JOHN 7
7
Jisu leh Anaoei
1Maiche aknua Jisu in Kalili a sehsa; amah in Judia a sehnoh, alamva Judi in amahta anthatnatu anjon. 2Pek Judi ei Ramuk buhdoonnakha innaisa. 3#Mak 3:21,31; Met 12:46Chunna amah anao in akuunga anson, “Nangin nitlohthlou ei i niroi inkho anmuhnatu amah aphommi mah a Judia a sehrosa. 4Alamva tukhat in amah atakta mii kuungah marom akdimii in inthup a atloh jakhatkho amnoh. Nangin mah ita nitlohche nitakta tukleiramma madangro.” 5Alamva amah anaotak inkho amahta malotnoh mangei. 6#Met 26:18; Jon 2:4; 7:30Jisu in anmahta asonei, “Keiturel lai ipek thlengnohmang, chuta nannihtu laiva aknirel onna am. 7#Jon 15:18–21Tukleiram invah nannihta nantirh cheknoh ei, chuta amah inva keita kantirh alamva amah athlouva thranoh ta keiin sakhi kamlanrelna. 8Nannihvah buhdoonna khanna sehve; keiva mah buhdoon khanna sehnohtung, alamva keiturel lai tlungnohmang.” 9Mah ita asonche, atakvah Kalili a inmahsa.
Jisu in Ramuk Buhdoonna a
10Maiche aknua amah anao in buhdoonna a ansehnua, amah atakho mii maromnoh a inruk a hangsa. 11Judi in amahta buhdoonna a jonna anson, “Mahmiikha ramchesame?” 12#Jon 7:40–43Miitam ankaar a amah relna chikchakta insosei. Arouin anson, “Amahvah akthra mii khame,” aktlei in anson, “Mahchunoh, amah in miita chimnoh a inhea aching.” 13#Jon 19:38; 20:19Chulata Judi ta antrih rella tukhat inkho amahrella indanga trongnohsei.
14Buhdoonna laita ahanphah in Jisu in mathruunna thlaamma hanga amtheih ei. 15Judi in salungkhoua anson, “Mahmii in tamnoh luunga atheih asingi khatloh a veime?” 16Mahchunna Jisu in anmahta amsangei, “Keiin kamtheihchou i keitanoh, chuta keita kamthlahvaa ata; 17tukhat in amah in amdonta atlohjale, amah in amtheihkha Ringpu tingname chunohle amah akroutu akchek amnehta trongme tihkha atak in aromtu. 18Amah akroutu akchek amneh a trongle amah akroutu paarthrata ajon; chuta amahta amthlah akuungnata paarthrakha jonle mahkha akchim, amahkuunga chimnoh ansoi amnoh. 19#Jon 1:17Moses in nankuunga trongthuun nanimlannoh peime? Chuta tukhat inkho trongthuunkha majuih nohchou. Nannih in keita jarelna keithat reita nanjonangme?” 20#Jon 8:48; 10:20; Met 11:18; Mak 3:22Mii in amisang, “Nangva khousaar chuungsache! Nangta tunang in nakthatreita nakjonme?” 21#Jon 5:2–9Jisu in ankuunga amsangei, “Keiin thloukhat kitloh, mah thlou khanna nannih nannaamte in salungkhoua amchou. 22Moses in nankuunga avun tannatu nanimlan (Mahkha Moses tingnanoh, chuta pa pu tingnasa), che inngeihna aknia nannih in miita anvun nantan. 23#Mak 3:5; Luk 13:12; 14:4; Jon 5:9Moses trongthuunta akoihnoh nahtu inngeihna aknia miita anvun tanchoule keiin inngeih nia mii aknata kamthratkhem rella nannih in keichunga namilung inhaangnohme? 24#Jon 8:15Miisak anna pichaar tlohnohve, chuta akchim pichaar tlohve.”
Mahmii i Misaiah me?
25Alamchunna Jerusalem na mii arouin anson, “Anmah in thatreita anjonkha mahmii inohme?” 26Che onna amah in indanglonga tronga amsa, cheva amahkuunga jakhatkho sonnohsei! “Mahmii i tak a Khrista sa ta anrompeime? 27#Jon 6:42; 7:41; 9:29Chuta Khrista in tik a thlengume, ramnata thlengume tukhat inkho romnoh; chulata amahvah ramnata thlengme irom.” 28#Jon 8:42Chunna Jisu in mathruunna thlaamma amtheih ei, “Nannih in keita nanromang, che ramnata thleng umeta nanromnoh angme? Chuta keiin kichek kamneh roua thlengnoh ang; keita kamthlah amahkha akchimsa, amahta nannih in romnohchou. 29#Jon 8:55; 17:25; Met 11:27Keiinvah amahta kirom, alamva keita kamthlah amahkuung nata thlengsang.” 30#Jon 7:44; 10:39; Mak 12:12; Jon 8:20Chunna amahta suurnatu anjon; chuta tukhat inkho achunga kut thlaknoh mangei, alamva amah apung epekphah thlengnohmang. 31#Jon 8:30; 10:42; 11:45Chulata miitam ankaar nata mii jikcha inva amahta malot a anson, “Mahmii in atloh daang chunga Khrista in athleng laia ralla atloh umang?”
Jisu Ansuurnatu Raalmii Amithlah
32Jisu rella mii khalmo tamin chikchakta insoeita Pharisi in antheihpei, chunna akthloi thiimpu leh Pharisi in amahta ansuurnatu phrangkita amithlah ei. 33#Jon 8:21; 12:35; 13:33; 14:19; 16:16–19Mahlai Jisu in ason, “Keiin nannihsoh kak soot a amjoutung, mahchuche keita kamthlah amahkuunga sehlatung; 34Nannih in keita nanjontung chuta keituuknoh uchou; keiin kiamna a nannih in thlengcheknoh uchou.” 35#Jem 1:1; 1 Pit 1:1; Jon 12:20; Noon 11:20Judi in khatleh khat insonsei, “Inih in tuuk icheknoh natu ram amunna mahmii in sehsam reime? Kriik ankaar a inthek invorh ak am inih mii ankaar a seh a Kriik eita matheihtang atihmeio? 36‘Nannih in keita nanjontung chuta keituuknoh uchou,’ che ‘Keiin kiamna a nannih in thleng cheknoh uchou’, ta amah in atrongi jaknang trongsame?”
Ringna Chaan Amlan Tuii
37 #
Jon 4:10,14 Ujouhoong acheni akthloi nia, Jisu in ngirra rool inkaanga onga trong araan, “Tunangkhat in atuii raalle, amah in keikuunga thlenga iinso. 38Keita amlot amah in, ringjih in asonnanga, ‘Amah arilsuunga akringvaa avaatuii luungtu.’ ” 39#Jon 20:22; 12:23Pek tunangkhat in amahta amlot mii in anphahsam Li kharella ason; alamva Likha malannohmang, mah chuvah Jisu kha paar mathratnoh mang.
Miikaara Inthrek Inbaak Suuk
40 #
Jon 1:21; Met 21:11 Mahtrong chuta antheih in, mii arouin anson, “Amah i tak a ringraansa.” 41Aktlei in anson, “Amah i Khrista khasa.” Chuta mii arouin anson, “Khrista in Kalili nata thlengume? 42#Met 1:1; Luk 2:4Khrista va Davit innsuungna, Davit in a amna khuu Bethlehem nata inthruhta ringjih in asonnohme?” 43Chunna amahrella mii ankaar a inthrek inbaak suuksei 44#Jon 7:30; 10:39Arou inva amahta ansuurja hangsa, chuta tukhat inkho amah achunga kutthlak cheknohsei ak.
Aktloh Akhal Judi in Amahta Amilotnoh
45Anmah in anthlenglaia Pharisi in anlouson, “Nannih in amahta jarella thlennoh choume?” 46#Met 7:28Phrangki in amisang, “Tukhat inkho mahmiinanga trongnoh mangei!” 47Pharisi in ankuunga amisang, “Nannihkho amahnoh lamtinga nanisehpi peime? 48Amahta malotnatu tukhat in nankuungnata nohle Pharisi tingnata akchek amnehtrong inthruhsme? 49Trongsuur romnoh miitamva phool anphahpei.” 50#Jon 3:1,2; 19:39Mah i matsah a Jisu kuunga seh a intuukpi anmah ankaarna Nikodimas in ankuunga asonei, 51“Inih trongsuur nujuih a mii khat in jangthlouta atlohmeta matsah a rungaihnoh maanna miita pichaartloh ajame?” 52Amahkuunga amisang, “Nangkho Kalili na miinohcheme? Majonna anve Kalili nata ringraan tukhatkho inthruhnoh.”
Kupa Laalrella Ansuur Kumei
53Cheva anmah in inn inna inlengsei.
Currently Selected:
JOHN 7: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
