TIMOTHI II 1
1
Chibaibuuhna leh kipaahthu soina
1Paul, Khrist Jesu a um hinna thuchiam dungjuia Pathian deihzawng a Jesu Khrist sawlleh in; 2Ka ta deihtah Timothi kawmah; Pa Pathian leh Khrist Jesu i Lalpa uh kawma kipan hehpihna leh, khotuahna leh, huleh hamuanna um hen. 3Suun leh jana tawplou a ka haamteinate a ka hung heet zing jiahin, ka pilepute a kipana sialepha heetna siangtah neia a nna ka toh zingpa ka Pathian kawmah kipaahthu ka soi hi. 4Kipaahna a ka dim theihna diingin, na mittuite he zingin, nangmah hung muh ka ut mahmah hi; 5Ginna tuailou nangmah a um chu ka ngaihtuah tahchiangin, hu ginna chu a masapenin na pi Lois ah a um a, na nu Eunisi ah zong a um a, huleh nangmah ah zong a um chih dihtahin ka he hi.
Phatuamngai diing leh haangsan diing a hilhna
6Hujiahin ka khutngah jiaha Pathian silpiah nangmah a um chu muut kuang diingin ka hung henonsah hi; 7Ajiahchu Pathian in launa hagau ahung pe sih a; hizongleh silbawltheihna leh, lungsiatna leh, lungsim sianthouna hagau ahung pe zaw hi. 8Hujiahin i Lalpa thuheetpihna chu zumpih sinla, amah mitaang kei zong hung zumpih sin; ahihvangin Pathian silbawltheihna bang jel a tanchinpha jiaha gimthuaahna thuaahpihtu hizaw in. 9Ama’n chu i silbawlte dungjui hilou in, amah guat leh a hehpihna dungjuiin ahung hundam a, kouhna siangthou in ahung kouta hi, huchu leilung pianma a Khrist Jesu a ahung piah ahita hi. 10Hizongleh ahung hundampa Jesu Khrist kilaahna jiahin tuin suhlat in a umta hi, ama’n chu sihna sumang in, tanchinpha jalin hinna leh sihtheihlouhna chu vaah ah ahung tunta hi. 11Hu tanchinpha thu chu Jentelte hesah diingin thusoitu diing leh, sawlleh diing leh, hilhtu diing a guat ka hi hi. 12Hujiahin ahi hi silte zong ka thuaah; hizongleh ka zum sih hi; ajiahchu ka gintaatpa ka he hi, huleh a kawm a ka kolsah chu hu nia diingin a kolbit thei chih chiantahin ka he hi. 13Khrist Jesu a um ginna leh lungsiatna nei in, thu dihdan ka kawma na jahte chu tukip in. 14Sil hoih na kawm a kolsaha um chu i sunga Hagau Siangthou um in kol hoih in. 15Asia gam a um zousiahte’n ahung nungheisan uh chih na he hi; a lahvah Phigela leh Hermojini a tel uhi. 16Lalpa’n Onesiphora innkuanpihte kawmah khotuahna pia heh; ajiahchu ama’n ahung suhalh jeljel a, ka khainiang buh zong a zumpih sih hi; 17Rome khua a a um laiin houh nguntahin ahung hawl a, ahung mudoh hi. 18Hu ni chianga Lalpa kawma khotuahna a muh diing Lalpa’n phalsah hen; huleh Ephesa khua a sil tampi a ka na a tohzia hoihtahin na he hi.
Currently Selected:
TIMOTHI II 1: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.