NOONNA THLOU 10
10
Pitar Khatkho Kornilias
1 #
Noon 11:4–17
Keisaria a akming Kornilias an ong Itali na raalmii reija akpuui mii khat louam, 2amahva akchimlamseh che taploikuung apumma Ringpu ta trihmii inkhat, mahche mii kuungah aril liinna amlantheih khatkho Ringpu kuunga tranga akngenmii. 3Nikhatni pung kuvak a Ringpu vaa ringroi inkhat in amahkunga thlenga Kornilias kuunga asonkha ahamuhkhat a thra a amuhpei. 4Cheva amah in trihkanga anche ason, “Akpu mah i Jangsame?” Mahchunna ringroi in amahta ason, “Nangin ningen mahche namlan eikha Ringpu amaikhuunga koroutu veia kalsa. 5Ipek kupa eita Joppa a mathlah eiro, che Pitar ta an ong Simon ta thlengpi eiso. 6Amahva savun akseem Simon soh amjou, amah innva tuiiboom apaalna.” 7Amahkuunga aktrong ringroi in ansehnua, amah roijuih ankaar nata innihche amah in atirh akjuihtrang raalmii anaamkaar a akchimlamseh inkhatta aongpei, 8amah in maisoh inkeih a alamtanga asoneiche anmahta Joppa a amthlahpei.
9Mahchuche akhuvar a anmah in lamma nga tloh a ansehlai, khuuboom innaisei, pung kurukvak a Pitar in angennatu inchunga kalsa. 10Cheva avon traamma jangmekhat asaakjasa; atak in intrinanga amuh inkhatta muh a amsa. 11Che ringram inhoongsa mahche jamekhat inrolh intlaapkhat thalei akiing manlia amthlak amuhpei. 12Mahchunna alamtanga saak iin injao, avonna intolla akseh che akjuung vaakho injaosei. 13Mahche amahkuunga ahoukhat thlengsa, “Pitar, inthouro, that a saaro.” 14Chuta Pitar in ason, “Akpu, mahchunoh; alamva keiin tiknikho sakmangleh akseengnoh lousanoh ma ang.” 15Khatla veinitihpi hou amahkuunga thlenglasa, “Ringpu in amseengche pootta nangin seengnoh ongnoro.” 16Mah i veithumkhek inlenga nga tloh a suuksa, cheva kak hanga pootkha ringramma ahanpei.
17Ipek Pitar in amuh ahamuhkha arthata inhalla amsuunga; anro, Kornilias in amthlah kupa in Simon innkha khometa thonga ngirra amsei 18cheva anmah in Pitar ta an ong Simon kha amah khanna ammeta anruipei. 19Mahche Pitar in ahamuh kharelna anhalsuunga, Li in amahkuunga ason, “Anro, kupa inthum in nangta nakjonei. 20Inthoua trumro, che niril inhal tlonoh a anmahsoh inruuijouro; alamva anmahkha keiin kamthlah ei.” 21Cheva Pitar in trumma anmah kuunga asonei, “Nannih in nanjonkha keisang, jarelna thlengchoume?” 22Anmah in anson, “Raalmii reijapuui, akchimlamseh che Ringpu ta trihmii, Judi jatih apumtein antrongna Kornilias in nangta amah inna nithlengnatu che nang nitrongta arungeihnatu akseeng ringroi in amahkuunga amthlahpei.” 23Chunna anmahta aongche amah inna asih ei.
Akhuvar a amah in inthoua anmahsoh inruuia sehsa, mahche Joppa tingna unaopasa ste in amahta anruipei. 24Akhuvar a anmah in Keisaria a luutsei, Kornilias in anmahta ngaak a mahche ataploikuung unaoeisoh che anthringpi apaieita onga a ampiei. 25Pitar in asuunga aluut in, Kornilias in amahta antuukpipei che amah akehkungah inriilla amahta amthruunpei. 26Chuta Pitar in amthohche ason, “Ngirro; keikho miiang.” 27Cheva amahsoh trongjoua asuunga luutsei che miitam amjou antuukpipei. 28Che anmahta asonei, “Nantak Judi khat in aktlei jatih khatta inruuipi chunohleh intuukpi i khatloh a trongsuura tlohphunoh ta nanrom, chuta keiin tukhatta sakmang chunohleh akseengnoh tih a kiongnohnatu Ringpu in kammuh peiang. 29Chunna mairella keita kamthlah anga, keiin indahnoh luunga thlengsang. Nannih in jarelna keikuunga mii namithlah meta kiruinachou.”
30Kornilias in ason, “Nijan manli amaa a, pungku atlak in, keiinna ngenna ammang; cheva anro, antleh puunrei silh a kupakhat kimaa a ngirsa, 31amah in ason, ‘Kornilias nangin ningenkha kitheihpei, che nangin niril liinna namlan eikha Ringpu amaa a antheihpei 32alamchunna Joppa a akming Pitar an ong Simon ta ongnatu mii mathlahro; amahvah tuiiboom komma am savun akseem Simon inna tlunga amsa.’ 33Chunna kak hanga nangkuunga mii kamthlah, nangin nithlengi khalmo tlansa. Alamchunna Akpu in nangkuunga trongthuun amlan naamteta kanrungeih natu ipek kannaam Ringpu amaikuunga amsung.”
Pitar Atrong
34Mahchunna Pitar in aanga ason, “Taktak a keiin kirom mah chuvah Ringpu va keimii miimii manainoh, 35chuta amahta aktrih jaatboom eita khatkho akchim aktloh miita amahkuunga loulouphu suuk. 36Amah in Israel kuunga trong amthlahkha nannih in namrom, leh oi vaa akthra trongta Jisu in araan (amah in anaamtetu Akpu sa), 37Judia ram pumteta sonna amdangnakha John in alupnua Kalili nata mathronna araanpei: 38Ringpu in khatloh a Najareth vaa Jisu ta Akseeng Lia che tuuisoh thao apoime; khatloh a amah in akthra thloutloh a mahche seitan in akroieita mathrat a amunrelta seh, alamva Ringpu in amahta anruuipi. 39Amah in Judi ei ramboom leh Jerusalem annih a atlohthlou anaamte relna kannih in sakhi veisung. Jisu ta thingkharh a mathoia anmah in anthatpei; 40chuta Ringpu in amahta nithum tihpia thinata amringpei mahche indanglonga inmuhsa; 41mii naamtein muhnoh eichuta Ringpu in acharche kannih in sakhitu veia kanmuhpei, amah in thinata aringche amahsoh kansaak kan iinjoupei. 42Akringei mahche akthiche eita pichaar tlohnatu Ringpu in akseengthlou tlohnatu phom athunni amahmii isa ta mii kuungah akthratrong anraan mahche sakhi malannatu amah in trongthuunta kanimlanpei. 43Ringraan annaam in amah relna sakhi amilan mah chuvah amahta amlot mii naamte in amahminga alehnahta in ip anphahtu.”
Jental ei in Akseeng Li Anphah
44Pitar in trong ita asonlai aktlei mii naamte chunga Akseeng Li trumsa. 45Cheva Pitar soh thlengjou amlot mii ankaarna in salungkhousei, alamva Jental anchungakho Akseeng Li apoihpei. 46Alamva anmah in aktlei tronga trongsei Ringpu ta inkaanga amipaakta anmah in antheihpei. Mahchunna Pitar in ankuunga sonna amdangva, 47“Inih in Akseeng Li iphah nangjimma akphah eita lupnatu tunangkhat in tuiita ithingchek ume?” 48Cheva anmah in Khrista minga lupnatu anmah kuunga jathang amlannei. Mahche anmah in Pitar kuunga kak anmahsoh amjounatu anngenpei.
Currently Selected:
NOONNA THLOU 10: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
