ROME Mathronna
Mathronna
Rome Ah Paul Amjih Trongjihthuun in amchaangva Paul in Rome khakla ah asehnatu anlaang i atlungnatu lamveia amjih. Amah in anchaangva Khristen ankaar a jakak thlou atlohnatu chuche anmahta amjoomkhasoh inruuia, Spain a asehnatu. Amah in Khristen malot turella bahab atlak leh Khristen in anringsuunga thlouveia tloh irella thratea matheihnatu amjih. Nirik a Paul vaa mapungpha vei trongraan i injao.
Rome a ak am khaklana miita saambaan amlanche aknua che amah in anmah turella angenkha ason, Paul in amjih trongjihthuun vaa trongpiikung i ason: “Akthra Trongin amdangva khatloh a Ringpu in mii in tlohphu i amahtalsoh amtrim: mah i malot apaalla mathronnata achena phah a vei” (1:17).
Cheva Paul in mah trongpiikung i amliinpei. Mii naamte Judi che Jental annih a Ringpu kuunga chim darkaarsa; alamva inaamte intrimbenga alehvaa tuui athlanga amme. Jisu Khrista malot apaalla mii naamte Ringpu akuunga injasme. Mathanga Paul in invuia ason akthar chaan i Khrista soh inkeih rella mah khanna amuveina Ringpu soh akthar innaina aseempei. Amlot ei in Ringpu soh leh oia amsei che thi leh alehvaa tuui nata Ringpu vaa Li in thlaangthlaang amveipei. Aktong 5—8 a Paul in Ringpu vaa trongsuur leh amlotvaa anchaanna Ringpu Li vaa tuui rellakho invuia ason. Cheva raangroi in khatloh a Judi leh Jental ei in mii turella Ringpu in amchaangkha chapcha tih atrongrui rella ajet. Amah in amchepei mah chuvah Judi in Jisuta indah ei i Ringpu in amchaang saruk khat alamva mii naamteta Ringpu vaa malungsi i phah chekna Jisu Khrista kuunga athlennatu, che amah in amlot mah chuvah Judi in Jisu ta lairel indahnoh usei. Achena a Paul in khatloh a Khristen chaan in ringtuei tihrella amjih, amuveia rilvol alamma aktleisoh inkeihna turelna. Amah in mainang trongpiikung i Ringpu routloh tih a aloh, Khristen in rampii, inkhatle khat che chim chimnoh trongruiva a thloutloh rella amjih. Amah trongjihthuun i amahtuvei trongraan leh Ringpu ta mapaakna tronga amchepei.
Trongmu
Mathronna leh Trongpiikung 1:1–17
Mii in chaanring darkaar anveina 1:18—3:20
Ringpu vaa chaanring lam 3:21—4:25
Khrista ninga akthar chaan 5:1—8:39
Ringpu in amchaanga Israel 9:1—11:36
Khristen hoong 12:1—15:13
Achena khatkho amahtuvei saambaan 15:14—16:27
Currently Selected:
ROME Mathronna: TARAOBSI
Highlight
Copy
Compare
Share
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.