PHILIPPITE 4
4
Hasotna thu tuamtuam
1Hujiahin, ka unau deih leh ngaihtahte, ka kipaahna leh ka lallukhuhte, huchi'n Lalpa ah ding kip un, ka deihtahte. 2Lalpa a lungsim khat hi diingin, Euodia ka ngen a, Sintiki ka ngen hi. 3Huleh nang, ka ngawngkol puaahpih muan um zong ka hung ngen hi, tanchinpha a ka natohpih numei haw le Klement zong, huleh hinna lehkhabu a min tuang, ka natohpih dangte panpih in. 4Lalpa ah kipaah ngiitngeet un; ka chi jel diing, Kipaah un. 5Na chitna uh mi zousiah heet hihen. Lalpa a nai hi. 6Bangma ah lungdonna nei sih unla; hizongleh sil bangkimah haamteina leh ngetna in kipaahthusoina toh, na sil deihte uh Pathian kawmah hesah un. 7Huchi'n Pathian hamuanna heetphaah guallouh in, Khrist Jesu jalin na lungtangte uleh na lungsimte uh ahung veensah diing hi. 8A tawppen in, unaute, thutah photmah, sil zahum photmah, sil dih photmah, sil siangthou photmah, sil hoih photmah, a thang kilawm photmah; hoihna bang a um a, paahtawina bang a um leh, hi silte ngaihtuah un. 9Keimah a na zilsa uh, na tansa uh, na jahsa uh, huleh na muhsa uh, hu silte chu bawl un; huchi'n hamuanna Pathian in ahung umpih diing hi.
Philippite panpihna tunga Paul kipaahna
10Hizongleh, tu a tawplam a kei na hung ngaihtuahna uh ahung kilat jel jiahin Lalpa ah nasatah in ka kipaah ahi; hu a chu na ngaihsah mahmah va, hizongleh hun lemtaang na mu sih va ahi. 11Taahsap jiaha hi thu ka soi ahi sih; ajiahchu bangchibangin um zongleng, hu ah lungkimtah a umdan ka hedohta hi. 12Tasamtaha umdan ka he a, kiningchingtaha umdan zong ka he hi; mun chin leh sil zousiah ah gil vah leh gilkial a um theihna leh, hautah leh tasam a umdan hilhin ka umta hi. 13Amah ahung suhaatpa Khrist jalin sil zousiah ka bawl thei hi. 14Ahihvangin ka gentheihna a na hung lungkhampih jiahun na bawl hoih uhi. 15Huleh nanguh Philippite’n tanchinpha hung um chiil a, Makedonia gam apat ka chiahdoh lai in, nanguh chih louh, kouhtuam dang koimah in piah leh laah lam thu ah bangmahin ahung kithuahpih sih uh chih zong na he uhi. 16Ajiahchu, Thessalonika khua ngei ah zong ka taahsap panpihna na hung thot kiit jel uhi. 17Silpiah ka deih jiah ahi sih a; nanguh diing a gahpung ka bawl ahi zaw hi. 18Hizongleh sil bangkim ka nei a, ka hau hi; nanguh apat hung kithot silte, gimnamtui, kithoihna deihhuai, Pathian lungkimna chu, Epaphrodita khut apatin ka na muta a, ka kiningchingta hi. 19Huleh ka Pathian in Khrist Jesu a loupina a, a hauhsatna dungjuiin na taahsap zousiah uh ahung pe diing hi. 20Tuin Pathian leh i Pa uh kawmah kumtuang kumtuang in loupina um hen. Amen. 21Khrist Jesu a misiangthou zousiah chibai hung na buuhsah un. Ka kawma um unaute’n chibai ahung buuh uhi. 22Misiangthou zousiah in, a diahkhol in Kaisar innsung mite’n chibai ahung buuh uhi. 23I Lalpa uh Jesu Khrist hehpihna na bawnva tungah um hen Amen.
Currently Selected:
PHILIPPITE 4: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.