Hipa gouluahtu diing ahi; hung un, i that diing va, a gouluah diing chu i kitan diing uh, a chi va. 39Huin amah chu a man va, grephuan pua ah a paaidoh va, a thatta uhi. 40Huchi'n grephuan neitupa a hung tahchiangin hu a enkoltute chu bang a lohta diai? a chi a. 41Amahun a kawmah, Ama’n hu migiloute chu gentheitahin a sumang diing a, grephuan chu a enkoltu dang, a gah loh hun china a gahte a kawma pe jel diingte kawmah a kemsah diing, a chi va. 42Jesu’n a kawmvah, Pathian lehkhabu ah, Inn lamtute suang deih louh, hu suang ngei chu a ning a suang poimohpen ahung hita; huchu Lalpa bawl ahi a, huleh i mitmuh un a thum ah hi, chih thu na sim kha ngei sih u'maw? 43Hujiahin ka hung hilh ahi, Pathian gam chu na kawm vapat laahsah ahi diing a, gah suang diing jat dang kawmah piah ahi diing hi. 44Huleh koipouh hi suang tunga puuh chu a keehjah diing a; huleh a netkhaah photmah chu a gawijan diing hi, a chi a. 45Huleh siampu lalte leh Pharisaite’n a tehkhinthute a jah un, amahuh tung thu soi ahi chih a kihe va. 46Hizongleh amah chu mat a tup uleh, mipite a lau ngal uhi, amahun zawlnei a, a ngaih jiahun.

Currently Selected:

MATTHAI 21: SIMTBSI

Highlight

Copy