NOONNA THLOU 20
20
Mesidonia leh Akhaia a Seh
1Housuukha annemnua, Paul in aroieita onga bungthok amlanei che anmahta mah a asehnatu asonche atakva Mesidonia ah sehsa. 2Amah in ram jikchahta vanna asehlai anmahta ril matrangna trong khalmoa asonei, che amah in Kriis ah thlengsa. 3Mah khanna thlathum amsa, che amah in Siria ah muli chuunga sehtangta anchaanglai, Judiei in amahninga thranoh tlohnatu ansuulpei, chunna amah in Mesidonia vanna anlengnatu aril ngirsa. 4Amah in anruuipi miieichuva Beroia na Piarhas asa kupa Sopater, Thessalonia na Aristarkhas mahche Sekandas. Che Derbe na Kaias, Timothi che Asia na Taikhikas leh Trophimas mahche Timothi anmahsei. 5Anmah in kanmaa a louseh a Troas ah kaningaak a louamsei, 6chuta Chol jaonoh Tol buhdoon aknua kannih in Philippi nata muli chuunga sehsung, mahche nijan ranga aknua Troas ah ankuunga thlengsung, mah khanna nijan sirih amsung.
Paul tu Achenarem Troas Ak an Seh
7Matsahrem kouh aknua, kannih in tolta masuuknatu kanchunlai, Paul in tungva asehja hanga anmahsoh janjai phah a tronga amsa. 8Kannih in kanchunna achungnung khumma mitton tam intaar. 9Akming Eutikhas antih naokhat in inn thongsiinna inbok a am, Paul in soot atrong inva imuh alohpeia thikhemma insa, cheva inn inkaang inthumtihpi arelanata tlasa mahche thia anchunpei. 10Paul in trumma naota akpomche ason, “Nanril malahnohve, alamva amah achaan atak a ammang.” 11Paul in inn inkaang inthumtihpi arella kalsa mahche tolta masuuk a ansaakpei, anmahsoh soot ramvaarphah a trongsa, cheva sehsa. 12Mahche anmah in kupasa khata ringa anphurhpei, che anmah anroomthokha ste sta nohsa.
Troas Nata Miletas ah Seh
13Chuta kannih in muli amna a matsah a lousehsung, muli chuunga Asos ah sehsung, kannih in Paul ta mah khannata mulia kanphurhjasa, alamva Paul in kehlamma sehtangta inchaangsa. 14Amah in kannihsoh Asos ah antuuklai, amahta muli machuunga kannih in Mitilini ah thlengsung. 15Kannih in mah khannata muli chuunga kansehlai akhuvar a Khios amaatalla thlengsung; mahche akhuvar akho kannih in Samos ah muli chuunga kanthlengche Miletas ah tlungsung. 16Alamva Paul in Asia a lai soot a amnohnatu Ephesia vanna muli achuungnatu aril ngirsa; alamva vei ajaleva Pentikos nia amah in Jerusalem atlungnatu innotsa.
Ephesia ah am Anparuul Ankuunga Paul in Asaamna Trong
17Mahche Paul in Miletas nata Ephesia ah pao mathlah a mah khanna am khakla va anparuul eita aongei. 18Che amahkuunga anthleng in alousonpei,
“Keiin Asia ramma kikeh kichuunni khannata lai amrella keiin nannihsoh inruuia khatloh a ammangme ta nantak in nanrom, 19inruruh a mahche ruithli luungsoh inruuia Akpu ta rou kitloh mahche Judiei in keita thranoh masuuknatu chaang kan annang; 20nannih in inkal nanphahnatu akirkho khaak tlonohluunga nankuunga sonna kamdangkir peichou, che savaangna mahche inn inna kamtheih peichou. 21Judi leh Kriik mii annih kuunga Ringpu kuunga anril thlengnatu mahche Akpu Jisu Khrista ta malotnatu sakhi kamlan. 22Che pekva anvesa, Li in keikhit a Jerusalem a sehsang, mah khanna keininga kha suuktungme romnoh ang; 23khuuboomrel niseh nisehna a simma niluutnatu mahche klah knang niphahnatu nangta nakngaak a amta Akseeng Li in keikuunga keison khopta kromning. 24#2 Tim 4:7Chuta kei i aman tammang chunoh a amanchaal mii angta insonnoh ang, keiin kitlohtuphu kithlouta mapaang chuche Ringpu amlungsiva akthra trongta sakhi malannatu Akpu Jisu ningnata keiin kaphah routlohta aktlohsang. 25Ringpu kurung huunnavaa Akthra Trongta nankaar a keiin raanna sehsang, che pekva anve, nannih tukhat inkho kei kimeelta veikhat inlenga keimuhnoh usachou ta krom. 26Churella keiin mi in nangkuunga sakhi kamlanchou mah chuvah tukhat inta nanchaan maang chouleva kei kamraal amnoh, 27alamva Ringpu in inichaak inimtheih apumte akirkho mathlahnoh luunga nangkuunga sonna kamdangkir peichou. 28Nantak turella mahche sadamlom naamte turella pirve, amah Asa kupa vaa thii in akleiche Ringpu vaa khakla ta thra nanroinatu Li Akseeng in nannihta ak an nanimveipei. 29Mah i keiin krom mah chuvah keiin kisehnua akraang uiiramuiipii eiin nankaara thlengtuei, sadamlom inleia mahnohtu; 30mahche nannih nankaarna amlot miiluungkho masimna a chimnoh lamting naniphurh natu nankaarna mii inthruh tuei. 31Alamchunna pirve, kumthum luut a suun khulouh inngainoh a ruithli luunga kamtheih choukha intheihve. 32Pekva keiin nannihta Ringpu mahche amah malungsita son aja kisonpeichou mahtrongin nannihta naniseem achek che amah in amseengche mii in aphahtuphu doikha nanimlan achek. 33Keiin tukhat kuungata haarngou nohle ra–ao nohle inliingna puunreita ralla dinoh ang. 34Kei darkaar a mahche tlohkhalla kisehpijou in anvaat anpa jikcha kikut innih in tlohkhalla rou kitlohpieita nanrom. 35Mah naamte i nankuunga kammuh peichou mah chuvah nga tloh a thlou tranga tlohcheknoh aksool miita imjoomtu tla, Akpu Jisu atrong, ‘Akphahchunga amlan in ralla doiphah vei’ tih a asonkha intheihtu tlame.”
36Nga tloh a atrongche anmahsoh ankhuk makamjoua annaam anngenjoupei. 37Che anaamtea trapsei mahche Paul ta kon konna amichohpei, 38Anmah in kei kimeelta veikhat inlenga keimuhnoh usachou ta asonkhanna anril khalmo kaangei. Cheva amah in keita mulithaangna phah a kanthulang.
Currently Selected:
NOONNA THLOU 20: TARAOBSI
Highlight
Share
Compare
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
