NOONNA THLOU 23
23
1Paul in jamata antlinga asonei, “Unaoeio, mi in phah a keiin Ringpu amaa a akthra thranoh chim chimnoh romna lousinga ringang.” 2Cheva aklok thiimpu Ananias in Paul akomma angireita amah anar a anhainatu jathang amlanei. 3#Met 23:27,28Chunna Paul in amahta ason, “Ringpu in nangta nak haitu, inngou inteibang nanga! Nangin trongsuur nujuih a keita pichaar tlohnatu nanbokche trongsuur nata inthlenga keita khonnatu jathang nitlohme?” 4Amah akomma angirhin anson, “Ringpu vaa aklok thiimpu ta jikcha thranoh a nisaal peime?” 5Chunna Paul in asonei, “Unaoeio, amahta aklok thiimpu tih a romnohsang; alamva mah i nga tloh a injih a am, ‘Nang nakpuui eita thranoh a trongnohro.’ ”
6 #
Noon 26:5; Phil 3:5 Chuta amah aroieiva Sadukiis vaa loomsei che aktlei arouinla Pharisi vaa loomsei tih a Paul in arom inva, amah in Jama ankuunga onga, “Unaoeio, keikho Pharisiang, Pharisi khatvaa asa ang matuur leh thinata ring rella keita injah a chaang kan an nang.” 7Che mah ita ason inva, Pharisi leh Saduki ankaar a injanoh a innih suuksei. 8#Met 22:23; Mak 12:18; Luk 20:27Alamva Saduki inva thinata akringkho, ringroikho che likho amnoh antih, chulata Pharisi inva anaamte amchim ta anmilot. 9Mah chuvah khalmo miitam in ongtlamma housuuksa; cheva Pharisi anloomna trongsuurva lulok eiin ngirra indah a, “Kannih in amahkuunga chimnoh jikchakho tuuknoh ung. Ringroi inkhat in chunoh a li khat in amahkuunga trongleva?” 10Khatleh khat in injanoh a amahta kanthrelusa ta anson inva raalmii aklok in intrisa raalmii in trumma Paul ta ankaar nata namma anthlennatu che raalmii amna a anhonnatu jathang amlanpei.
11Akhuvar khulouh a Akpuin Paul akomma ngirra ason, “Niril matrangro, alamva nangin keirella Jerusalem a sakhi namlannanga Rome akho nangin sakhi namlantu.”
Paul Thatnatu Inruk a Ansil
12Ni avaar in, Judiei in inchunna anmah in Paul ta anthatnohmiil jakhatkho saanoh iinnoh umeta intella trongchet anlohpei. 13Mah thranoh ita antlohna turella inchaangeichu mii sopli akralei. 14Che anmah aklok thiimpu leh anparuul ankuunga seh a ansonpei, “Kannih in aktrang trongirsoh inruuia Paul ta kanthat nohmiil jakhatkho matemnoh reita trongchet kanlohpei. 15Churella anmah kuunga trongsuuk i minna majonna akseengchu maromnatu nannih in jama eisoh raalmii aklokuunga ipek maromve Paul ta nankuunga athlennatu amah in onna atluungnoh maa a amahta kanthatnatu thlouraang chesung.”
16Pekva Paul asarvaa asa kupa in Paul ta lamma anruungsamta antheihpei, cheva amah in seh a raalmii amna a luut a mahchuta Paul kuunga asonpei. 17Chunna Paul in raalmii reijapuui ankaarna khatta onga ason, “Mah nao kupa i raalmii aklokuunga phurhro, alamva amakuunga jangmekhat asontu am.” 18Cheva amah in nao kupa khata phurh a raalmii aklokuung anthlenpiche anson, “Simma am Paul in keionga amahnao kupa i nangkuunga phurhnatu keisonpei, amah in nangkuunga asonja ste am.” 19Raalmii aklok in akut matuh a athlangtinga sehpia inruk a arui, “Nangin keikuunga nisonja amchu keisonro?” 20Amah in ason, “Tungva Paul ta jama ankuunga jungpia trong suukta minna majonna akseengchu maromnatu ta ansonkha amisimnaning. 21Chuta anmah in ansonkha nangin indahhro; alamva kupa sopli akral in amahta anthatnatu lamma ruunga amsei, anmah in Paul ta anthatnohmiil jakhatkho sanoh iinnoh umeta trongchet anlohpei, pekva inchaanga amsei.” 22Cheva raalmii aklok khanna naokhata, “Amahkuunga keiin kimrompeita tukhat kuungkho sonnohro,” ta nao kupasa khata chaak a amthlahpei.
Paul ta Rampuui Pheliks Kuunga Amithlah
23Cheva amah in raalmii reijapuui innihta onga asonei, “Mi in khulouh pung inthumma Keisaria ah sehnatu raalmii reija innihsoh skol raalmii sopsrih mahche kuseichoi reija innihta thlouraang tlohvesa. 24Che Paul in achuungnatu skol ste thlouraang tlohve che rampuui Pheliks kuunga thranoh hoihnoh jakhatkho masuuknoh a Paul ta nanphurhnatu. 25Cheva amah in trongjihthuun nga tloh a amjihpei.
26“Klaudias Lisias akthloi rampuui Feliks, kamthruunche, 27Mah kupa ita Judi in ansuurche thatrei antihpei, amah atak i Rome namii tih a kirompei, raalmii eisoh seh a amahta kikalpei. 28Amahta jarelna amilaalme tihrella kiromja hanga anmahta jama kuunga kithlenpei. 29Mairella keiin kiktuukva anmah trongsuurta anruuina rella amahta maraal anmithlakning, chuta amahta thatnatu chunohle simma sihnatu talva amahkuunga amraalvah amnoh. 30Mah kupa chunga thranoh antlohnatu anruungi keikuunga amithlahpei, amahta amlaalmii ankuung akho achunga chuunga amithlak amaraal chuta nangkuungkho ansonnatu trongthuun kamlan.”
31Nga tloh a amah in amitheih nujuih a raalmii in Paul ta phurh a khulouh a Antipatris kuunga anphurhpei. 32Akhuvar a inlengsei che skol raalmiivah Paul soh ansehnatu anmahpei. 33Anmah in Keisaria anthlengche rampuui kuunga trongjihthuunta amilanpei, Paul kho amahkuunga amisilpei. 34Rampuui in trongjihthuunta apaache, amahvah ramna mii meta arui. Cheva amahmii i Silisi na miisa tih a arompeia 35amah in ason, “Nangta namlaalmii in atlunglaia nitakchunga trongsuuk i keiin kitheih umang.” Cheva amahta Herot koolla ngaak a sihnatu jathang amlanpei.
Currently Selected:
NOONNA THLOU 23: TARAOBSI
Highlight
Share
Compare
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
