NOONNA THLOU 21
21
Paul in Jerusalem a Seh
1Kannih in anmahsoh kanthrekche muli chuunga antluunna Kos ah thlengsung, akhuvar khanna Rhodes, che mah khannata Patara ah thlengsung. 2Mah khannata Phonisia ah aksehsam mulikhat kantuuk a mah khannata chuunga sehsung. 3Kanthlengin Saipras kanmuhpei, che kannih in kaveitong mah ah muli chuunga kansehche Tair ah tlungsung; alamva mah khanna mulina pootta amithrumsam. 4Mah khanna aroi eisoh intuuk unga nijan sirih amsung. Li vaa akliia anmah in Paul ta Jerusalem a asehnohnatu ansonpei. 5Kannih in kan amnatu anising atangche, mah khannata mah a sehlasung; anmah anmei ansasoh annaam inruuia khuuboom apaal phah a kanithulpei; mahche tuiiboom apaalla kankhuk makamma kanngen mahche inthreknatu trong khatleh khat kansonche inthreksung. 6Mahcheva kannih in muli chuunga sehsung che anmahkho an inna inlengsei.
Paul in Keisaria ah Tlung
7Kannih in Tair nata tuiiboomma lamsei seh kanche che Tolemais ah tlungsung; mahche unaopasa eita roomthok a kamithruunche anmahsoh nikhat amjousung. 8#Noon 6:5; 8:5Che akhuvar a kannih in seh a Keiseria ah thlengsung; che mii sirih suunga khatva evenjalis akming Philip amah innsuunga luut a amahsoh amjousung. 9Amah asarungak manli ammei changvaangnoh mangei, anmahva ringraanei. 10#Noon 11:28Mah khanna kannih in nikhat ninih kan amlai, akming Akabas an ong ringraan khat Judia nata thlengsa. 11Kankuunga thlenga Paul in anraakna khapatta alohche akeh akut a akhitche ason, “Akseeng Li in ngata nakson, nga tloh a Jerusalemna Judi ei in khapat akputalta amah khapatsaak a khit a Jental ankut a anmilantu.” 12Amah trongchuta kantheih in, mah khanna ak am in amahta Jerusalem a asehnohnatu kanngenpei. 13Chunna Paul in amsangpei, “Nannih in trap a kirilta nankhoih angi jarelname? Alamva keiva Akpu Jisu akmingrelna Jerusalem simma luutkhopnoh a thihnatu phah a thlouraang kitlohpei.” 14Amahta masehnoh natu kansuulta ajanoh inva, “Akpu in amdon veiso,” ta inngaisung.
15Maiche aknua kannih in thlouraang tloh a Jerusalem a hangsung. 16Mahche Keiseria na aroi aroukho kannihsoh sehjousung, kannih in kantlungnasam matsah a aroi akvei Saipras na Manason inna kaniphurhpei.
Paul in Jems ta Ak an Seh
17Kannih in Jerusalem kanthlengin, unao pasa eiin roomthok a kanimthlungpei. 18Akhuvar a Paul soh kannihsoh Jems kuunga sehsung; mahche anparuul naamte louamsei. 19Anmahta roomthok a amthruuneiche, amah in rou atloh Ringpu in Jental ankaar a atlohthlouta khatkhat a atongpei. 20Mahchuta antheih in, anmah in Ringpu ta paar anmithratpei. Che amahta anson, “Kan uh kannao Paul o, Judi ankaara amlot mii akpul jikcha tam ammiieime nirom mahche annaamtea trongthuunna anril anmiluutpei, 21Jental ankaar a ak am Judi annaamta Moses trongthuunta mathlah a ansa eita anvun tannohve mahche kastamta majuihnohve ta nangin namtheih peita anmah in nangrella antheihkirpei. 22Chuleva kha itloh usaame? Nang thlengsa ta inlitnoh a antheih usa. 23Churella nangkuunga kansonni majuihro. Trongchet aklou mii manli kannihsoh ammei; 24mahmii manlitia maruuia anmahsoh nitak maseengrosa che anmahtu akluut inbaobeh nangin malanro, chunna ansam anchehnatu. Nga tloh a nangrelna ansonchahkha chimnohta annaamte in anromtu chuta nitakva trongthuunta ngaak a ringro. 25#Noon 15:29Chuta amlot Jental turelnavah kannih in tranga sonna mah i kamithlakpei; mah chuvah anmah in rappu leili ah andoonpoot saakphunata, thinata, che aruking raak a anthat siildaar nata khatkho ahoong thranonata inpelve.” 26Mahche Paul in mahmii chuta aphurh eiche akhuvaara amah leh anmah antakta anmiseengpei, mahche maseengna achenia anmah khatkhat in katphu amilannatu laita maromnatu mathruunna thlaamma luutsei.
Paul ta Mathruunna Thlaam a Ansuur
27Nijan sirih achetumma, Asia na Judiei in mathruunna thlaamsuunga Paul ta anmuh in, miitamta hou amsuuk ta amahta ansuurpei, 28Anmah in ongsei, “Israel miieio kanimjoomve! Amunrel sehseh a trongthuunta che anmah mathruunna thlaameita janoh a miita amtheih kupa i mahmii isa; oichunga mathruunna thlaam asuunga Kriik eita thlen thlenna amah akseengmun ita amibuurpei” 29#Noon 20:4Alamva anmah in khuboomma Paul leh Ephesia na mii Trophimas ta matsah a anmuhpei, che Paul in amahta mathruunna thlaamma aluutpipeita anmah in amidonpei. 30Cheva khuuboom apumte hou masuuk a anthohpei, chunna miitam in inthruh a tlaanna thlengjousei; anmah in mathruunna thlaam asuungnata Paul ta matolh a kaia amithruhpei che kak hanga thongkho ankhaarkirpei. 31Che amahta anthatnatu ansuullai, Jerusalem apumtea housuuksa ta Rome na raalmii akloktingnata trong thlengsa. 32Kak hanga amah in raalmii leh raalmii reijapuui eita phurh a miitam amnatinga tlaanna thlengsei; chunna anmah in raalmii leh raalmii reijapuuita anmuh inva Paul ta khon inngaisei. 33Mahlaia raalmii aklok in Paul ta thlenga asuurpei, che amahta thirhang innih a khitnatu trong amlanpei. Amah i tume che amah in jangthlouta atlohpeime ta anruipei. 34Miitam kaarnata arouin trongkhat che arouinla aktlei trongkhat a ongsei; hou derderta atammal inva amah in akchimtalli khometa marom cheknosa, amahta raalmii amna a anphurhnatu trong amlanpei. 35Amah in achungtonga kal in, miitam in trihkhop a an ongkhanna raalmii eiin amahta domma anphurhpei; 36alamva miitam in juih a, “Amahta thatve!” ta rool jakkanga ongsei.
Paul In Atak Anngaaknatu Trong
37Paul ta raalmii amnah munna anthlentumma raalmii aklokta ason, “Keiin nikuunga trongste son ajaume? 38Nangi Ijip na miinoh cheme, inrang akhanna miithat miisun raprilna mii akpul manlita raprilla thlenna, mii chah chahta hou amsuukha nangnoh cheme?” 39Chuta Paul in amsang, “Keiva Silisia vaa Tarsas na Judi ang, mah khuuboom khannata inthouang; keiin mah miitam ankuunga kitrongnatu keijarota kingenche.” 40Raalmii aklok in ajapeia, achungtong kalna thaak ah ngirra mii eita akut aklek ei; che miitam in daichrit a an amlai amah in ankuunga Hibru tronga asonnei:
Currently Selected:
NOONNA THLOU 21: TARAOBSI
Highlight
Share
Compare
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
