NOONNA THLOU 28
28
Paul In Melta ah Seh
1Kannih in kthi kanphahsam nata inlit kanphahche, tuiiboom rammingvah Melta antihkha kanrompei. 2Mah khanna mii anrilthrata kanimmuh ung mah chuvah anmah in meitloh a kanikem ung, alamva khusuur amthronpeia ksiksa. 3Paul in thing apulkhat amtlonpeia mei abukpei, mei antruung invah murul inkhat inthruh a akutta ajella inthoia amsa. 4Chunna amah akut a inthoia am murulta anmuh in, anmah in khatleh khat insonsei, “Ril inhalna amnohsa mah i miithat mii, amah in kthi aphahsam tuiiboomnata inlitslakho akchim pichaar in amahta ringa am janohsa.” 5Chuta murulta meisuunga akthinpei che akuunga jakhatkho soknohsa. 6Atakta inthlinga kak hanga intolh a thi usata ngaak a amsei; chuta lai soot a amahta anngaaknua atakchunga reipaksina jakhatkho suuk anmuhnoh invah, anril inthlenga antihpei amahvah rappusa.
7Tuiiboom ramchu kurungming Pablias antihpot aramsoh intonga ramkhat am, amah in kanilohche rilvolla rou kanitloh a nijanthum kanisih ung. 8Nga tloh a suuksa Pablias apata atlunna mahche anap kluunga knasa; chunna Paul in amahta phah a a anche ngenna atakchunga akut sih a amthratpei. 9Mah i asuuk inva tuiiboomma am aktlei akna eikho thlengeia amah in amthratei. 10Anmah in kutthol khalmo kanimlanung; che kannih in mulithoua kanseh samsoh kannihtu darkaar am malisuunga anraangpei.
Melta Nata Rome a Seh
11Thlathum aknua pheipok unaota injih Alexandri na mulikhat a chuunga phalbi suunga tuiiboom chunga sehsung. 12Sirakos ah kantlungche ohkhanna nijanthum amsung. 13Mah khannata inkoia mulithoua Rhejiam ah tlungsung; nikhat kan amche aknua akhutongna thli karaangsa, che nijannih tihpia Puteoli ah thlengsung. 14Amlot unaoei ohkhanna intuuk unga anmahsoh nijan sirih amjounatu kannihta kanikouhpei. Chuche Rome a thlengsung. 15Ohkhanna unaoei in kannih rella Inn Inthum antihkha phah a kannihsoh intuukpinatu thlengsei. Paul in anmahta amuh inva Ringpu ta ampaakpei che aril amtrangpei.
16Kannih in Rome a kanthlengin, Paul vah amahta akngaak raalmii eisoh amjounatu amjapei.
Paul In Rome a Seh
17Nijanthum aknua ohkhanna Judi akchim eita annaamtea Paul in aongei; annaamma anpul in ankuunga asonni, “Unaoeio, keiin inih imiieita chunoh a inih kastamta andah a kitloh thlouvah jakhatkho amnoh, chuta anmah in keita Jerusalem nata simma kansih anga Rome namii veia ankut a kamilanang. 18Anmah in keita minna kanrui anga, keita kamthlahja hangsa, alamva kei kes a anmah in keita tanditloh a thranoh ah kanthlaknatu alam jakhatkho amnoh. 19#Noon 25:11Chuta Judi in mahchuta indahseia, keiin kijatih chunga andah a kitloh jakhatkho amnoh slakho keiva Keisaar kuunga trong kikattu tlasa. 20Chunna mairella nannihta inmuhpinatu che nannihsoh trongnatu kijon peichou, keiin thirhang inluk angi Israel in amituur kharelna.” 21Chunna amahta asonei, “Nangrella Judia tingnata trongjihthuun phahnoh ung, che onna akthleng unaopasa tukhat inkho nangrella thranoh antong mahche antrong nakho amnoh. 22Chuta nangin nimdonchuta nangningnata kanrungeihja; alamva amun naamtena mii in nang nimiieita indah a antrongnavah kantheih.”
23Mahchu nikhatni aminaiche amah in mii kuungah thlengsei. Juktiingnata khulouhram phah a Ringpu huunarel ankuunga maphorh a sonna sakhi amlanei mahche Jisu rella Moses trongthuun nata che ringraanei niriknata amsuullei. 24Mah asonkhanna mii arou inva amilotpei, chuta arou inva malotnohsei. 25Nga tloh a ankaar a khatleh khat injanoh a, Paul in ankuunga trong asonche inthreksei, Paul in ankuunga ason trongchuva: 26“Mahmii ankuunga seh a sonve, nannih in rungaiva nanrungeih taktu chuta tiknikho romnoh uchou, nannih in muhva nanmuhtaktu chuta maromcheknoh uchou. 27Alamva mahmii ei i amidonnatu katalla anril kmongsei, anmah amikur in rungaidahsei, che anmah anmit in ksingsei; chunohleva anmah anmit in anmuh uta, anmah amikur in antheih uta, anril in anrom uta, anmah annatnata kamthratnatu keikuunga inleng tuei ta; 28keiin nankuunga kamromjachou, mah chuvah Ringpu vaa chaanring i Jental jatih a kamthlahpei; anmah in anrungeihtu.” 29Paul in mahtrong chuta asonlai, Judi ei in amahta anmahpei, che anmah ankaar a anroua khalmo klukanga intelsei.
30Kumnih tluunta amah in an amna innkhanna amsa che amahkuunga akthleng annaamta roomthok a aloujapei, 31tukhat inkho thingnoh a che indanglenga Ringpu kurung huunna rella sonna araan mahche Akpu Jisu Khrista rella amtheih ei.
Currently Selected:
NOONNA THLOU 28: TARAOBSI
Highlight
Copy
Compare
Share
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
