BOTHUBO 22
22
Isak pesu Akumllagho tsu
1Tishive kethiu Alhou no Abraham peju ghi pa vilo pi, “Abraham.” Ike Abraham no ishi khochile, “Iye, ni hi anie.” 2Alhou no pi, “Nono kimiyeqhiyi chekeu onu Isak, ti likhi akeu sasu Moria ghakhu lo wulo eno naghuto khipau okichetsuni keno tileno pa pesu kuchopu pitikeugho shi ghi akumllagho chhelo.” 3Abraham no inaqhe itheno ithu puzu gadaha tsughada kudayive eno aqemi kini pa nu Isak ngo ishi pa gholo sawuni ke kuto. Eno kuchopu pitikeu gho ghengu lono asu ghepu puzu Alhou no pavilo wulo pikeu a-lo wue. 4Akuthuni Abraham no pishipuwoju kelo pipuakeu-a hu putouno ithulue. 5Abraham no aqemi pama vilo pi, “Nokujoye gadaha sasu hile ngo aghilo. Anu ikujono hula wuno Alhou mlla puzu nokujo lau ideghini ke.” 6Abraham no kuchopu pitikeu gho ghenguno asu puchekeu ikhipe pa nu Isak xapipe eno pano pau lono ami ngo azuta ishi pe puzu pama kumtsa wuve. 7Ike Isak no papuh vilo pi, “Ipuo!” Abraham no khochile pi, “Iye, inu?” Isak no iniju, “Le ami ngo asu ishi pecheni ikemu kuchopu pitikeu gho ghenguno bheritiye khile ani kya?” 8Tile Abraham no pi, “Anu, Alhou no kuchopu pitikeu gho ghenguno bheriti lakhi kutotsu nanie.” Ike pama kumtsa chesu wue.
9Alhou no kichetsu puakeu-alo pama no wo-tolu kelo, Abraham no tile akumllagho kipti-a lakhi mlae eno tipa shou asu kithikiyi qhie. Pano pa nu Isak aphi au phevetsu eno akumllagho kiptia lo asu shou beve. 10Abraham no pa nu ghiqhiniye pau chhopuwo azuta ikhilue. 11Ikemu atsutsu lono AMPEU kungumi lakhino ishi pa ku: “Abraham!” Pano ishi khochile, “Iye, ni hi anie.” 12Kungumi huno pi, “Onu pithi kevilo momu pa shou kiumu shikevilo, kughengu noye Alhou gholu cheni kepi ino ithivae; Noye anu lakhi likhi akeu ghi pesu itsuveni keu suchilemoe.” 13Abraham no tsughuwo jukelauye, pa thikhau bheritsu lakhi asuminipho lo akibono kunakufu pesu aghike ithulue. Pano wu puzu bheritsu hu sawo pa nu zuqhulo kuchopu pitikeu-gho lakhi akumllagho mllae. 14Abraham no tipa-a pesu “AMPEU no Kutotsue”#Ibri tsalo: “Yahweh Yireh” ipi kuvetsue; eno ishi kutolo hi picheni: “AMPEU wu naghuto lono hi kutotsue.”
15AMPEU wu kungumi no atsutsu lono ghuthu akiniu ghi Abraham ku puzu ishi pi, 16AMPEU no pikeu no, “Ino ilikhi ije lono tushoqhi anie, onu lakhi likhi akeu ghi suchilemo puzu no hitoi shikeu ghenguno 17ino shishe okumghatsuni eno oti kughukoqo shishe kighishe tsunie. Panongu ye atsutsulo ayepu je-jehi eno azughi mukulo asaye je-jehi shi nani. Oti kughukoqono aghumi liwo khasulu nani: 18Ayeghiqhalo ashiayeh kumtsuno ino oti kughuko kumghavetsu ke toi kumghatsulo pi nani eno tiye nono igholu keu ghenguno ke!” 19Abraham no pa qemi pama lau idewo eno panongu kumtsa Bersheba lo wove no paye tilau kughuna ache.
Nahor Tikughuko
20Ado ta wovekethiu, Abraham no pa thikuzuu Nahor nipu Milka no anuli punue pi chilu: 21Anoghiu no Uz eno Buz no pa thikuzuu, pa shelo Kemuel paye Aram papuke 22eno Khesed, Hazo, Pildas, Yildafu, Bethuel, ishi. 23Bethuel ye Rebeka papuh ke. Abraham thikuzuu Nahor nipu Milka no anu hipano tache punue. 24Eno Nahor nipu kishe Reuma ghi Theba, Gaham, Thahas ngo Maaka ishi punu.
Currently Selected:
BOTHUBO 22: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
