NOONNA THLOU 24
24
Paul ta Judiei in Amilaal
1Nijan ranga aknua akthloi thiimpu Ananias in anparuul stesoh che akming Tertulas soh inruuia jungsa. Ukil in rampuui kuunga Paul chunga trong ankatpei; 2amahta amiongche, Tertulas in amahta maraal peknatrong ason,
“Akthloi Pheliks kannih in nang napaalla khalmo leh oia am kanphah, che nang napaalla kannih jatihta ralla pungporh namveiung, 3bilamma mahche amun anaamtea nitlohman romma kanjache. 4Chuta, nang laita soot lohnohnatu nirilvol akhanna kitrongta toibeb a nirungeihnatu kinoolche. 5Alamva amah kupa i trihkhopna thloutloh miisa tih a kanrompei, amah in tukleiramma am Judi ankaar a hou amsuuk miisa che amahva Najareth na kochanoh ruulta akching aklok khatsa. 625 Che amah in mathruunna thlaam luungkho mabuurtangta aksuul chuta amahta kansuurpei. 7Chuta akthloi kepten Laisias in kalthi hanga thlenga kannih kankutnata kanilohpei, 8Nang nitaktal in amahta ruia minna nisuiche kannih in maraal kanpek i anaamtekho rom nichektu.”
9Judi inkho amahchunga amaraal malan injaoseia, mah naamte i chimta ansonpei.
Paul In Feliks Amaikuunga Atakta Anngaakna
10Mahcheva rampuui in Paul ta atrongnatu aheisiir in Paul in amsangpei,
“Nangin kum vachah soot a mah jaatboom chunga pichaarpu hukveisache ta kiromchera, keiin roomthok a kitak kanngaaknatu kison. 11Keiin Jerusalem a Ringpu amthruun kisehna i nijan somleinih ralnohmang ta thra nirom; 12keiin mathruunna thlaamma chunoh a sinakokrel chunoh a khuuboomma tukhatsoh trong inkharh chunoh a miitamta hou kamsuukkho anmah in keituuknoh ei. 13Ipek keita kamilan angi akchim sakhi namlan cheknoh tuei. 14Chuta amah i keiin nikuunga kijapei, ohchuva anmah in heikoh ruul tih a an ong Lam aknujuih a inih ipa ipuei Ringpu ta keiva kamthruun, trongthuunna anjih anaamte che ringraan in ason anaamteta kamlot. 15Anmah in Ringpu ta matuura anjananga, mahchu akchimleh chimnoh innihrella veikhat thinata ringtu. 16Nga tloh a keiin lai amrel Ringpu kuunga mahche mii kuungah seengnoh kiveinoh natu klah ang. 17#Noon 21:17–28Ipek kum kak aknua kei kimiiei aklah aknangeita majoomma malannatu che katnatu thlenna thlengang. 18Mahchuta kitlohlai kei kitakta mathruunna thlaamma kamseeng anmah in anmuh, ohkhanna miitam amnoh ei che innah insuulkho suuknoh. Chuta Asia na Judi arouin 19keita kamilaalang, anmah in keita keijanoh a ansontuphu amleva nang nimaikuunga kei kamraal ansonuta. 20Chunoh a anmah antak in kei kamraalta tuuk eileva mah jama ankuunga kingirh laia son eiso. 21#Noon 23:6‘Akthi in veikhat ringtu tih a ingaak rella mi in keiin anmah amaa a chaang an kiphahning.’ ”
22Chuta Lam kharelva minna akrom Pheliks in pichaar atlohnohnatu ason, “Raalmii akpuui Lisias athlengin nannih pichaarkha achena kamthlak umang.” 23Nga tloh a raalmii reijapuui in Paul ta seella sihnatu chuta aningtamma sihnatu, che aruul apai in amahkuunga malanphu amilanlai anthlouta thingnohnatu trongthuun amlanpei.
Paul in Pheliks leh Drusilla Anmaikuunga
24Nijankhat aknua Pheliks in akmei Judi kumei Drusilla soh thlenga; amah in Paul ta am ongche Jisu Khrista ta malot rella trongta arungeih. 25Akchim pichaar tlohrella, atakta inkem achek mahchu vaknua akthlengsam pichaar rella Paul in asonta atheih invah Feiliks in trih a ason, “Ipektu veia sehrosa; keiin taancha kphahlai nangta veikhat kam ongla uche.” 26Mah laitalla Paul in baobeh kamlantungme ta amah in matuura am. Chunna Paul ta ong onga atrongpi.
27Chuta kumnih aknua Porsias Pestas in rampuui veia Philiks angutta amsilpei, Feliks invah Judi ei turella thloutloh akdit a Paul ta simma asihpei.
Currently Selected:
NOONNA THLOU 24: TARAOBSI
Highlight
Share
Compare
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
