BOTHUBO 23
23
Sara Thive eno Qhove
1Sara ye ampe 127 xupuzu thive. 2Liye Kanan yeghilo Hebron lono thive. Abraham no li kumsuno mloqa ae. 3Kumsuno pano li kumo tishi puaghino wupuzu Hatimi putsaghi pi: 4“Niye inami eno kupokichemi shi nongu gholo acheni. Inipu kumo qhonike ghenguno ayeghi a-a lakhi ivilo jesu tsulo.” 5Panonguno Abraham khochile ghi ishi pi, 6“Hi inijutsulo, akijeu noye ningu gholo akughushu kukami lakhi ke ningu kumoki chhupuakeu akiviulo onipu kumo qholulo. Ningu gholo akumoki aghikeuye khuu nomu otsumokeu shimo nani eno opelo onipu kumo qholupe nanike.” 7Tile Abraham no puthughove eno panongu zulo itsaiqi 8no pi, “Nonguno ipelo inipu kumo qholu peni shi aghiaye, hi initsulo. Zohar nu Efron wu 9Makpela lo atuki akeu ivilo jesutsu penike inijutsulo, tiye pa lu phelo anike. Nongu nhekithe lono ipelo akumokilive-a shilupenike kiu me shiaghini keno ivilo jesutsulo pilo.”
10Efron ye Hatimiqo gholo ngo aghi, eno tile Hatimiqo aphu liwolo kumqo kuhoake zulono pano ishi Abraham vilo pi, 11“Akijeu, kumukumoke, alu hu ino otsunie eno tile atuki akeu ghi otsunie. Onipu kumo qholu penike, ni timi hipaqo zulono ino otsu anie.” 12Ikemu Abraham no timiqo zulo itsaqipiye 13eno kutami kumtsuno chilukepushi ghi Efron vilo pi, “Nono kuchouno ti tsuniepi aye, hi inijutsulo! Ino alu ghenguno ame otsuni ke ti lutsulo eno ino inipu kumo qhonie.” 14Tile Efron no pi, 15“Akijeu, ayeghi tipauye ghuka 400 meke, ikemu nikujo dolo tino kiu piania? Tile onipu kumo qholulo.” 16Efron no ame pikeulo Abraham ghi pulove. Hatimiqo zulono ame pikeu toi Abraham no ghuka 400 kihi pesu Efron tsuve. Hiye alhikishimi no akimighi pepimhe chekeu kiqi lono kihipe tsue.
17Hitoi shi keu lono Mamre phu kipela kudau Makpela lo Efron yeghi akeu tile alu, atuki, alulo asubo akeqo eno tipa sukumxalo akeqo kumtsu Abraham wu shiluve. 18Hatimi khijehi aliwolo kumqo akeno tile ighikemiqo zulono hipaqo kumtsu Abraham wu shive. 19Tipathiu Abraham no pa nipu Sara kumo Makpela tukilo qhove, tiye Mamre phu kipelau, Kanan yeghilo Hebron loke. 20Ikehu Hatimi launo alu ngo atuki qhulukeu pesu akumo kilivea shinike Abraham no pa mheghi shiluve.
Currently Selected:
BOTHUBO 23: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
