MARK 5
5
Tughakusano sa-akemi Shipivi
1Ike panonguno azughi tuxakudau Gerasen ghakhulo ighi. 2Jisu no ashuka lono ipeghi kemtsa, timi lakhi akumokilive kudauno ighieno pa sasu kusho. 3Timi huye tughakusa sa akehu akumokilivelo acheke. Khunomu ayikichhe ghi pesu pa tshupe qhimla, 4kughengu ghuthu kutomo pa phi a-u tshuvetsue ikemu tishi ke kumtsulo pano ayikichhe suthave eno pa pukhulo ayikhada pukukeu sutha piniyivetsu eno khunomu pa chhikughuvulu kepu kumto kuhae. 5Putho-pucho akumokilive lo eno naghutolo paye pulhapuju vekipighi ighache, eno atu pesu pa likhi pa hepungo-qhiche.
6Kughou pano putouno Jisu ithulukeno, posu ighino pa zulo gihukeu shi-ghi qhoqhunheluve, 7eno asutsa kumgha lono ighaghi pi, “O Jisu, shishe Akiqheu Lhou Nu, noye ikughape kiu shivetsu niye ani kya? Alhou jekuno ino ovilo iniju anike, ishikighime kevilo!” 8Pano hi pikeuye kutauno kumo puzu Jisu no pa vilo ishipiae: “No tughakusa, timi hipau launo ipeghivelo!” 9Ikehu Jisu no pa vilo ishi iniju, “Oje khuu kya?” Timi huno ishi khochile, “Ije ye ‘Aqokitikhie,’ kughengu ninguye kutomoke!”#Grik lo:“Legon” 10Eno pano shishe Jisu qhuinijukeuno tughakusaqo pelo tipa ghakhuqha lono puwuvetsu kevilo pie.
11Awo aqo lakhi tipau phivilo naghuto-vekudalo achu mza ae. 12Tughakusaqono Jisu qhuiniju, “Awoqo lau ningu puwuvelo, ningu pelo tipaqo philo ilo pelo.” 13Ikehu Jisu no tipaqo vilo chevelo pi. Tughakusaqono timi launo ipeve puzu awoqo philo ilove. Awo aqo kuchopu kelo 2000 kutoloke, atuxulo kohakivesu iqieno azughilo ilove eno azughi lono putsuqhive.
14Awoqo khechekemino pove eno hipau sutsa pesu taun lo eno aghakhuqhalo kulhavetsue. Kiu shive keno juniye timiqo no ighi. 15Panonguno Jisu lau ighi, eno timi khuu philo tughami aqokitikhi achekeno tipau ithulu, paye aphimini pepuve, pa kukumsu achipishi kitheveno tile iqa ae; eno timi kumtsuno msave. 16Khunoqono ti ithulu keno tipaqono tughamino sa achekeu timi huye kushivetsu keno eno awoqo ghili ishi kutami vilo pi. 17Ike timiqono pano yeghi sukumxa qhiveno wuvelopi Jisu qhuiniju auve.
18Jisu no ashukalo ilochekelo, timi tughamino sa-achekeu huno Jisu qhuiniju pi, “Ipelo ogholo chepenima?” 19Ikemu Jisu no pa milive eno pa vilo ishi pi, “Nobolomi lau akilo wolo eno panoqo vilo Ampeu no oghenguno kiu shitsu keno eno Ampeu no kishi okupuqhiyi keno pilo.” 20Ike timi huno cheve eno Taun Chighiqo #Dekapolis kumtsulo wu puzu Jisu no pa ghenguno kiu shitsukeno pia; eno ti chilukemi kumtsu akumzaqhiyive.
Jairus nga eno Jisu Phishe Bukeu Totimi
(Mt 9.11-26; Lk 8.40-56)
21Jisu no ashuka lono itaghi azughi katha susu tuxa kudau ighikelo timi aqokitikhino pa lau kumqo ighi, paye azughi mukulo ae. 22Ikelo Sinagog lo sakipheu Jairus no ighino Jisu ithulu kelo pa pukhu phivilo iluikiqi, 23eno Jisu vilo tsu-momo qhuinijughi pi, “Ninga ilimi kitila lakhi anike liye thivenikeshi su ani. Ighi puzu li shou o-u betsulo, tishianguno liye viluve nani!” 24Ike Jisu no pa gholo wuche. Tile timi aqokitikhino pa papesu wuche eno aqha kumtsu lono pa suhupe che.
25Tilehi totimi lakhi ampe chighikini aji po chekemi ae, 26shikipivi mi kutomono li tucho chenamu liye ighono su-ache. Liye pisa akeu kumtsu puwokhavemu kutakeu kuhae ikemu alhoksa shikitheuve. 27Jisu ghili pikeu lino chiluche eno timi aqokitikhi gholono pa thiu ighi. 28Kughengu lino ishi kumsu, “Pano uchekeu phi likhimu ino bulu aye, niye vive nani.” 29Pano uchekeu phi lino bulue ike paikhavino lino aji pochekeu tave, eno liye akusu suakeu lono viluvea kepi li philo ithi ighive. 30Jisu ye akuka pa launo ipeve keu ithive puzu timi aqokitikhi lau igho-ighino pi, “Khuno ino uchekeu phi bu kya?” 31Pa khopemino pa khochile pi, “Nono ithulu anike, timi aqo kitikhino osuhupe chenie, ikeghi noye kishi puzu ‘Khuno ibu kya?’ ipi ani kya?” 32Ikemu khuno hi shikeno juniye Jisu no pa homxa jukutoae. 33Totimi huye li shi-ajilo kiu shivetsu keno ithive puzu akumsano khokhoshi ighi eno Jisu zulo ilu iqiveno pa vilo kishivekeno abo- akeshi pi. 34Jisu no li vilo pi, “Anga, okupuluno oshipivivae. Alokughunoshi wolo, eno okusu lono noye vithai luvae.”
35Jisu no hi pi aphi lono, Jairus ki lono timi khami ighino pi, “Ongaye thivae noye kushiniaye kutsuchekeu hinguno alau punaqhi ani kya?” 36Panonguno pikeu Jisu no inikumghaleyi vetsu eno pa vilo ishi pi, “Musakevilo, puluke likhi pulualo.” 37Pitor ngo Jems eno pa thikuzuu Johan kumo aye kutamiye khumu pa gholo wupemo nikeu shive. 38Panonguno kughou Sinagog lo sakipheu kilo ighi keno, mubumghuyi aghike ithulu, eno timiqono shishe ighamukuqa aghie. 39Jisu no sholoku-u ilo puzu panoqo vilo pi, “Nonguye kushiye mubumughuyi ani kya? Kushiye qah ani kya? Angaye thimphie, liye zu anie!” 40Panonguno pa junu, ikehu pano panoqo kumtsu hapipeve, eno anga pu-aza ngo pa khopemi mikuthu ishi likhi sasu anga puzupe puakeu chebolo ilo. 41Pano li-u tsuqupe puzu li vilo ishipi, “Talita qum”, tipau kiqiye “Ilimi kitila-o! Ino ovilo pi ani, ithughivelo!” 42Paikhavino liye ithughive eno alacheluve; liye ampe chighikini nga shiae. Hi shi kemtsa panonguye akichiqhi kelauno kiumu kumsumlave. 43Khuu vilomu hipau ithi pekevilopi Jisu no tsatsayi lakhave, eno chukepu kiuala pesu li tsulopi pano panongu vilo pive.
Currently Selected:
MARK 5: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
