TIMOTHI I 3
3
Kouhtuam houtute leh upate mizia diing
1Koipouh kouhtuam houtu a pan ut chu, natoh hoih ut ahi, chih a dih ahi. 2Huchi'n kouhtuam houtu chu, soiselbei, ji khat nei, kisuumthei, pilvaangtah, gamtathoih, mitaangphal, thuhilh siam; 3Uain khamhaat lou, mivuaah chiing lou, punna niin a huaiham lou, mithuaahthei, minialhaat lou, eenhaat lou; 4Amah innsung vaihawm siam, zahumtah a, a tate thununsiam mi ahi diing ahi. 5(Ajiahchu mi’n amah innsung bawn vaihawmdan a heet louhleh, bangchi’n Pathian kouhtuamte a enkol thei diai?) 6Gingthah mi ahilou diing ahi, huchilou inchu a kisatheikha diing a, diabol siamlouh tanna a tangve kha diing hi. 7Hulou zong polam mite soiphat ahih ngei diing ahi; huchilou inchu soisiat a um in diabol thaangah a awhkha diing hi. 8Huchimahbangin, kouhtuam upate chu mi zahum, kamtam lou, uain hai lou, punna niin a huaiham lou ahi diing uh ahi. 9Sialepha heetna siang in ginna thuguuh kem mi ahi diing ahi. 10Huleh hite ah etchian in um masa u’henla, hunungin soiselbei ahih uleh kouhtuam upa nna tong u’heh. 11Huchimahbangin a jite u’zong mi zahum ahih ngei diing uh ahi, kamtam lou, kisuumthei, sil zousiah a ginum ahi diing uh ahi. 12Kouhtuam upate chu ji khat nei, a tate uleh a innsung uh feltah a vaihawmsiam mi hi heh. 13Ajiahchu kouhtuam upa na hoihtah a tongte’n dinmun hoihtah leh Khrist Jesu a um ginna lama haansanna loupitah a kisiam uhi. 14Sawtloukal a na kawm a hung kinem in hi thute na kawmah ka hung gial hi; 15Hizongleh ka hung um sawt khaah leh, Pathian inn sunga bangchibang a gamta diing na hiai chih na heetna diingin ka hung gial ahi, huchu Pathian hing kouhtuam, thutah khuam leh kingahna ahi uhi. 16Huleh Pathian ngaihsahna thuguuh chu nial guallouh in a loupi ahi; Pathian chu tahsa in ahung kilang a, Hagau in siam a tang a, angelte’n a mu va, Jentelte kawma taangkoupih in a um a, khovel a gintaat in a um a, loupina a puitouh in a umta hi.
Currently Selected:
TIMOTHI I 3: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.