NOONNA THLOU 27
27
Paul in Mali Chuunga Rome a Seh
1Inih in mali chuunga Itali a sehnatu iril in anglaang laia, anmah in Paul mahche simma anthun aktlei eita Akastan raalmii ruulna reijapuui akming Julias kuunga amilanpei. 2Asia tuuiboomma ankuungah sehsamma Thesalonia vaa Mesedonia Adramita antih mii khat Aristarkas vah kannihsoh inruuijousung. 3Akhuvarra kannih in Sidon na tlungsung. Julias in Paul ta amchaalpeia amah aruulpai ankuunga amahta darkar am amilannatu amthlahpei. 4Mah khanna kannih in mali chuunga kanseh in kanmaatonga thliraang in kanninam unga Caipras ah mulita kanthohpei. 5Kannih in Silisia mahche Pamphilia tuiiboomta vanna muli kanthoh in Lisia khuuboom Mira ah tlungsung. 6Ohkhanna raalmii reijapuui in Itali phah a aksehtu Alekjendria na muli khat aktuukpei, kannihta amah in mulia kanimchuungpei. 7Kannih in nijan khalmo soot a maliata tap a kanthoh, che klukanga lahna kanphah a Knidas ah tlungsung, thli in kanmaatonga kanidenna mulithou janoh a kannih in Salmoni vaa Kriti ah mulita kanthohpei. 8Pher Havens antih muli inngeihna akomma Lasia khuuboom inkhatkho am, mahchunna kannih in khalmo klah a thlengsung.
9Lai khalmoa maangsung, mahche tuiiboom chung kansehkha thihnaringna thlousa, alamva buhelna aknikho avanpei, anmahta Paul in chaak a, 10asonei, “Lulok eio, tuiiboom chung seh i insok insiikna mahche khalmoa maangna iphahtuta kroom, onna muli leh asuunga anthunpoot khop noh a inih chaankho thihnaringna veitu.” 11Chuta Paul in asonchunga muli akpuleh kepten in asonkhadom raalmii reijapuui in aril amluutpei. 12Alamva mah mali thlaknakha phalbia amnatlannoh amun taningvah, mii aktam invah okhannata muli chuunga sehnatu anchaakei, taancha anna akhitong kulkung mahche akhutong kulkung tonga am Krita ta muli chuunga Phoniks ah tlunga phalbi suunga mah khanna am ichek umeta kamidonpei.
Tuiiboomma Aktrang Khuleh Thli
13Akhuna thliraang in phirphirta araan in, anmah in khatloh a kanphah usa ta amidonpei, akrik thirhangta anlohche Kriti tuiiboom apaalla innaia mulita anthohpei. 14Chuta akhi nisuuk antih aktrang khuleh thli in tuiipaal nata athlangtonga amratpei; 15mulita aktrang khuleh thli in adenpeia, che thliraangta thleia seh cheknohsa, kannih in leimanoh insuulungta inngaia thliraang asehnata kanjuihpei. 16Mahche Kauda antih tuiiboom in hiilla asihna ramma kannih in mulita kankaiche maloh a dop ah inchuk umeta intrisung, mulia injaar puunta andokche mahchuta thliraang in araanna a amisehpei. 17Anmah in inkalna aja muli andihta andomche mulita khit a rui anaamte anhuina, sitsai anpeinatrang annoi philla inchuk umeta trihsei. 18Aktrang khuleh thliraang in kannihchutche, akhuvaara anmah in mulina poot anaamteta loonna amithrumpei; 19che nithum tihpia mulina pootta kanloonpei. 20Nijan khalmo sootsunga kinihkho mahche arsikho kanmuhnoh invah aktrang khuleh thliraang in kannihtong araan invah, inkal kanphahchek umangmeta kamituur in anaamte achena avah kamithlakkirpei.
21Khalmo soot a saak iin kanphahnoh invah, Paul in anmah kuunga thlenga asonei, “Miieio, nannih in keitrongta majuih ata Kriti na mulia chuunga sehnoh meleva, mainang insok insiik mahche kmaangi phahnoh utame! 22Pekva nanril matrangnatu kitihchou; alamva nankaarna tukhatkho nanchaan maangnohtu, chuta muliva maangusa. 23Alamva keiin aknu kijuih mahche keiin kamthruun Ringpu vaa ringroi inkhat in mi in khulouhtal khanna kikomma ngirsa, 24che amah in ason, ‘Paul, intrinohro, nangin Keisaar amaikuunga ngir; mahche anro, nangsoh muli chuungjou a nisehpi annaamta Ringpu in nangta namlanpei.’ 25Ohchunna kupaeio, nanril matrangve, alamva kikuunga keisontalkha suuktuta keiin Ringpu ta kamlot. 26Chuta tuiiboom in hiilla asihna ramkhanna inchuk usame.”
27Nijan somlei manli tihpi khulouh ah Adria tuiiboomma thliraang in raanna kaniphurhpeia, khulouh janjai jaanga mali akthouin ram amunkhat ah innaisame ta amidonpei. 28Chuuna anmah in jikchakhek thuukme boihmeta an ol in lam sopnih thuukta anrompei; chela anmah in ste seh a veikhat an ol in lam somlei ranga thuukta anrompei. 29Anmah in lungpiisoh inchuk umeta intriseia, muli aknungnata thirhang manlita anthlakpei, mahche ram avaarnatu anngenpei. 30Muli akthouin inlit a antlaannatu insuulseia, muli amaana akrik thirhangta anthlaknanga anthohche mulia anthun pootkhata tuiiboomma amithlakpei. 31Paul in raalmii reijapuui leh raalmiita asonei, “Mahmii inta mulisuunga amnoh eileva, nannih in inkal chekno uchou.” 32Ohchunna raalmii in muli khitna ruikhata antanche amithlakpei.
33Ram avaartumma anmah annaamteta buh ansaaknatu Paul in asonei, “Nannih in jakhatkho saanoh iinnoh a nanngaakna mi insoh nijan somlei manli tihpisa. 34Oirella nannih in saakphu ste nansaaknatu kingenchou; tukhatkho nankangna sam akmal khatkho trilnohtu.” 35Mah i asonche tolta louva anmaikuunga Ringpu ampaak; mahchuta akhoihche saa amithronpei. 36Chunna anaamte anrilta amtrangpeia anmahkho ansaakpei. 37Muli akchuung annaamteva mii reijanih che sopsrihlei kuruk ung 38Anmah in inkhop a ansaaknu a mulina kehuta tuiiboomma anlonche akrikta amijaangpei.
Muli in Aktrang Khuleh Thlisoh Intuuk
39Pekva kini avaar in muli akthouin ramsak romnohsei, chuta tuiiboom apaalla sitsai in sip a anjoolna amunnna jaleva thoureita insuulsei. 40Chunna anmah in akrik thirhangeita tuiiboomma anthlakpei, mah laitalla muli ankhitna ruieita majak a anjaarpuunta thliraang in araannatu ankhitpei che mulita tuiiboom apaalla amithlungpei. 41Chuta muliva sitsai abanga inchuksa, cheva tui adepna a sedolhsa; muli apaal tongkho inchuk a machek janoh a amsa, mahche muli aknungtongkho tuiisolh in akhoihpei, 42simma anthunmii in iroia antlaannohna tuta raalmii in anmahta thatnatu inchaangsei. 43Chuta raalmii reijapuui in Paul ta akalja hangsa, anmah in amidonkha matlohnohsa. Tukhat tuiia iroi atheih khanna mulinata matsah a matjaamma tuiipaalla antlungnatu jathang amlanei, 44onnata in mahmii in muli thingpep chunga che muli akoihna anvuichunga leouva tuiipaalla tlungsei. Nga tloh a annaamte tuiipaalla tlungsei.
Currently Selected:
NOONNA THLOU 27: TARAOBSI
Highlight
Copy
Compare
Share
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
