TIMOTHI I 4
4
Kihilhna dihlou leh thunatongtu hoih umdan diing
1Hizongleh hun nunung lam chiangin mi khenkhatte’n puimangna hagaute leh dawite thuhilhna ngaihsah in, ginna chu a tawpsan diing uh chih Hagau in chiantahin a soi hi; 2Lepchiahna a zuauthu soi in; a sialephaheetna uh siih aam a bih a um in; 3Kiteen khaam in, huleh neeh diingte, thutah gingta a hete’n kipaahthu soi a saan diing a Pathian in a siamte chu ne lou diingin thu a pia uhi. 4Pathian silsiam zousiah chu a hoih hi, kipaahthu soi a saan ahih photleh bangmah nual diing a um sih hi. 5Ajiahchu Pathian thu leh haamteina a suhsiangthou ahita hi. 6Hi silte unaute na heetsah leh, nang chu Jesu Khrist thunatongtu hoih, ginna leh thuhilhna hoih tutan a na zop thu a vaah khang a um na hi diing hi. 7Hizongleh Pathian zahlouhna thu leh piteehte taangthu deih sinla, Pathian ngaihsahna lamah kithunun in. 8Ajiahchu tahsa kithununna ahihleh them khat chauh a phatuam a; hizongleh Pathian ngaihsahna chu, hinna, tu a um zing leh hung um kiit diing piah thuchiam a neih jiahin sil zousiah ah a phatuam hi. 9Hi chu thu gintaat umleh pomtaah mahmah ahi. 10Ajiahchu huchia Pathian hing i muan jiahin i tonggim a, i pang teitei uh ahi; amah chu mi zousiah Hundampa ahi a, a gingtate a ahi diahkhol hi. 11Hi thute chu pia inla, huleh hilh in. 12Na naupanna koimah in musit sih heh; hizongleh haam kamsuaah ah, gamtatdan ah, lungsiatna lam thu ah, hagaulam thu ah, ginna thu ah, sianthouna lam thu ah, gingtute etton diing hizaw in. 13Ka hung masiah lehkhasim leh, hasot leh, thuhilh ngaihsah in. 14Nangmaha um silpiah, soilawhna a piah, upate khut ngah a Pathian in nang ahung neihsah chu thahdah sin. 15Mi zousiah kawma na phattuamna a lat theihna diingin hu silte ngaihtuah inla, hute ah kizang zou in. 16Nangmah leh na thuhilh ah pilvaang in; hu silte ah um zing in; huchibang hihna jalin nangmah leh na thu jate na hundam diing hi.
Currently Selected:
TIMOTHI I 4: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.