TIMOTHI I 5
5
Thunatongtu hoih natohdan diing
1Teehsete chu tai sinla, hizongleh pa bangin, tangval deuhte chu unau bangin; 2Piteehte chu nute bangin, nungaah deuhte chu sanggamnu bangin, siangthoutahin hasot in. 3Meithaite, meithai tahzette chu zahbawl in. 4Hizongleh meithai koipouh in tate aha, tute aha a neih inchu, amahun innsungah Pathian ngaihsah dan leh a nulepate uh zahdan zil masa u’heh; ajiahchu Pathian muh in huchu a hoih a, huleh a pomtaah hi. 5Huleh meithai tahzet, amah tang a um in chu Pathian ah kinepna a nei a, suun leh jan a ngen in a haamtei zingzing hi. 6Hizongleh amah nopsahna a hingnu chu, a damlai in zong si ahi. 7Huleh soiselbei a, a um theihna diingun hi thute pia in. 8Hizongleh koipouh in amah mite a diing, a diahkhol a amah innkuanpihte a diinga ngaihtuah kholh louhleh ginna chu a zuausan a, ginglou mi sangin a gilou zaw ahi. 9Meithai kum sawmguup nuailam, mi khat ji na hita chu meithai a sim louh diing ahi. 10Sil hoih bawl lam a mi paahtawi a um a; tate khoi lian a, mikhualte na zintun a, misiangthoute keeng na silta a, mi gimthuaahte na panpihta a, sil hoih photmah thanuamtaha na bawl zou ahihleh. 11Hizongleh meithai nungaah deuhte zaw gial sin; ajiahchu Khrist lam a ahung kip louh chiangun pasal neih a ut veu uhi. 12A ginna masa uh a paih jiahun siamlouh tangin a um veu uhi. 13Hulou zong, inn chinah a vaahleh va, thasiat a chiing veu uhi; huleh thasiat chauh zong hilou in, a soi louhlouh diing uh soi in kamtam leh mi demhaat ahi veu uhi. 14Hujiahin, meithai nungaah deuhte’n chu pasal nei u’henla, soiselna diing lemtaang mawngmawng meelma musah sih leuh ka deih hi. 15Ajiahchu tuin zong mi khenkhat Setan lamah a peetkheta uhi. 16Gingtu numei aha, pasal aha in meithai a neihleh somdawl u’heh; meithai tahzette a somdawl theihna diingin kouhtuam suhbuai in um sih heh.
Upate tungtaang a thuhilhna
17Kouhtuam upa vaihawm hoihte chu a leh niha zahbawltuaah a seh hi u’heh, a diahkhol in thu leh thuhilhna lama tonggimte chu. 18Ajiahchu Pathian lehkhathu in, Bawngtal in buh a chil laiin a muuh kaan sin; huleh natongtu chu loh mutaah ahi, a chi hi. 19Kouhtuam upa a heehna u’chu heetpihtu nih aha, thum aha louin pom sin. 20Misualte chu, midangte’n zong a lau theihna diingun, mi zousiah ma-ah taihilh in. 21Khentuam nei a bangmah bawllou a, deihsahtuam nei lou a hi thute jui diingin, Pathian leh Lalpa Jesu Khrist leh angel teelte mitmuh ah thu ka hung pia hi. 22Mi koimah tungah khut nga pahpah sinla, midangte sualna ah zong kikum sin; siangtahin kikoih zingin. 23Na gilpi jiahin leh na damlouh veu jiahin, tui chauh dawn nawn sinla, uain themkhat khat zang veu in. 24Mi khenkhatte sualna chu a malat a, vaihawmna ah a tung masa veu hi; hizongleh mi khenkhatte chu a nung vah a jui hi. 25Huchimahbangin khenkhatte sil hoih bawl kilangmasa a um a; huchibang loute zong phual theih ahi sih hi.
Currently Selected:
TIMOTHI I 5: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.