BOTHUBO 26
26
Isak eno Abimilek
1Puzuu Abraham ghulokilo puqumiye ighikeu toi itaghi puqumiye keu tipa ghakhulo ighie. Ike Isak no Gerar lo Filistiyami kukau Abimilek lau wue. 2AMPEU no Isak lau ipeghino pi, “Ijip yeghilo iqi kevino ino ovilo pipuakeu yeghilo ngolo. 3Hipau ghakhulo ngolo, ino osasu ani eno okumghatsunie. Kughengu ino otikughuko lau hipa ghakhu kumtsu tsuni eno ino opu Abraham lau piqhi puakeu shoqhi ino shikuputsunie. 4Opiti pelo atsutsu lo ayepu qo toi kighishe wolu peni, eno hipa ghakhu kumtsu otikughukoqo tsunie. Ayeghilo ashiayeh kumtsuno ino otikughuko kumghavetsu ketoi panongu kumghatsulo pinani. 5Hi kumtsu Abraham no igholu, ino shilopi keu shi, bethatsu keu pape eno ahza tsukeu peluke ghengunoke.”
6Ikehu Isak ye Gerar lo ache. 7Tipa-alo kuamino pa nipu vehu iniju kelo pano ishi pi, “Liye ichepue,” kughengu pano “Liye inipue” ipini keu msave, tile kuamino pa ghiqhiveno Rebeka luve nosa kehu, kughengu liye ighono juvike. 8Isak no tilau ado kushuwa ngove kethiu, ghulo lakhi Abimilek, Filistiyami kukau huno alashe lono jupipe kelauye Isak no panipu Rebeka sasu allokile aghikeu ithulue. 9Abimilek no Isak kupuwu puzu pi, “Kuchouno liye onipu keghi noye kishi puzu liye ochepue pi kya?” Isak no khochile pi, “Ino kumsukeuno liye inipu ke ipi aye li ghenguno ipithive nosakehue!” 10Abimilek no pi, “Noye ni pelo hiye kiu shive peniye ani kya? Ningu gholo khualano mulalei onipu shiputhave aghiaye ni shou angsu ikughini cheke.” 11Abimilek no timiqo vilo hipau zah tsue, “Khuuno timi hipau momu pa nipu shou aubeni keno, timi tipauye pithiveni putsae.”
12Isak no tipau yeghilo apiti qusu keu mpelo ghuthu aqhe kighishe shi alau ithulu eno AMPEU no pa kumghatsue. 13Paye kinikulu shikithe wuve eno ighono kinimi shiluve. 14Kughengu pano bheri, amshi eno aqemi kutomo pighiche kehu Filistiyamino paju anheshuwuve. 15Ikehu, papuh Abraham kuxu lono azukikheqo chhukeu hu Filistiyami no tipaqo lakhavetsuno ayeghi pesu jonhave tsue.
16Tile Abimilek no Isak vilo pi, “Ni qhiveno chevelo, kughengu noye ningu nguno shishe akumtou shiauvae.” 17Ike Isak no tipa-a lono wuve eno Gerar bokhuqalo pa phiki shisuno tile acheuve. 18Abraham kuxu lono azukikhe chhukeu pano thivekethiu Filistiyami no lakhavetsu keqo hu Isak no itaghi chhukithe. Eno papuh no tipaqo je kiu kutsu keno paghi tipaqo je ti kutsue. 19Isak qemiqono abokhuqalo azukikhe lakhi chhue eno tiye azupuki akeu zukikhe shiaghie. 20Ikemu Gerar lo amshi khemino Isak qemi sasu muto eno azuye panowu kepi pie. Ikehu Isak no tipa zukikhe je pesu Esek#Mutomushu kutsue, kughengu panonguno tile pa sasu muto kehu. 21Isak qemino azukikhe kutau lakhi chhue eno tipau loghi mutoe, ikehu pano tipau je pesu Sitna#Kimthi kutsue. 22Tipa-a lono kutau pano iqesusu wuve eno azukikhe kutau lakhi chhue. Tipau ghenguye panonguno mutomoe, ikehu pano tipau je pesu Rehobot#Ililayi kutsue. Isak no pi, “Itehiye AMPEU no ningupelo ililayi luve ape eno ninguye ayeghilo kinikulu shiluniae.”
23Isak no tipa-a lono Bersheba lo iqhoe. 24Tipaji AMPEU no pa lau ipeghi no pavilo pi,
“Niye opu Abraham Lhou.
Ino ogholo ani ke musa kevilo.
Iqeu Abraham ghenguno,
ino okumghatsuni eno oti kughuko tsunie.”
25Isak no tile akumllagho kipti-a lakhi shie eno AMPEU je kughi mllae. Tile pa phiki shipe qhie eno tileghi pa qemino azukikhe lakhi chhue.
Isak ngo Abimilek Xakutha
26Abimilek no Gerar lono pa kusau Ahuzat ngo pawu ghushimi shou atou Phikol ishi sasu Isak lau ighie. 27Ikelo Isak no panong vilo pi, “Nonguno imthi puzu nongu gholono ipelo wuvepeke kushiniye ilau ighi ania?” 28Panonguno pi, “Ninguno mtsuqhei ithulu keuno AMPEU ye ogholo anie, eno ningu no kumsulu keuno no eno ningu dolo ashoqhi lakhi qhimayesae. Ningu pelo osasu puloshoqhi lakhi shipelo, 29ike nino obumo ke hutoi noye nishou alhoksa shipemonie. Ninguno olau akivi likhi shi eno opelo aloino wupe kehu itehiye AMPEU no okumgha vetsuae.” 30Isak no panongu ghenguno aghulhu kuto tsue eno panonguno chuqu kusho shie. 31Panonguno inaqhe itheno ithu puzu lakhino lakhi vilo tushoqhikile. Isak no panongu vilo ilenowolo pive eno panonguno aloinoghi pa launo idewove. 32Tipani aqemino ighino Isak vilo panongu no azukikhe chhukeu vehu pie. Panonguno pi, “Ninguye azu chhupheluvae.” 33Pano azukikhe je Sheba kutsue. Tighenguno ishi kutolo tipa phu je Bersheba#”Ashoqhi zukikhe momu Tsuni zukikhe” (Bothu 21.31) ipi cheni.
Esao no Inalimi lu
34Esao no ampe lhobidi shi akelo pa nipu shipeniye Hatimi Beeri no nga Yudit ngo Hatimi Elon no nga Bashemat ishi lue. 35Tino Isak ngo Rebeka pama mlo shikighimeve.
Currently Selected:
BOTHUBO 26: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
