THUPHUANDOH 16
16
1Huleh Pathian biahinn sung apatin aw ngaihtah khat in angel sagihte kawmah, Chiah unla, Pathian lungthahna belhbu sagihte chu leitung ah sungkhia un, a chih ka ja a. 2Huchi'n angel khatna chu a chiah a, a belhbu leitung ah a sungkhia a; huleh gamsa chiamchihna neite leh, a lim betute tungah meima sia natah mei ahung suaahta hi. 3Huleh angel nihna in a belhbu tui khang lian tungah a sungkhia a; huleh hichu misi sisan bangin ahung umta a; huleh tui khang lian a um hinna nei zousiah chu a sita uhi. 4Huleh angel thumna in a belhbu luidungte leh tuikhuuhte ah a sungkhia a; hute chu sisan ahung suaahta hi. 5Huleh tuite angel in, Aw, Lalpa, hichibanga vai na hawm jiahin, Nang um zing leh, umta leh, hung um diing chu na dihtat hi. 6Ajiahchu amahun misiangthoute leh zawlneite sisan a na suah va, huleh nang in a dawn diingun sisan amahuh na peta hi; dawn taah mawng ahihjiahun, a chih ka ja a. 7Huleh maitaam a kipan a dang khat in, Ahi, Lalpa Pathian Bangkimbawlthei, na vaihawmte chu a dih in a dihtat hi, a chih ka ja hi. 8Huleh angel lina in a belhbu chu ni tungah a sungkhia a; amah kawma chu mite meia haaigawp theihna piah ahi. 9Huleh mite chu mei sataha haaigawp in a um va, huleh hi bawlgimna tunga thuneitu Pathian min a soisia va; huleh amah kawma loupina pe diingin a kisiih sih uhi. 10Huleh angel ngaana in a belhbu chu gamsa touphah tungah a sungkhia a; huleh a lalgam chu ahung mial vehta a; huleh amahun na a sah jiahun a lei uh a petta uhi. 11Huleh a natna uleh a meimate uh jiahin vaan Pathian chu a soisia va, a silbawlte uh a kisiih tuan sih uhi. 12Huleh angel guupna in a belhbu chu Euphrates luipi ah a sungkhia a; huleh nisuaahna lama kumpipate diing a lampi bawl ahihtheihna diingin a tui chu a kang vehta hi. 13Huleh ukeeng toh bang hagau bolhhoh thum, dragon kama kipan leh, gamsa kama kipan leh, zawlnei tahlou kama kipana hung pawt ka mu a. 14Amahuh chu Bangkimbawlthei hu Pathian ni loupia kidouna a puikhawm diing a leitung pumpi kumpipate kawma chiahdoh, silmah bawl dawite hagau ahi uhi, 15Ngai in, guta bangin ka hung hi. Kiging zing leh puan teengsa a um chu a hampha hi, huchilou inchu saguah in a vaah diing a, a zumhuaina a mukha diing uh. 16Huleh amahuh chu mun khat, Hebrai haama Armageddon kichi ah a puikhawmta hi. 17Huleh angel sagihna in a belhbu chu huihkhua ah a sungkhia a; huleh vaan a Pathian biahinn a kuanin, laltouphah akipanin aw ngaihtah ahung suaah a, Bawlzoh ahita, a chi a. 18Huleh awte leh, vaangingte leh, kawlphete ahung um a; huleh zil nasatah a liing a, huchibang zilliing nasa leh loupi chu leitung a mihing um a kipat a umkha nai sih hi. 19Huleh khopi loupi chu mun thum in a kikhen a, huleh namte khopihaw chu a chimta a; huleh a lungthahna uain nou chu a kawma piah diingin Babylon khopi loupi chu Pathian ma ah heetdoh in ahung umta hi. 20Huleh tuikulh gam zousiah chu a taimangta a, taangte zong muh in a um nawnta sih hi. 21Huleh gial nasatah mai, a tang khat talent khat tuha gih vaan apatin mite tungah a kia a; huleh mite’n hu giala suhgimna jiahin Pathian a soisia uh; ajiahchu hu suhgimna chu a huaise mahmah hi.
Currently Selected:
THUPHUANDOH 16: SIMTBSI
Highlight
Copy
Compare
Share
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
