TIMOTHI I 6
6
1Pathian min leh a thuhilhna soisiat a, a umlouhna diingin suaah ngawngkol baat photmahte’n amahuh pute chu bangkimah zahbawltaah in sim u’heh. 2Huleh gingtu mi pu a neite’n unau ahihjiahun musit sih u’heh; ahihvangin ginum leh deihtahte leh, phattuamna mute ahihjiahun a nna uh tohsah u’heh. Hi thute hilh inla, hasot in. 3Mi koipouh in thuhilhna dang a hilh a, thutah, i Lalpa Jesu Khrist thu leh, Pathian ngaihsahna lam thuhilhna hoih a sah louhleh; 4Amah chu a kisathei ahi a, bangmah he lou ahi; heet malah in kinial leh thukalh lamah a ngol zota hi; huchibanga kipanin thangsiatna, kinialna, daalna, kiginmohna hoihloute, 5Lungsim gilou nei a, thutah nei lou minialhaatna bang ahung suaah veu hi; huchibang mite chu Pathian ngaihsah punna a ngai mi ahi uh; huchibang mi apat kihemkhia in. 6Hizongleh lungkimna toh Pathian ngaihsah chu punna nasatah ahi. 7Ajiahchu khovel ah bangmah i poluut sih a, bangmah i podoh het sih diing uhi. 8Huchi'n neeh diing leh silh diing nei in hute ah i lungawi diing uh. 9Hizongleh hauhsat tumte chu heemna leh, thaang ah, utna ngolhuai leh, susethei tampi bangah a puuhluut veu va, hute’n chu siatna leh manthaina ah mite a sutum veu uhi. 10Ajiahchu sum ngaihnat hi gilou zousiah bulpi ahi; huchu khenkhat in a deihgoh va, ginna a paimangsan uh, huleh amahuh leh amahuh lungkhamna tampi in a kisunlet uhi. 11Hizongleh, Aw nang Pathian mipa, hi silte taisan inla, dihtatna bang, Pathian ngaihsahna bang, ginna bang, lungsiatna bang, dohtheihna bang, thunuaigolhna bang delh zaw in. 12Ginna kidouna hoih dou inla, kumtuang hinna chu tu in; hu tang diing a kouh zong na hi a, huleh heetpihtu tamtah mitmuh in gupna hoih chu na gumta hi. 13Sil bangkim suhingtu Pathian leh, Pontia Pilat ma a gupna hoih gumpa Khrist Jesu mitmuh in thu ka hung pia hi. 14I Lalpa Jesu Khrist hung kilat masiah hi thupiah chu siangthou leh soiselbei a kol diingin; 15Hu kilatna chu, amah huntah ah, phattuaah Thuneipa chauh, kumpipate Kumpipa, lalpate Lalpa’n ahung lah diing hi; 16Amah chauh in sihtheih louhna a nei a, koimah naih theih louh vaah ah a um a, amah chu koima’n a mu ngei sih a, mu zong a muthei sih hi; amah kawmah kumtuang loupina leh silbawltheihna um hen. Amen. 17Hi khovel a mihausate chu kisathei lou diing leh, hauhsatna kiplou a muanna nga loua, sil zousiah i kipaahna diing a kichingtah mei a hung petu Pathian tunga nga zaw diingin; 18Sil hoih bawl diingin, silhoih bawl hau diingin, silphal diingin, kihop ut diingin; 19Kumtuang hinna a tuuhdet theihna diing va hun hung tung diing a diing innbulkip hoihtah amahuh diing a kholkhawm diingin hilh in. 20Aw Timothi, na kawma kolsah a um chu kol hoih in, Pathian zahlouhna thusoi meimei leh, dihloutaha pilna kichi kikalhna chu pumpelh in. 21Huchu khenkhat in nei a kisa va, ginna lamah a sukhialta uhi. Hehpihna na kawmah um hen. Amen.
Currently Selected:
TIMOTHI I 6: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.