MARK 6
6
Nazaret lo Jisu Milive
(Mt 13.53-58; Lk 4.16-30)
1Jisu no tipa-a qhive puzu pano ghakhulo ighi eno pa khopemino pa gholo che. 2Sabat pineni paye Sinagog lo ilono kutsu ae.Timi kutomo tile ae eno kutomono pano kutsukeu chilu puzu akichiqhiveno ishi pi, “Timi hipauye khileno hipaqo kumtsu ithilu kya? Kishino kungu lokutsu hikithipu pa lau tsupuani kya? Paye kishi puzu akumzapu hikithipu shilu ani kya? 3Paye Maria no nu asu kiyiqimi shichekeuke kumo sha? Eno Jems, Jese,Juda eno Simon noqo pamu kekumo sha? Pa chelimiqoye ningu gholo anike kumo kesha?” Ikehu panonguno pa thaighae. 4Tile Jisu no panoqo vilo pi, “Tungkupumi lakhiye pa punughalo, pa laghaqo eno pa bolomi gholo thono aqha kumtsulo pa gihukeu acheni.” #Jn 4.44 5Paye kusukinimi kini-kuthua shou pa-u bepuzu shipivitsukeu kumoaye tipaulo akumzapu kumla kiumu shitsumlave. 6Pano ghami kupulukumo jupesu Jisu ye akumzaqhiyive. Jisu no tipa che-axulo akeqo phulo kutsusu wuve.
Aphuqolo Chighikini Puwu
(Mt 10.5-15; Lk 9.1-6)
7Jisu no pa khopemi chighikini kukutsu puzu kini-ni kumtsa puwu. Panongu pelo tughakusa haphelukepu kuka tsu. 8Pano panoqo vilo ishi ahza tsu: “Aghuzulalo ghenguno akusu lakhi likhi kumoaye, achuqupu pukevi, jolabo pukevi momu apokhalo pisa supukevilo. #Lk 10.4-11 9Apukhu kuqho pulo, ikemu aphikuzu kini ukevilo.” 10Panoqo vilo highi pi, “Kughou nonguno aphu lakhilo iloni keno womoke kutolo nongu sakusuu kilo ngolo. 11Nonguno aphu lakhilo ighi kelo timino nongu sasumo aye momu nongu tsa initsumo aye tileno wuvelo eno panongu shou thopiu shipe nike nongu pukhulo ayeghimukhu dalukeu kukhuqhivelo.” #Aposto 13.51 12Ike akhopemino wuno timiqo vilo axine lono xakideluvelo pi asheshu. 13Panonguno tughami kutomo haphevetsu, kusukinimi kutomo shou teli pesu nutsu puzu panoqo kusu shipivi vetsu.#Jems 5.14
Johan Baptist Kithi
(Mt 14.1-12; Lk 9.7-9)
14Herod akukauno hi kumtsu chiluve, kughengu aqha kumtsulo Jisu je ithiwove. Timi khamino ishi pi, “Johan Baptist hu akithi lono xuithughivae tishikehu tipaqo kuka lono pano ishi shilu anie!” 15Kutami khamino pikeuno, “Hiye Elija ke.” Itaghi khamino, “Hipauye tungkupmi lakhi kha-ghi tungkupumiqo gholo milakhi kimihi ke!” #Mt 16.14; Mk 8.28; Lk 9.19 16Kughou Herod no hipau chilu keno pano pi. “Johan Baptist hu ino pa kutsu luvetsu pekemu paye xuthughivae!” 17Herod no ahza tsu puzu Johan kughaluveke, eno akughukilo tshupe qhike. Herod no hi shikeuye Herodia ghenguno, liye Herod pamu Filip nipu kemu Herod no sasu kughunawuveke. 18Johan no Herod vilo ishi piche, “Omu nipu sasu kughunakeu hiye achipi kumoe.” #Lk 3.19-20 19Ikehu Herodia ye Johan shou ighono aghapu ache eno pa pithive nishi ache, ikemu Herod ghenguno tishimlano acheke. 20Kughengu Johan ye amikucho eno akimthemi lakhi kepi Herod no ithiake paye Johan msaqhiyi ache, ike pano Johan susho ghi qhipuache. Kughou Johan no pikeu tsa chiluni keno pa mlo shishe a-a shimlave che eno tishikeghi paye amlokiqi shi pa tsa initsuche.
21Ashekhalo, kughou Herod no pa punu ghuzu tsalalo yehpeka kijemi, ghushimi kudau atomi eno Galil lo aqo-aho sakiphemiqo ishi aghulhu kije lakhi tsuake lono adokivi ithulu. 22Herodia ngano alou iloghieno ilhe eno lino Herod ngo pano ku- sukemiqo lopivi tsu. Ike akukauno ayiliu vilo pi, “Opulou kiukiu shiaghinamu otsunike ivilo pilo.” 23Pano li vilo tushoqhi-ghi pi, “Nono kiu-kiumu ivilo inijukeu ikukaqha tuxa kutolomu otsuni.” 24Ike ayiliuno ipeveno liza vilo ishi iniju, “Niye kiu khuni kya?” Li pazano ishi khochile, “Johan Baptist kutsu khulo.” 25Ayiliuno mutazu akukau lau iloghino ishikhu, “Niye opelo itehino Johan Baptist kutsu akhu lakhilo suno itsupe nishi ani.” 26Akukau ye shishe amlokusa shive ikemu paye li milivemlave, kughengu pano kusukemi kumtsu zulono pano ashoqhi shiveke. 27Ike akukauno mtazu ghushimi akhemi gholono lakhi hapuwu puzu Johan kutsu sughilopi ahza tsuve. Ghushimi no wuno akughuki lono Johan kutsu luvetsuno 28akhu lakhi lono pa kutsu pesu ighi, ayiliuno tipau aza tsuve. 29Johan khopemino ti chilu puzu,panonguno ighieno pa sukumo pewuve eno akumoki lakhilo qhove.
Timi 5000 Lojikeu
(Mt 14.13-21; Lk 9.10-17; Jn 6.1-14)
30Puwupuakeqo no Jisu lau ighi kumqoluveno panonguno kiu shilu eno kiu pesu kutsulu keno kumtsu pa vilo pi. 31Timi kutomono ighiju eno woveju akehu Jisu ngo pa khopemiqoye kuchukusho do ghi shetsumoe. Ike pano panoqo vilo ishi pi “Ningu likhi a-a hamilo wuno ado kitila akulho qhikepu shini.” 32Ike ashuka lono panongu likhi kutamino kuhakeu-alo wuve.
33Panoqono wuchekeu timi kutomono ithuluveno panonguye khunoqo keno ithive, ikehu taun kumtsu lono timiqoye apukhu lono tilau posuwuve eno Jisu ngo pa khopemi zuuno a-a hu toveaghi. 34Jisu no ashuka lono wo tokelo pano timi aqokitikhi hu ithulu eno panoqo jupesu pa mlo ighiqhiyive, kughengu panonguye bheriqono akheu kuhano aketoi ithulu. Ike pano thwokha jeli pesu panoqo kutsu. #Akiki 27.17; 1 Kuka 22.17; 2 Yeki 18.16; Ezek 34.5; Mt 9.36 35Kughou ave munuveni cheghi keno, pa khopemino ighi puzu pi,”Hiye khumu kuhakeu-a lakhi eno itehiye ave munu ayae, 36ike timiqo puwovelo, panoqo pelo akupunulo aluchemi lau ngo aphulo wuno panoqo pelo kiuala qhuchu lupelo.” 37Ikemu pano khochile, “Nonguno kiuala chukepu pesu tsulo.” Ikelo panonguno ishi pa iniju, “Noye ningu vilo wupuzu ghuka 1000 me asho qhusughino panoqo pelo chupe nike tsulopi kesha?” 38Jisu no panoqo vilo iniju, “Nonguye asho khije ani kya? Wu puzu julo!” Panonguno phuju puzu pi “Ashopa pungu eno akha kini anie.”
39Jisu no pa khopemi vilo timiqo amqo-amqo shi atsuni shou iqawo pelopi. 40Ike timiqono timi aqheqhe ngo lhopungunguno ajo-shi iqape. 41Tishieno Jisu no ashopa pungu akha kini ikhilu puzu atsutsulo jupukuno Alhou shikimthi tsu. Pano asho supho puzu tipaqo pesu timiqo lau kijetsu peniye pa khopemiqo tsu. Pano akha kini hu panoqo kumtsu kijetsuwope. 42Panongu kumtsuno chupuzu aghaqilu. 43Asho eno akha chukhakumo munomugho akhopemiqono ashoghi chighikini kichekutsulu. 44Tilehi achuqukemi kumtsu kuqha kelo timi 5000 ae.
Jisu no Azu Shou Alache
(Mt 14.22-33; Jn 6.15-21)
45Mtazu Jisu no pa khopemi pelo ashukalo ilo puzu pa zuuno azughi tuxa kudau Bethsaida lo wuvepe, eno paye timi aqokitikhi kughuxa puwo ae. 46Pano timiqo vilo akivishi wolo pive puzu paye akighini shi nike naghuto lakhilo wuve. 47Tsuzuve kethiu, ashukaye azughi shou che, eno Jisu ye pa likhi ayeghi shou ae. 48Pa khopemiqoye ashuka sasu azuu wumlano chekeu pano ithulu, kughengu amlhuno panoqono wucheke kudauno fuda ake. Ike inaqhe ayi kuthu ngo tsugho kuma dolono panoqo lau ighi. Paye azu shouno ala cheche, eno panoqo hecheveniye ake. 49Ikemu pano azu shou ala chechekeu panonguno ithuluve eno panonguye tiye aghahwu kughashive puzu ighamuku-ukhave. 50Kughengu panongu kumtsuno pa ithulu eno msave. Ikemu Jisu no paikhavino panongu putsano pi, “Amlo kumto shilo! Musakevilo!” 51Tishieno pano panoqo gholo ashukalo ilo eno amlhu mulhutave. Akhopemiqoye ighono akichiqhi eno akumzave. 52Panonguye 5000 loji keu kiqi hu ithikuthu mlave,panongu kukumsuye mukamghaive.
Genesaret lo Kusukinimi Shipivi
(Mt 14.34-36)
53Panonguno azughi kathasu Genesaret yeghilo ighi, eno panonguno tile ashuka hu tshupe qhive. 54Panonguno ashuka qhiveno wuchekelo timiqono Jisu ju paikhavino michiluve. 55Ike panonguno tipaqha kumtsulo posu wuno kusukinimiqo zuakeu ayephulo puzuno Jisu ye khilehi aniepi chilu nikeno tipa-a lo saghi. 56Pano khile ighi nikeno aphulo na aphughilo na, alu chemi gholo namu timiqono kusukinimi aphu mtalo puzupe qhieno pano uchekeu phishe likhimu kusukinimiqo pelo dilupelo pi pa qhuiniju, eno ti dilukemi kumtsu viluveche.
Currently Selected:
MARK 6: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
