THUPHUANDOH 6
6
Belaamnou in chiamchihnate a phelna
1Huleh Belaamnou in chiamchihnate laha khat a phel ka mu a, huleh aw vaan ging bangmai in silhing lite laha khat in, Hung en in, a chih ka ja a. 2Huin ka et leh, sakol kaang khat ka mu a; a tunga tuangpa’n thalmung a tawi a; huleh a kawmah lallukhuh khat a kipia a; amah chu gualzou leh, gualzou jel diingin a kuankheta hi. 3Huleh chiamchihna nihna a phel zohin silhing nihna in, Hung en in, a chih ka ja a; 4Huleh sakol dang, a san khat ahung pawtdoh a; a tunga tuangpa kawma chu, leitung apat hamuanna laahsah theihna leh, mite khat leh khat a kithahtuahna diing uh thuneihna a kipia a; huleh a kawmah namsaau liantah piah ahi. 5Huleh chiamchihna thumna a phel zohin silhing thumna in, Hung en in, a chih ka ja a. Huleh ka et leh ngai in, sakol vom khat ka mu a; a tunga tuangpa in a khut in buuhna a tawi a. 6Huleh silhing lite lai apatin aw khat in, Makhai khat in gehu dan khat, makhai khat in taang dan thum; huleh sathau leh uain chu suse sin, a chih ka ja hi. 7Huleh chiamchihna lina a phel zohin silhing lina in, Hung en in, a chih ka ja a. 8Huleh ka et leh ngai in, sakol dang khat ka mu a; a tunga tuangpa min chu Sihna ahi a, huleh misikhua in amah a jui a. Huleh amahuh kawma chu namsaau toh, kial toh, sihna toh, huleh leitung a gamsate a thah diingin leitung seh li suah seh khat piah ahi. 9Huleh chiamchihna ngaana phel zohin, maitaam nuaiah Pathian thu jiah leh, a heetpihna pom jiaha thahte hagau ka mu a; 10Amah u’chu aw ngaihtaha kikou in, Aw Lalpa, siangthou leh dih, bangtan ahiai leitung a teengte tunga vaihawm lou leh, ka sisan uh phuba la lou a na um diing? a chi uh. 11Huleh amahuh chu puan vaam a kipe chiat a; a suaah hihpihte uleh a unaute uh, amahuh bangmaha thaha um diingte ahung kim masiah uh tomkhat na khawl tadih diing a, a kawmvah hilh ahi uhi. 12Huleh chiamchihna guupna a phel zohin, ka en a, jil nasatahin a kiliing a; huleh ni chu samul saiippuan bangin ahung vomta a, ha chu sisan bangin ahung umta hi. 13Huleh vaan aahsite chu theipi kung huihpi haat tahin a muut a, a gah puamte a pulh bangin leiah a kia hi. 14Huleh vaan chu lehkhabujial a kijialbei bangin a mangta a; huleh taang leh tuikulh gam chinteng a umna va kipan suanmang in a umta uhi. 15Huleh leitung a lalte, mi liante, mi hausate, sepaih houtu lianpente, mi haatte, huleh saltaang leh taanglou mi zousiah chu kohawm leh taanga suangpite ah a kibuta va. 16Taangte leh suangpite kawmah, Hung netkhum unla, amah laltouphah tunga toupa ma apat leh, Belaamnou lungthahna apat hung phual un. 17Ajiahchu a lungthahna ni loupi hung tung ahita; koi ahiai diing zou diing? a chi uhi.
Currently Selected:
THUPHUANDOH 6: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
