TIMOTHI II 4
4
1Hujiahin Pathian ma leh, amah leh a lalgam hung kilat chianga mihing leh misite vaihawmsah diingpa, Lalpa Jesu Khrist ma-ah thu ka hung pia hi; 2Thu chu soi in; a hun ah bang, a hun lou ah bang pang jel in; thuaahtheitaha thuhilh pum in a siam louhdan uh hesah inla, taihilh inla, hasot in. 3Ajiahchu thuhilhna dih a ngaihkhiah peih louh hun uh hung tung diing ahi a; a bilte uh a lawp jiahin amahuh deihzawng bangin a kawmvah houtu a khawm diing uh, 4Huleh a bilte uh thutah lam apat a heimang diing va, taangthu lam nga in a dohta diing uhi. 5Hizongleh nang chu sil zousiah ah pilvaang inla, gimthuaah inla, tanchinpha soitu nna tong in, na natohna chu sutaangtung in. 6Ajiahchu tuin kei chu lat diing jiang a um ka hita a, ka paikhiah hun a tungta hi. 7Kidouna hoih chu ka douta a, kitaidemna chu ka zouta hi, ginna chu ka kemta hi. 8Tuin chu dihtatna lallukhuh kei diingin koih in a umta, huchu Lalpa vaihawmtu dihtahin hu ni chiangin ahung pe diing hi; huleh kei kawmah chauh hilouin, amah kilaahna ngaina photmahte kawma zong a pe diing hi. 9Kintahin ka kawmah hung teitei in; 10Ajiahchu Dema in tulai khovel a ngaihnat jiahin ahung paisanta a, Thessalonika khua ah a chiahta hi; Kresen chu Galatia gam ah a chiahta hi; Tita chu Dalmatia gam ah a chiahta hi. 11Luke chauh ka kawmah a um hi; Mark zawn inla, hung tonpih in; ajiahchu thunatohna lamah amah kei diingin a phatuam mahmah hi. 12Tikika chu Ephesa khua ah ka sawlta hi. 13Na hung chiangin Troas khua a Karpa kawma puannaahtual ka nuutsiat khu lehkhabute toh hung pua in, a diahkholin savun lehkhabute khu. 14Alexander, sumsungpa ka tungah a gilou mahmah hi; Lalpa’n a natoh bangjelin a thuh diing hi. 15Amah apat nang zong pilvaang in; ajiahchu ama’n i thute a dou naah mahmah hi. 16Ka siamna thu ka soi masatpen laiin koima’n ahung panpih sih a, mi zousiah in ahung taisan veh zota uhi; a moh u’chu puaah tuan dah u’heh chi'n Pathian kawmah ka ngen hi. 17Hizongleh Lalpa’n ahung dinpih a, ahung suhaatta hi, tanchinpha kisoi chu kei jiaha kintaha heet a, a um a, Jentelte zousiah in a jah theihna diingun; huleh humpibahnei kam apatin suahtaatsah in ka umta hi. 18Huleh Lalpa’n migilou chinteng laha kipanin ahung suahtasah diing a, a vaangam ah bittahin ahung tut diing hi; a kawmah kumtuang kumtuang in loupina umta hen. Amen. 19Priska leh Akuila, huleh Onesiphora innkuanpihte chibai hung buuhsah in. 20Erasta chu Korinth khua ah a um zingta hi; Trophima ahihleh Miletam khua ah damlou in ka nuseta hi. 21Phalbi ma in hung tum teitei in. Eubula te, Puden te, Lina te, Klaudia te leh unau zousiah in chibai ahung buuh uhi. 22Lalpa Jesu Khrist chu na hagau kawma um hen. Hehpihna na kawmah um hen. Amen.
Currently Selected:
TIMOTHI II 4: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.