NOONNA THLOU 25
25
Paul in Akthloi Kurung kuunga Veikhatla Trong
1Festas in pekva aramma athlengin, nijanthum aknua amah in Keisaria nata Jerusalem a hangsa. 2Chunna akthloi thiimpu leh Judi aklok ei in Paul chunga trong ankatpei; che amahta antakpei, 3anmah in Paul ta lamma ruunga thatnatu che Jerusalem a mathlahnatu annoolpei. 4Fistas in amsangei mah chuvah amah atak inkho mah khanna inthabep a asehja hangsa. 5Nga tloh a amah in asonei, “Nannih nankaar a aktloh akhal keisoh inruuia mah khanna sehjourei, mah kupa in asoina amleva, amahta malaneiso.”
6Amah in nijan niritnohle niku tlanoh a anmah ankaar a amche Keisaria a sehsa; mahche akhuvar a amah in kurung koolla inbok a Paul ta anthlennatu jathang amlanei. 7Che Paul in athlengin Jerusalem nata akjung Judiei in amahta hiilla ngirsei, amahta amilaalnatu akchim amilancheknoh khanna aklup trongsuuk jikcha amakuunga anmihthlakpei. 8Paul in atakta anngaaknatu ason, “Judiei trongsuurta andah a, chunoh a mathruunna thlaamta andah a, chunoh a Keisaar ta andah a keiin chimnoh jakhatkho tlohnoh ang.” 9Chuta Festas invah Judi ei rella ngir akdit a Paul ta ason, “Nangin Jerusalem hanga nichunga trong ankat inrelna mah khanna kei keikuunga pichaartloh i nikditme?” 10Chuta Paul in ason, “Keita pichaar tlohna turella Keisaar nang pichaar koolla ngirsang; nangin thra niromkhaning Judi ankuunga keiin chimno tlohnoh ang. 11Chunna keiin chimnoh tlohmii angleh mahche thi ajaphah a kilaal amsangleva matikcha thi aja chunnata keiin inlitnohtung; chuta anmah in keikuunga maraal kamithlak angi chimnoh, tukhat inkho keita kamlancheknoh tuei. Keisaar nikuunga trong kikatpei.” 12Cheva Keisaar in amah jama eisoh antelche amsangpei, “Keisaar kuunga trong nikat peitaningva, Keisaar kuunga sehtu tlache.”
Paul ta Akrippa leh Bernis Kuunga Anthlen
13Pekva nikhat ninih aknua, kurung Agrippa mahche Bernis in Festas ta anlousoong natu Keisaria ah tlungsei. 14Mah khanna soot an amche, Paul chunga trong ankatrella Festas in kurung kuunga malanna anson, “Feliks in simma thunna asih amah mii khat mah khanna am. 15Keiin Jerusalem kiamlai, akthloi thiimpuei mahche Judiei anparuul eiin Paul chunga pichaar tlohnatu kansonang. 16Keiin kamsangei mah chuvah tunangkhat miita thatnatu rai mathlaak tih i Rome ammiiei ankastamnoh, anmah in amilaal miikhasoh innakpitu mahche amaraal akphahmii khankho indenpia atrongnatu lai amahkuunga malanphu. 17Churella anmah in onna anthleng joulai, keiin mathilnoh a chuta akhuvar a keiin pichaar koolla inboksang che miikhatta anthlennatu jathang kamlanpei. 18Amahta amilaalnatu ngirra aktrongei in amahchunga khalmo malaalla trongtuei ta kamdonta, amah achunga chimnoh amraal jakhatkho thlennohsei; 19chuta anmah in chimnoh a amilot rella che Paul in akthra trongta araanva antheih mahsuunga Jisu Khrista in veikhat ringsa tih a asonrelna amahchunga trong anjetna steva am. 20Anmah in trong ruia amijonnava keiin seenga majon cheknohsanga, amahta Jerusalem seh a mairelna maseengnatu ningirhjame ta krui. 21Chuta anmahta kool kemma sih a akthloi kurungin trong achena amthlaknatu Paul in trong akatpei, amahta keiin Keisaar kuunga kamthlanohmiil amahta akngaak kuunga thra a ngaaknatu jathang kamlanpei.” 22Chunna Agrippa in Festas kuunga ason, “Kei kitak inkho amah kupa in asonta kirungeih jahang.”
23Nga tloh a akhuvar a Agrippa mahche Bernis in roomthok a thlengsei, che anmah in raalmii akpuuisoh che khuuboomna akming akseh mii eisoh miitam boomna thlaampiia luutsei. Cheva Festas ajathang nujuih a Paul ta asuunga anthlenpei. 24Che Fistas in ason, “Kurung Agrippa mahche onna inihsoh inruuia amjao anaam, Judi anaamtein mahmii i veikhat inlenga ringphunohsa ta Jerusalem a che onna onga keikuunga trong ankat i mahmii i nanmuhpei. 25Chuta amah in thi aja tandi phahnatu thloutalva atloh jakhatkho tuuknoh ang; che atak inkho kurung kuunga trong akattaningva amahkuunga kamthlahnatu ngirsang. 26Chuta amahrella keita aklokkuunga maitalsa tih a kimjihtuphu. Oirella amahta keiin nanmaikunga amuhvei kurung Agrippa nimaikuunga kithlenpei mah chuvah amahta minna ruiri kantihche aknua jaknangta kimjih ume tihchu kiromnatu. 27Alamva simma inthun miikhatta amah achunga amithlak amraalta seenga sonna keiin mathlah i alam chanohta kiloh.”
Currently Selected:
NOONNA THLOU 25: TARAOBSI
Highlight
Share
Compare
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
