NOONNA THLOU 22
22
1“Unaoei mahche kipa kipueio, ipek keiin nanmaikunga kitak kanngaaknatu kisontrongi rungaive.”
2Amah in ankuunga Hibru tronga atrongta antheih inva, anmah in ralla daichrit a amsei. Che ason:
3 #
Noon 5:34–39
“Kei i Silisia na Tarsas ah pok Judi ang, chuta keiva amah khuuboom inna Kamaliel athlanga liinsang, inih ipa ipuei trongsuur jiksiir athlanga keita klukanga nirik kamtam anga mii kamveiang, nannih naamtein ipek nanringna nanhoong nanvaa inanga keikho Ringpu rella kiril luutsang, 4#Noon 8:3; 9:1–19; 26:9–18; Kal 1:14mah lammita aknu akjuih mii eita keiin thi ajaphah a kikchut kamnangei, kupa kumei eita makaanga simma kithunei, 5mah i akthloi thiimpu leh anparuulna jama annaamtein kei sakhisei. Unaoei ankuunga amithlahnatu trongjihthuun jama ankuungnata kphah mahche anmahta tanti malannatu chekho anmahta suur suura Jerusalem athlennatu keiin Damaskas ah sehsang.”
Paul in Arilthlenga Thaminta Ason
(Noon 9:1–19; 26:12–18)
6“Keiin nga tloh a kisehlaia, Damaskas kannai in suunjai jaanga inromloua kak hanga ringramnata khalmo intle aakvaarkhat in keihiilla vaarsa. 7Cheva tukleia inriilsang chunna houkhat in keikuunga ason kitheihpei, ‘Saul, Saul, keita jarella nakchut nammaang angme?’ 8Mahchunna keiin kamsang, ‘Akpu tucheme?’ Amah in keita keison, ‘Keiva nangin chut a mananga nisih Nazaret na Jisu khasang.’ 9Ipek keisoh sehjou mii invah intle akvaarkha muhvah anmuh chuta keikuunga aktrong amah ahouva theihnoh ei. 10Mahchunna keiin kisonni, ‘Akpu, keiin jangkitlohtu tlame?’ Chunna Akpu in keisonang, ‘Inthouva Damaskas ah luutro, nangin nitlohtu thlou Ringpu in thlouraang atloh anaamte relna ohkhanna nangkuunga naksontu.’ 11Kvaarkha antlehmal invah kimit muh cheknohsang, keisoh inruuimii in kikutta matuh a kansehpipei, mahche Damaskas ah tlungsang.
12“Judi annaam in injahna mii, trongsuur nujuih a malotting arilluutmii akming Ananias an ong mii khat ohkhanna am. 13Amah in kikuunga thlenga kikomma angirhche keisonnang, ‘Unao Saul, nimit muhchekrosa!’ Mahlaital chunna keiin muh kichekpei. 14Amah in keita keisonnang, ‘Nangin Ringpu amdon niromnatu, Akchim Akpu ta muh nicheknatu mahche amah anarhouta nitheihnatu, inih ipa ipuei Ringpu in thlou tlohnatu nakcharpei. 15Alamva nangin nimuh khatkho nitheih eita mah kharelna mii naamte ankuunga nangin sakhi veiuche. 16Ipek nangin jarella ningaakme? Inthouro che inlupro, amah akming ongchalaia nang nilehta chaamro.’ ”
Jental Jatih ah Akthratrong Raannatu Paul ta Aong
17“Keiin Jerusalem a inlenga mathruunna thlaamma kingenlai, keiin ahamuh ah amsang, 18amahta kimuh in keisonang, ‘Intharo che Jerusalem nata inthabeb a inthruh rosa, alamva keirella nang nisakhi anmah in naklounoh tuei.’ 19Mahchunna keiin kison, ‘Akpu, anmah antak in anrom mah chuvah sinakokrel nangta namlot mii eita simma kithunnei che kakhonnei. 20#Noon 7:58Mahche nang turella sakhi amlan Stephen athii atlaklai keikho akomma ngirang mahchu keiinkho kaja, che amahta anthatlai amah anpuunreita ngaak a ammang.’ 21Chuta amah in keison, ‘Sehro; alamva keiin nangta ram aklah Jental jatih ankaar a kamthlah uche?’ ”
22Maiphah a anmah in atrongchuta minna anrungeih; mahcheva anrool inkaanga onga anson, “Mainang mii i thaleinata mamaanga thatvesa! ta anson. Alamva amah in aringnatu thlou amnohsa.” 23Anmah in ongsei, anpuunta anlekpei mahche marvaantonga phil anthekpei, 24raalmii amna munna anthlennatu trongthuun amilanpei, che miitam in amahta indah a khalmo ongsei, jarelname alam romnatu amahta khonna trong ruinatu jathang amilanpei. 25Chuta amahta khonnatu savunruia amikaang in, Paul in akomma akngir raalmii reijapuuita ason, “Rome na miikhatta pichaar tloh a amraal antuuknoh maa a khonni aiilme?” 26Raalmii reijapuui in mahchuta atheih invah amah in raalmii aklokkuunga seh a asonpei, “Nangin jangtlohtang nitihme? Alamva mah kupa i Rome na mii.” 27Mahchunna raalmii aklok in thlenga Paul ta ason, “Keisonro nangi Rome na miicheme?” Amah in ason, “Oi.” 28Raalmii aklok in amsangpei, “Keiin inbaobeh tam malanna Rome na mii vei kphahning.” Paul in ason, “Chuta keiva kipoklainata Rome namii veichesang.” 29Cheva amahta invuia trong aruisamkha kak hanga inlengsei; che raalmii aklok inkho Paul i Rome namii khat tih a arompei che amahta akhitmii inkho trihsa.
Paul in Jama Anmaikuunga
30Chuta amahta akkhit kuunga ason invah amjakpei, Judiei in amahta jarella amilaalme ta aromja rella aklok thiimpu leh jama annaamte inchunnatu jathang amilanpei, che Paul ta athlenche anmah anmaa a amigirhpei.
Currently Selected:
NOONNA THLOU 22: TARAOBSI
Highlight
Share
Compare
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
