PHILIPPITE 3
3
Khrist ah tahsa hamphatna bangmah ahih louhdan
1A tawppen in, ka unaute, Lalpa ah kipaah un. A ngeimah gelh chu kei diingin chimtaah a huai sih a, nanguh diingin a hoihzaw hi. 2Uite lahah kiveeng un, silgilou bawlte lahah kiveeng un, tahsa kisoisate lahah kiveeng un. 3Ajiahchu ei u’chu hagau a Pathian bia zehtante i hi a, huleh Khrist Jesu ah i nuam mahmah a, tahsa ah chu suan diing i nei sih hi. 4Tahsalamah chilei zong suan diing ka nei mei thei. Midang koiaha in tahsalama suan diing neia a kiheet inchu, ke’n ka nei sem hi. 5Ni giatni a zehtan, Israel chi, Benjamin phung, Hebraite laha Hebrai tahzet, daan heetlam a Pharisai; 6Phatuamngaih lama kouhtuam sawitu; daanbu a dihtatna lam a soiselbei ka hi. 7Hizongleh sil kei diing a lawhna zousiah chu Khrist jiahin manna in ka ngaita hi. 8Ahi, tahzetin, Khrist Jesu, ka Lalpa heetna hoih jiahin sil zousiah chu manna giapin ka ngai ahi; amah jiahin sil zousiah ka taanta a, huleh hute chu eeh bang giapin ka ngai hi, Khrist ka tan theihna diingin, 9Huleh daanbu a um banga keimah dihtatna nei hilou a, Khrist gin jala um, ginna a Pathian dihtatna chu nei a amaha muh a ka um theihna diingin. 10Huchia, a sihna toh kituaahtou jel a, amah leh, a thohkiitna silbawltheihna leh, a gimthuaahna kikoppihna bang ka heet theihna diingin. 11Bangchi zawng aha beeh a misi lah apat thohkiitna ka tan theih khaahleh chi'n. 12Ka tang zouta ahi sih a, bukima um zouta zong ka hi sih; hizongleh Khrist Jesu in kei ahung matna, humah chu ka mat ve theihna diingin ka delh ahi. 13Unaute, kei chu man zouta in ka kisep sih a; hizongleh hi sil khat chu ka bawl hi, nunglama sil umte chu mangngilh in, huleh malam a sil umte chu delh in, 14Khrist Jesu a Pathian kouhna saang kipaahman mu diingin phaahtawpna chu ka delh ahi. 15Hujiahin eiuh a piching deuh tengin hitobang lungsim i nei chiat diing uh; huleh sil dang khat a lungsim dang na neih uleh, hizong Pathian in na kawmvah ahung hesah diing hi. 16Hizongleh i phaahna chiangchiang ah, hudan mahin gamta nihang in, lungsim kibangin um ni. 17Unaute, ka umdan hung juite hi chiat unla, huchibang a umte etton diing a na hung neihte uh chiamchih un. 18(Ajiahchu mi tampi a um uh, amahuh umdan ka hung hilh veuta hi, tuin zong kappum in ka hung hilh hi, amahuh chu Khrist kros meelmate ahi uhi. 19A tawpna u’chu manthaina ahi a, a Pathian u’chu a gilpi uh ahi, huleh a loupina u’zong a zumna uh ahi, leilam silte a ngaihtuah uhi). 20Ajiahchu eihaw khualetui hihna chu vaan ah ahi a, hu a kipanin Lalpa Jesu Khrist, Hundampa chu i ngaah uh ahi. 21Ama’n chu, sil zousiah amah thuthu a, a umsah theihna natohdan dungjuiin i tahsa thulimlou chu amah tahsa loupitah batpih in ahung bawl thahsah diing hi.
Currently Selected:
PHILIPPITE 3: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.