NOONNA THLOU 11
11
Pitar in Jerusalem Khakla a Atong Trong
1Ipekva Jental jaat inkho Ringpu trongta anrouloh peita Judia a am unaopasa inkho antheihpei. 2Mahchunna Pitar in Jerusalem ahanglai, avuntan ruul in amahta trong injetpia, 3anson, “Jarella nangin avuntan mii kuungah seh a nisaakpi eime?” 4#Noon 10:1–48Chuta Pitar in ankuunga thra matheih a intlaanga son amthronpei: 5“Keiin Joppa khuuboomma kingenlai, stuuipa in keidolh a kiamlai ahamuhkhat a intlaapkhat nanga trumma, ringram akiing manli nata amthlaak kimuh; mahchu kikuunga trumsa. 6Mahchuta innaia kian in akeh manli amsa inkhat in inkhatta that a aksaa raprilsaei, intolh a akseh saei, mahche marvaanna va ei kimuh ei. 7Che ahoukhat in keison kitheihpei; ‘Inthouro, Pitar; that a saaro.’ 8Chuta keiin kison; ‘Mahchunoh, Akpu; alamva akbuur mahche akseengnoh, kbaoa tiknikho luutnohmang.’ 9Chuta ringramtingna ahouin veinih tihpia amsangpei, ‘Ringpu in amseengche eita buur tih a lounohro.’ 10Mah i veithum suuksa, cheva anaamte ringramting ahanpei. 11Mah laitalla kupa inthum kan amna a tlungsei, anmahva Keisaria nata keikuunga amithlah ei. 12Inkaang inniim mathlinnoh a anmahsoh sehjounatu Li in keita keisonang. 13Khatloh a ringroi in amah a inna ngir amuhmeta kanisonung che atihpei, ‘Joppa ah tumekhatta mathlah a akming Pitar an ong Simon ta thlenso; 14nangleh nitaploikuung apumtein chaanring nanphahnatu amah in akthra trongta nangkuunga araantu.’ 15Keiin trong kamthronlai, Akseeng Li thlengnanga, antak chungakho thlengsa. 16#Noon 1:5Mahchunna Akpu in khatloh a asonme keiin intheihsang, ‘John inva tuiia naniluppei chuta nannihva Akseeng Li in naniluptu.’ 17Inih in Akpu Jisu Khrista ta imlotlai Ringpu in inimlan kuttholta intrimbenga anmah ankuungakho malanleva, Ringpu ta andah a akthlengchek kei i tusangme?” 18Mahtrong ita antheih in anmahva daichritsei. Mahche Ringpu ta paar mathrat a ansonpei, “Cheva Ringpu in Jental jatihkho anril mathlenga chaan amphah ei.”
Antiok ah khakla Anlin
19 #
Noon 8:1–4
Ipekva Stephen hunhaia Akpu amlot mii eita anchutpeia inthektlamsei, anthek eikha Phonikia a Saipras a mahche Antiok phah a inlaa a sehsei, Judi noh a aktlei jaat a trongkha raannoh ei. 20Chuta Saipras a mahche Sairini na mii arouin Antiok a thlenga Kriik trong aktrong Judi ankuunga trongei mahche Akpu Jisu ta anraanpei. 21Mahche Akpu akut in anmahta anruuipiei, mahchunna miitam in malot a Akpu tinga inheisei. 22Mah trongraanni Jerusalem ah am Khakla amikur a tlungsa, cheva anmah in Barnabas ta Antiok a amithlahpei. 23Amah in athlenglai Ringpu vaa malungsita amuhpei, che amah in aroomthoksa; anmah in Akputa malot a chet a an amnatu annaamta ril amthokei; 24alamva amahva Akseeng Li in khatkho malot ah sip akthra mii. Mahche miitam Akpu kuunga athlenei. 25Nga tloh a Barnabus in Saul ta ajonnatu Tarsas a sehsa; 26cheva amahta aktuukpeia, Antiok a athlenpei. Alamva kumkhattluun anmah in Khakla soh intuuk a miitamta anmitheih; che Antiok a aroieita matsahremma Khristen ta an ongpei.
27Pekva mahlaia ringraan in Jerusalem nata Antiok a thlengsei. 28#Noon 21:10Mahche ankaarna khat akming Akabas in ngirra tukleiram apumta trihkhop saakchaal suuktuta Li in matsah a amphoongpei; che mah i Klaudias in apaallai suuksa. 29Mahchunna aroi in anchek anchek nujuih a, Judia a ak am anmah unaopasa ankuunga majoomna mathlahnatu ngirsei; 30Che thlouchu antlohpei, majoomnachu Barnabas leh Saul kut ah mathlah a anparuul eita anmiphahpei.
Currently Selected:
NOONNA THLOU 11: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
