TIMOTHI II 3
3
Hun hoihlou hung tung diing thu a hilhna
1Huleh hizong he in, ni nunung lamah hun hahsa tahtahte ahung um diing hi. 2Ajiahchu mi amahuh kilungsiatte, sumngainate, kiuangsahte, kisatheite, Pathian soisete, nulepa thumangloute, kipaahnataang heloute, siangthouloute; 3Itna pianpih neiloute, buaina bawlte, zuau a miheehte, kideehthei loute, mi huhamte, hoih mawngmawng deihloute, 4Leptatte, ngongtatte, kingaisangte, Pathian lungsiat sanga amahuh kipaahna ngaina zote bang ahi diing uhi. 5Pathian ngaihsah batna a nei diing va, hizongleh a silbawltheihna a tahsang sih diing uh; huchibangte chu nungheisan in. 6Ajiahchu huchibangte laha mi chu innte banga luut a, numei sualgih pua ngol deuhte sala man a, duhgawlna chinteng a puimangte; 7Zil zing napi a thutah hepha hetloute ahi uhi. 8Huleh Jaanni leh Jambri in Mosi a khin bangun hite’n zong thutah a doudaal zing uhi; lungsim sesuaah mi, ginna lama Pathian deih louh mi ahi uhi. 9Hizongleh hu kaan a bawl thei sih diing uhi; ajiahchu a ngoldan uh mi zousiah kawmah ahung kilang diing hi, hute a ahung kilat mahbangin. 10Hizongleh nang chu ka thuhilh, ka hindan, ka siltup, ka ginna, ka thuaahtheihdan, ka lungsiatna, ka kuhkaldan, 11Antiok khua leh, Ikonium khua leh, Listra khua a sawina ka thuaahte na he kim veh hi; hizongleh hute zousiah ah Lalpa’n ahung hundohta hi. 12Ahi, mi Khrist Jesu a Pathian ngaihsah a umtum zousiah in sawina a thuaah diing mah ahi. 13Hizongleh migilou leh mi heemhaatte chu mi heem leh heem a um in a sesuaah deuhdeuh diing uhi. 14Hizongleh nang chu, koi kawm apat na zil ahiai chih he in, na zil sa leh heetchiansah a na umna silte ah um zing in. 15Huleh nang chu na naupan lai apat, Khrist Jesu a ginna jiaha hutdamna mu khopa nang hung hilhpilthei lehkha siangthou he na hita hi. 16Pathian lehkhathu zousiah chu Pathian huhaihkhum a piah ahi a, thuhilhna diing bang, kitaihilhna diing bang, kisuhdihna diing bang, huleh dihtatna lama thuhilhna diing bangin a phatuam hi. 17Pathian mi chu na hoih zousiah tong diing a kimtaha kithuama a bukim theihna diingin.
Currently Selected:
TIMOTHI II 3: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.