TITA 1
1
Chibaibuuhna
1Paul, Pathian suaah leh, Pathian miteelte ginna dungjui leh, Pathian ngaihsahna banga thutah heetna lama Jesu Khrist sawlleh in; 2Zuautheilou Pathian in khovel um mapeh a, a chiamsa kumtuang hinna kinepna ah; 3Hizongleh Pathian i Hundampa uh thupiah dungjui a ka kawma kolsaha um thu taangkoupihna jalin a huntah ah a thu chu suhlat in a umta hi. 4Ginna munkhatlam thu a ka tapa ngei Tita kawmah; Pa Pathian leh Lalpa Jesu Khrist i Hundampa uh kawm a kipan hehpihna, khotuahna huleh, huleh hamuanna um hen.
Kouhtuam upa guatna
5Hikhu jiahin ahi Krit tuikulh gam a ka hung nuutsiat, sil bawlzohlouh a umte na bawlzohna diing leh, ka hung thupiah banga khochin a upate na guat theihna diingin; 6Koi hitaleh, demna bei, ji khat nei, Pathian gingta tatsiatna leh thununlouhna nei lou tate nei a hihphot unchu. 7Ajiahchu kouhtuam houtu chu Pathian sumkoltu ahihjiahin demna bei ahih ngei diing ahi; thusuaah tum lou, lungthah baih lou, uain kham haat lou, mivuaah chiing lou, punna niina huaiham lou mi ahih diing a; 8Mitaangphal hih ut, mihoihte ngaina, lungsimdih, midihtat, misiangthou, mikisuumthei ahih diing ahi. 9Thugin dihtaha nialkalhtute a hasot theihna diing leh, a siam louhdan uh a heetsah theihna diingin amah kihilh nasa banga thu chu a tuuhkip zing diing ahi.
Thuhilhtu tahloute thu a hilhna
10Ajiahchu mi thunung lou, thulim lou, soisiat haat leh mi heemhaatte tampi a um uhi, amahuh chu zehtan haw laha mi ahi diahkhol uhi. 11Hute kam chu hupsah diing ahi, punna niin deih man in thu a hilh louh diing uh a hilh va, mi innkuan sung a tohbuai veu uhi. 12Amahuh laha khat, a zawlnei ngei uh khat in, Krit gam mite chu zuau soi zingte, gamsa giloute, thase anhaite ahi uh, chi'n a soi hi. 13Hi heetpihna thu a dih ahi. Hujiahin ginna a ahung lamzan theihna diingun naahtahin taihilh in; 14Judate taangthu leh, thutah nungheisante thupiah a ngaihsah louhna diingun. 15Mi siangthou a diingin sil zousiah a siangthou hi; hizongleh mi bolhhoh leh gingloute a diingin bangmah a siang a um sih hi; a lungsim uleh a sialepha heetna nasan uh sianglou ahita hi. 16Pathian ka he chi'n a kam un a phuang va; hizongleh a silbawl un a nual uhi, kihdah umte, thumangloute, sil hoih bawl lam photmah a Pathian deih louh lam mite ahi uhi.
Currently Selected:
TITA 1: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.