NOONNA THLOU 26
26
Paul in Akrippa Amaikuunga Atakta Anngaakna
1Agrippa in Paul ta ason, “Nangin nitak turella nitrongnatu kijapeiche.” Chuna Paul in akutta ajamche atakta anngaaknatu asonpei:
2“Kurung Agrippa, Judi in keita keiandah a kanloon relna kei kitakta kanngaaknatu nimaikuunga mi in ngirra trong kphahrella kireipak thrata kloh, 3alamva Judi ei kastam anaamte che anmah in injetna jikcha thloia niromkir; churella kitrongta tlohtheih a nirungeihnatu kinoolche.
4“Mathron lainata keiin kijatih ankaar a mahche Jerusalem a nao kiveilainata keiin kiringna, kichaan khatkho kihoong kiva Judi annaamte in kanromang. 5#Noon 23:6; Phil 3:5Lai khalmo soot a anmah in keita kanrom taningangva, anmah inta keirella sakhi anmilanjale malaneiso, mah chuvah inih heikoh in ralremma cheksil ruul Pharisi khat veia ringsang. 6Ringpu in ipa ipuei ankuunga trongchet amlankhata keiin kimtuur relna keiin onna ngirsang che keita chaang keianpei. 7Isakhei somleinih inkho amahta kanphahtuta matuura khulouh suun anril maluut a Ringpu ta amithruun. Kurungo! Mah matuur irelnasa keita Judi ei in kanloonna angi. 8Ringpu in mii thinata amringta nannih in jarella malotjanoh ta namidonme?
9 #
Noon 8:3; 9:1–8; 22:4–16 “Kei kitak inkho ja a Najareth vaa Jisu akmingta indah a thlou jikcha kitlohtuta kamdon. 10Mahtal chuta Jerusalem a keiin kitlohpei; keiin aklok thiimpu ningnata akchek amnehva trongrol kphahche akseeng mii jikchaeita simma thunkhop noh a anmahta thatnatukho rou kijapei. 11Sinakok jikcha ah anmahta injomma tanti kamlanei mahche Ringpu ta thranoh manuih a antrongnatu kiksuullei; anmahta andah a mei suuk a kimluung inhaanga miiram khuuboom luungkho seh a anmahta kikchut ei.”
Paul in Khrista Kuunga Aluutnata Ason
(Noon 9:1–19; 22:6–16)
12“Nga tloh a keiin aklok thiimpuei ankuungnata akchek amnehvaa trongrol mahche thlou masilna jathangsoh inruuia Damascas ah seh ang. 13Kurungo, lamma kisehlaia suunjai talla, ringramnata kvaarkhat kinita ralla intle in che keisoh sehjou kannaamta hiilla kvaar kimuhpei. 14Kannaamte a tuklei ah kanril invah houkhat in Hibru tronga keikuunga keitihpei, ‘Saul, Saul, Jarella nangin keita nakchut angme? Lungkumta indah a nikeh a kao i nangta naksoktu.’ 15Ohchunna keiin kison, ‘Akpu, nang tucheme?’ Akpu in keison, ‘Keiva nangin nikchut Jisu khasang. 16Chuta inthoua a ngirro; alamva mairella keiin nikuunga kamuhpeiche, mah chuvah nangin nimuhche khatkho nikuunga keiin kammuhsam alam irella rou nitlohnatu che sakhi niveinatu keiin nangta thlou kithun uche. 17Keiin kamthlah Israel leh Jental ei jatih nata kikaluche. 18Anmah anmitta mahoongnatu, mah chuvah anmah in kthihnata akvaara anlengnatu che seitan vaa tuui nata Ringpu tinga anlengnatu, chunna anmah in anlehnata in ip anphahnatu khatkho keita kamilot apaalla akseeng ankaar nata tutu inkho anphahphuchu anphahnatu.’ ”
Paul in Athlouta Ason
19“Kurung Agrippa o, ringramna ahamuhkha keiin mahuihnoh tlohnoh ang, 20#Noon 9:20; 9:28,29chuta matsah a keiin Damaskas ah mahche Jerusalem na mii khatkho Judia ramboom apumtea khatkho Jental jatih akho sonna kamdangtuei, mah chuvah anmah in anrilta thlenga Ringpu ting inlengtu tlasei mahche anril anthleng i matikcha tihrella thlou amipaang tutla ta kisontuei. 21Mah irella mathruunna thlaamma kiamlai Judi ei in keita suura kanthatnatu ansuul. 22Mi in phah a keita kamjoom Ringpu tingnata thleng, chunna onna keiin ngirra mii aksiin leh akliin annihtinga sakhi kamlanpei, Moses mahche ringraan in suuktu tlasa ta ansonpot jakhatkho sonnoh ang: 23mah chuvah Khrista in klah knang athotu, chuche matsahremtu veia thinata ringtua Israel mahche jatih innih ah akvaarta sonna araantuta matsah a asonpei.”
24Amah atakta anngaaknatu oita ason inva, Festas in hou inkaanga asonpei, “Paul nangi innahsache; nangin khalmo nitam nitheih khanna nangta namnahpei.” 25Chuta Paul in ason, “Akthloi Festas, kei i innahnoh ang, chuta kitak in seenga akchimta trongsang. 26Alamva mah irella kurung in niromkhaning, keiin amahkuung akho kiningtamma trongsang; alamva mairella amah in aromnanoh amnohta kirom, alamva mah i akiingkaangah tlohphu thlounoh. 27Kurung Agrippa, ringraan eita namlotme? Keiin krom mah chuvah nangin namlot.” 28Agrippa in Paul ta ason, “Lai kak asuunga keita Khristen kamveitangta namdonme!” 29Paul in ason, “Lai kaksuungna slakho soot slakho thirhang talva inkhitnoh a nang khop noh a chuta mi in keitrongta arungai mii naamte in keinangjimma nanveinatu Ringpu ta kingen.”
30Cheva kurung, rampuui, Bernis mahche anmahsoh inbokjou anaamtea inthousei; 31ohkhanna inmahseia, anmah in khatleh khat insonsei, “Amah kupa in thi aja nohleh simma thunnatu matikcha thlou jakhatkho tlohnoh.” 32Chunna Akrippa in Festas kuunga ason, “Amah inta Keisaar kuunga trong katnoleva mathlah aja uta.”
Currently Selected:
NOONNA THLOU 26: TARAOBSI
Highlight
Share
Compare
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
