BOTHUBO 25
25
Abraham Tikughuko Kutamiqo
1Tipathiu Abraham no anipu lakhi lue, li jeye Ketura. 2Lino Zimran, Yokshan, Medan, Midian, Ishbak, Shuwa ishi punue. 3Yokshan no Sheba ngo Dedan papue, eno Dedan nuliqono Ashurim, Letushim, eno Leumim ishie, 4Midian nuliqono Efa, Efer, Hanok, Abida ngo Elda ishi. Hipaqo kumtsu Ketura tikughuko ke.
5Abraham no pano kiu pighi chekeno kumtsu pesu Isak wu shivepe. 6Eno pa nipu kutami nuliqoye pano xuaphi lono agho pesu tsu puzu panonguye pa nu Isak launo putou kipela ghakhulo puwuve.
Abraham Kithi
7Abraham ye ampe 175 xue. 8Paye ighono kitemi shino thive eno panowu timi kithimi gholo hekutsu sawuve. 9Pa nu Isak ngo Ismael pamano Makpela tuki Hatimi Zohar nu Efron lulo, Mamre phu kipelau akeulo pa kumo qhovetsue. 10Alu tiye Abraham no Hatimi launo qhulue. Abraham ngo pa nipu Sara pama kinikujo kumo tile qhoe. 11Abraham thive kethiu Alhou no panu Isak kumghatsue, eno paye Beer-Lahai-Roi zukikhe philo ache.
12Hipaqono Abraham nu Ismael ti kughukoe. Paye Sara qeliu Ijip liu Hagar no punuke. 13Hipaqono Ismael nuliqo jeke, panongu punukeu apasu shi aje kutsu keu kiqi lono: Ismael nu anoghiuno Nebayot, pa thiu punukeqo no Kedar, Adbel, Mibsham, 14Mishma, Duma, Masa, 15Xadad, Tema, Yetur, Napis, eno Kedema ishie. 16Hipaqo no Ismael nuliqo eno panongu je lono aphu shino achekeu-a jekutsue, hi atomi pano chighi kinino pano shiayeqoke. 17Ismael ye ampe 137 shiake lono thive eno paye kithimi gholo hekutsuve. 18Ismael tikughukoye Ashura yeghi kudau wuke lalo Ijipmi yeghi kipelau Havila ngo Shur qhalo kughuna acheuve. Panonguye Abraham tikughuko kutami launo putosu xu ache.
Esao eno Jakob Punukeu
19Hino Abraham nu Isak nuliqo kughukoke. 20Isak no ampe lhobidi shi ake lono Rebeka luke. Liye Mesopotamia ghakhulo Aramiami Bethuel nonga eno pa peu jeye Laban. 21Liye anuha shi aghike ghenguno Isak no AMPEU vilo inikhutsue. AMPEU no pa kighini khochile tsuno Rebeka ye mishiluve. 22Li polo anga kini mishipu akeu pamano kumghothuve kelono lino pi, “Ishi kepushi keu lono aye niye kishivelopi kya?” pi lino AMPEU vilo iniju. 23AMPEU no li vilo pi,
“Opolo ashiayeh kini anie.
Noye kuthakumlami aqo kini pununi cheni.
Lakhi no lakhiu nguno akumtou shi nani;
Eno akichiuno ayitiu qeu shinani.”
24Lino punukepu tsala tokelo, li polo anu kini aghie. 25Atughushi punukeuye huchuyi eno amhi ghoghoi, ikehu pa je Esao kutsue. 26Tipathiuno pa thikuzuu iqighie, eno Esao launhe lo tsuqupeghi iqighi keghenguno paje Jakob kutsue. Lino hipama punukelo Isak ye ampe lhotsugho shia.
Esao no Anoghiu Mheghi Jeve
27Anu pamano thuwuve, Esao ye ashihalo shitsa shiuveno ashou itsu cheni shiuve, ikemu Jakob ye iqunei kemi eno akilo ache. 28Isak no Esao kimiye kughengu paye Esao no tughashi yipughi keu shi chuche ikemu Rebeka no Jakob kimiyeke.
29Ghulo lakhi Jakob no ayekulho lhoa kelo Esao ye aghalo ashihau puzu ighie. 30Paye kulamuve eno Jakob vilo pi, “Niye muzuthive ake ipelo ti huchui keu yekulho chupelo.” Tighenguno pa je Edom ipi kutsue. 31Ikemu Jakob no khochile pi, “Ishi tsalanino owu anoghiu mheghi ivilo jesuvelo, tishi aye ino otsunie.” 32Ike Esao no pi, “Alo, niye thini keshive ake hi anoghiu mheghiye ighenguno kiu ala shikulupu kya?” 33Jakob no pi, “Imaye ishino igizu lono tushoqhi velo.” Esao no tushoqhive eno pawu anoghiu mheghi Jakob vilo jesuve. 34Tileno Jakob no asho ngo ayekulho ngo ishi patsue. Pano chuvekethiu ithupuzu pa lalo wuve. Esao ye hitoi pawu anoghiu mheghi milive.
Currently Selected:
BOTHUBO 25: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
