TIMOTHI II 2
2
1Hujiahin, nang ka ta, Khrist Jesu a um khotuahna haattahin um in. 2Huleh heetpihtu tampi laha ka kawma thu na jahte, hute chu mi muanhuai, midangte zong hilhsawn thei diingte kawmah kemsah in. 3Huchi'n Jesu Khrist sepaih hoihtah bangin gimthuaah hung thuaahpih in. 4Sepaih hi diing a teelpa a kipaahsah theihna diingin sepaih koimah kidou laiin hi damsung khosahnate in a kisubuai ngei sih hi. 5Huleh kidemnate bangah mi pang mahlezong daan banga a bawl louhleh khuhsah in a um ngei sih hi. 6Lou neitu tonggim chu a gah tang masapa ahi diing ahi. 7Ka thusoi chu ngaihtuah in; Lalpa’n nang chu sil zousiah ah heetsiamna ahung pe diing hi. 8Jesu Khrist, David suan a mi chu, ka tanchinpha soi dungjuiin misi lah akipat kaithoh in a um hi chih he zing in. 9Hu tanchinpha jiahin silgilou bawltu bangin kaanna tanpha hahsatna ka thuaahpih hi; hizongleh Pathian thu chu kaan in a um sih hi. 10Hujiahin Khrist Jesu a um hutdamna chu kumtuang a loupina toh a muh ve theihna diingun teelte jiahin sil zousiah ka thuaah ahi. 11Hi thu chu a gintaathuai hi; Ajiahchu amah toh sita i hihleh, amah toh i hing khawm diing a; 12I thuaah leh amah toh vai i hawm khawm diing a; amah i kiheetmohbawl leh ama’n zong ahung kiheetmohbawl diing; 13Eite ginum sih zonglei amah chu a ginum zing a, amah leh amah a kiheetmohbawl thei ngal sih a, chih hi. 14Thu phatuamlou, a ngaikhetute diing a beimangna higiap thu a kinial lou diingin hi thute hesah zing inla, Lalpa ma-ah thu pia in. 15Thutah thu dihtaha khen in, zumna diing nei lou natongtu banga, Pathian ngaih a hoih a kimusah diingin kingaihtuah in. 16Hizongleh Pathian zahtaat louhna thusoi meimeite nungheisan in, ajiahchu huchibangte’n mite Pathian ngaihsah louhna lamah a puigamla deuhdeuh uhi. 17Huleh a thu un meimasia neeh bangin amahuh a ne diing hi; a lahvah Himenai leh Phileta a pang uhi: 18Hute’n chu thutah a paisan va, thohkiitna a um zouta chi'n, mi khenkhatte ginna a sumang uhi. 19Hizongleh Pathian innbulkip chu a ding zinga, hi chiamchihna a nei hi, Lalpa’n amah a hite a he hi. Huleh michin Khrist min lou photmah in giitlouhna paisan heh, chih. 20Hizongleh inn loupi sungah sana leh dangka beelte chauh a um sih a, sing beel leh lei beelte zong, huleh khenkhat ittuaah, khenkhat ittuaah lou zong a um hi. 21Hujiahin mi hi silte laha a kihepkhiah leh beel ittuaah, siangthou, a pu diing a zattaah, silhoih chinteng a kipeihsa ahi diing hi. 22Teilawl utnate zong taisan inla, hizongleh lungtang siangthou a Lalpa min lamte toh dihtatnate, ginnate, lungsiatnate, kilepnate delh zaw in. 23Hizongleh, kikhinna a siam veu chih he in, kinialna ngolhuai leh pilhuailou ah pang sin. 24Lalpa suaah inchu a khing diing ahi sih a, hizongleh mi zousiah tung a jaidam, thuhilh siam, thuaahthei ahi zo diing ahi. 25Pathian in thutah a heetna diing va kisiihna a piah khaahleh chi'n a kalhtute chu thunuaigolhtahin a thuhilh diing ahi; 26Huleh diabol in sala a matte, Pathian deihzawng bawl diing a, a thaang apat ahung suaahtaat theihna diingun.
Currently Selected:
TIMOTHI II 2: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.