MATTHAI 22
22
Kiteenna ankuang tehkhinthu
1Huleh Jesu’n a dawng a, a kawmvah tehkhinthu a soi kiit a. 2Vaan lalgam chu koiaha kumpipa khat a tapa a diinga kiteenna ankuang bawl tobang ahi, 3Huleh kiteenna ankuang luina a chialte kou diingin a suaahte a sawl a; amahuh a hung nuam sih uhi. 4Ama’n a suaah dangte a sawldoh kiit a, Chialte kawmah va chiah unla, Ngai un, ka ankuang ka peihta hi; ka bawngtalte leh ka gan thaute thah ahi a, sil zousiah peihsa ahita; kiteenna ah hungta un, va chi un, a chi a. 5Hizongleh amahun a ngaihsah sih va, khat a lou ah, khat a sumdawnna ah a kichiah mangta uhi; 6Huleh mi dangte’n a suaahte chu a man va, musittah in a bawl va, a thatta uhi. 7Hizongleh kumpipa’n huchu a jah tahin a lungthah a; a sepaihte a sawl a, hu tualthatte chu a sumang a, huleh a khua uh zong a haalsahta hi. 8Huin ama’n a suaahte kawmah, Kiteenna ankuang peih ahita, hizongleh ka chialte lah ne taah ahi sih uh. 9Hujiahin lamkathuamte ah chiah unla, mi na muh taphot uh kiteenna an ne diingin hung chial un, a chi a. 10Huchi'n hu suaahte chu a pawt va, lamkathuamte a va chiah in a muhphaah tan uh, misia, mipha, a bawn in a koukhawm va; kiteenna mun chu michialte in ahung dimta hi. 11Huin kumpipa chu michialte en diing a ahung luut leh, kiteenna puan silh lou mi khat a muta a; 12Huin ama'n a kawmah, Lawm, bangchidan ahiai, kiteenna puan silh lou a hia na hung luut, a chi a? Huin amah chu a haam keei sih a. 13Huin kumpipa’n a suaahte kawmah, A khut leh a keeng kaan unla, pawdoh unla, polam mial ah paaita un; huah kah leh hagawi a um diing. 14Ajiahchu tampi kouh ahi a, tawmtakhat teel ahi uh, a chi hi.
Siah thu a dotna
15Huin Pharisaite chu a chiah va, a thusoi a mat theihna diing dan a va kihou va. 16Huleh amahun a nungjuite uleh Herod pawlte a kawmah a sawl va, hute’n chu a kawmah, Houtupa, midihtah na hi a, dihtahin Pathian lam thu na hilh a, mi koimah khawhsah tuam na nei sih chih ka he uhi; ajiahchu koimah khentuam na nei sih hi. 17Hujiahin bangchi na sa ei? hung hilh in; Kaisar kawma siah tawi siang aha, siang lou? a chi va. 18Hizongleh Jesu’n a lungsim uh giit louhdan chu a he a, Milepchiahte, bang diinga hung ze-et na hi viai? 19Siah sum chu hung ensah un, a chi a. Huin a kawmah makhai khat ahung tawi va. 20Huin ama’n a kawmvah, hi koi lim ahiai? a chi a. 21Amahun a kawmah, Kaisar a, a chi va. Huin ama’n a kawmvah, Kaisar sil chu Kaisar kawmah pia unla, Pathian sil chu Pathian kawmah pia un, a chi a. 22Amahun hi thute a jah un thumah a sa mahmah va, amah a nusia va, a chiah mangta uhi.
Thohkiitna thu a dotna
23Hu ni mahin Sadukaite, thohkiitna a um sih chite a kawmah a hung va, 24Houtupa, Mosi in, Mi ta nei lou a, a sih leh, a unaupa’n a ji luah in, a unaupa diingin chi a hahsah diing ahi, a chi hi. 25Tuin ka kawmvah unau pasal sagih a um va; huleh a upapen in ji a nei a, a sita a; chi a hah louh jiahin a ji chu a unaupa a nuutsiatta a. 26Huchimahbangin a nihna zong ta beiin a si a, a thumna in a luah a, a sagihna tanin a nei chiat uh. 27Huchi'n a tawp ah numeinu zong a sita hi. 28Ahihleh thohkiitna ah amahnu chu sagihte laha koipen ji ahita diai? a bawnun la a nei chiat ngal va, chi'n a dong uh a. 29Jesu’n a dawng a, a kawmvah, Pathian lehkhathu leh Pathian silbawltheihna na heet louh jiahun, na sukhial veu uhi. 30Thohkiitna ah kiteenna a um nawnta sih a, teeng zong a kiteengsahta sih uh, vaan a angelte tobang ahi uhi. 31Hizongleh misi thohkiitna thu a Pathian in na kawmva a soi chu simkha lou na hi uh maw? 32Kei chu Abraham Pathian, Isaak Pathian, Jakob Pathian ka hi, a chih chu. Pathian chu misi Pathian ahi sih a, mihing Pathian ahi zaw, a chi a. 33Huleh mipite’n huchu a jah un, a thuhilh chu thumah a sa mahmah uhi.
Thupiah lianpen thu a dotna
34Hizongleh ama’n Sadukaite a nialdang chih a jah tahun Pharisaite chu a kikhawm va. 35Huleh a lahva daansiam khat in amah ze-et in thu khat a dong a. 36Houtupa, daan thu ah bang ahiai thupiah lianpen? chi'n. 37Jesu’n a kawmah, Lalpa na Pathian chu na lungtang zousiah in, na hagau zousiah in, na lungsim zousiah in na lungsiat diing ahi, chih. 38Huchu thupiah masa leh lianpen ahi. 39Huleh a nihna chu hibangmah ahi, Nangmah na kilungsiat bangin na innveengte na lungsiat diing ahi, chih. 40Hi thupiah nihte tungah daan thu leh zawlneite thu zousiah a kikhaikhawm veh ahi, a chi hi.
Messiah thu a dotna
41Pharisaite a kikhop laiun, Jesu’n amahuh thu a dong a. 42Khrist hi bang na chi ngaih viai? koi ta ahiai? a chi a. Amahun a kawmah, David tapa, a chi va. 43Ama’n a kawmvah, Ahihleh bangchidana David in hagau a amah chu, 44Lalpa’n ka Lalpa kawmah, Na meelmate na keengpeeh nuaia ka koih masiah ka jiatlam ah tou in, chia, Lalpa a chih ahiai; 45Huchia David in amah chu Lalpa a chih ngal leh, a tapa bang a chi hih diai? a chi a. 46Huin koima'n amah chu kam khat in zong a dawng thei sih va, hu nia kipatin koima’n thu dang mawngmawng a dong kiit ngamta sih uhi.
Currently Selected:
MATTHAI 22: SIMTBSI
Highlight
Share
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
