JOHN 8

1Chuta Jisu vah Chorphol muulla hangsa. 2Juktiing inranga amah in mathruunna thlaamma veikhat thlenglasa; mii naamte in amahkuunga thlengsei che amah in inbok a anmahta amtheih ei. 3Ringjih lulok mahche Pharisi ei in kupalaal kumei inkhatta, alaia amingirh 4che anmah in akuunga anson, “Lulok, amah kumei i kupasoh inlaalla amlaitalla kansuurpei. 5Moses trongsuur avah oinang miita lung denna thatnatu kankuunga trongthuun kanimlanpei. Amah kumei irella nang invah jangnisonjame?” 6Amahta janoh a maraal amithlaknatu chaang anna mah ita akuunga anson. Jisu in inkhup a tukleichunga akut majung in amjih. 7Amahta rui ruia an am in, amah in ngirjok a ankuunga asonei, “Nannih nankaar a aleh ak amnohluung miikhan matsah a amahta lung deenso.” 8Che veikhatlakho inkhup a tukleichunga akut majung in amjih. 9Anmah in ohchuta antheih in, anparem nata mathronna inkhat khat a inthrukirsei, che Jisu leh amaikuunga angir kumeikhopta inmahningsei. 10Jisu in intouva anche amahta ason, “Kumeio, ramche seime?” Tukhat inkho nangta namlaalnoh seime? 11Kumei in ason, “Akpu, tukhat inkho keita kamlaalnohsei.” Che Jisu in ason, “Kei inkho nangta namlaalnoh sang; inlengrosa, che veikhat inlenga aleh tlohnohronoh.”

Jisu in Tukleiramtu Akvaar Khasa

12 # Met 5:14; Jon 9:5 # Jon 9:5; 12:35; 1:4 Veikhatla Jisu in ankuunga trong asonei, “Kei i tukleiramtu akvaar khasang; kei kiknu akjuih mii in inthim kaara sehnohtu, chuta akringvaa akvaarkha atak ah amtu.” 13#Jon 5:31–39Mahchunna Pharisi in amahta anson, “Nang nikroutu sakhi namlan; nang sakhi i chimnoh.” 14Jisu in amsang, “Kei kikroutu sakhi malan sanglakho, kei sakhikha chim, alamva keiin ramnata thleng angme mahche ramma sehtungme krom, chuta keiin ramnata thleng angme chuche ramma sehtungme nannihva romnohchou. 15#Jon 7:24; 3:17Nannihva miihoong aknujuih a pichaar nantloh, keiva tukhatkho pichaar tlohnoh ang. 16#Jon 5:30Chulata keiin pichaar tloh angle, kei pichaar tlohva chim, alamva kei kikroua pichaar tlohnoh ang, chuta kei leh che keita kamthlah amahsoh kitlohjou. 17#Met 18:16Nannih trongsuur avah mii innihva sakhi in chimta injihsa; 18Kei kikroutu sakhi kamlan, che keita kamthlah Pa in keitu sakhi amlan.” 19#Jon 14:7Alamchunna anmah in akuunga anson, “Nangpa ram amme?” Jisu in amsang, “Nannih in keikho kei Pakho romnohchou; nannih in keita keiromchoule, kei Pakho nanrom utaning.” 20#Mak 12:41; Jon 7:30Mahtrongi mathruunna thlaamsuung baobeh sihna thlaamma amah in amtheih ei, chuta tukhat inkho amahta suurnoh ei, alamva amahtu laikha tlungnohmang.

Keiin Kisehna a Seh Cheknoh Uchou

21 # Jon 7:33–36 Veikhatlakho anmahta asonei, “Keiin seh usang, che nannih in keita nanjontung, mahche nannih in nanleh a thiuchou; keiin kisehna a nannih in thleng cheknoh uchou.” 22Mahlaia Judi in anson, “Keiin kisehna samma nannih in thleng cheknoh uchou” ta asonni, amah akroua inthatsam meio? 23#Jon 3:31; 17:14; 1 Jon 4:5Amah in ankuunga asonei, “Nannihva athlang nachou, keiva achungna ang; nannihva tukleiram nachou, keiva tukleiram nanoh ang. 24#Jon 8:28; 4:26; 13:19; Mak 13:6Keiin nannihta kisonchou mah chuvah nannih nanleh khanna thiuchou, alamva nannih in keita amahsa ta kamlotnoh choule nannih nanleh khanna thiuchou.” 25Amahta anson, “Nangi tunangcheme?” Jisu in anmahta asonei, “Matsah nata keiin nankuunga kisonkhasa. 26Keiin nankuunga khalmo kisontuphu mahche pichaar kitlohnatu tam am; chuta keita kamthlah amahkhavah chim, keiin amahkuung nata ktheihta tukleiramma indanga kisonpei.” 27Pa rella anmah kuunga kitrongkha anmah in lou theihnohsei. 28#Jon 3:14; 12:32Chunna Jisu in ason, “Nannih in miiva Asa kupa khata nandomlai akhanna kei i amahsang ta nanrom umang, keiin kichek kamneh khanna jakhatkho tlohnoh ang, chuta Pa in keikuunga kamtheih khata nga tloh a trongsang. 29Che keita kamthlah amah in keisoh amjou, keita kikroua keimahnoh, amahta mapelnatu lai amrel keiin thlou kitloh.” 30#Jon 7:31; 10:42; 11:45Amah in nga tloh a trongsa, che miitam in amahta amilotpei.

Thlaang thlaang mii Khatkho Naichi

31 # Jon 15:7; 2 Jon 1:9 Amahta amlot Judi kuunga asonei, “Nannih inta kei kitrongah injommata amchoule, atatak a nannihva kei kiroisachou, 32#2 Kor 3:17; Kal 5:1che nannih in akchimkhata nanromtu, mahche akchim khanna nannihta thlaang thlaang nanimveitu.” 33#Met 3:9; Luk 3:8; Kal 3:7Anmah in akuunga amisang, “Kannihva Abraham atuteung, chunna kannihva tunangkhat miivaa naichi louveinoh mangung. Mahchuta khatloh a ‘Nannihva thlaang thlaang mii veiuchou,’ ” ta nakson ungme?

34 # Rom 6:16; 2 Pit 2:19 Jisu in ankuunga amsangei, “Keiin nankuunga a tak a kisonchou, tunangkhat alehthlou aktloh miiva alehvaa naichisa. 35#Kal 4:30Naichi in inna ache amnoh a amma relnoh; asa kupa vaa ache amnoh a am. 36Chunna Asa kupa inta nannihta ningtamna nanimphahle, nannih in atatak a aningtam mii vei uchou. 37Nannihva Abraham atutechouta krom; chulata nannih inva keita thatreita nanjonnang, alamva kei kitrongi nanrilsuunga amnatu aphom amnoh. 38Keiin Pa kuungnata kimuh kimuhkhata trongsang, che nannih inkho nanpa kuungnata nantheih nantheih khata nantlohpei.”

39Anmah in akuunga amisang, “Abraham vah kannih kan pa.” Jisu in ankuunga asonei “Nannih inta Abraham asa veichoule, Abraham in atlohthloukha nantloh tupotsa, 40chuta Ringpu tingna akchimta theih a nannih nankuunga akson keita, ipekva thatnatu nanjonnang; Abraham va mainangi tlohnoh. 41Nannih nanpa in atlohthlouta nannih inkho nantloh.” Anmah in akuunga anson, “Kannihva kumei kupa inlaalla pok miinoh ung, kannih kan Pa inkhat am, mah chuvah Ringpu sa.” 42#Jon 13:3; 16:28Jisu in ankuunga asonei, “Ringpu ta nannih nan Pa maveichoule, nannih in keita nanrilvol tupotsang, alamva keiin Ringpu nata inthruh a thlengsang; kei kikrou kichek kamneh a thlengnoh ang, chuta amah in kamthlah ang. 43Keiin nankuunga ksonni jarelnaru lou theihnoh sachoume? Mah i jarelname tihva nannih in kei kitrongta rungai cheknohchou. 44#1 Jon 3:8,15; 2:4; Met 12:34Nannih nanpa seitan vaa atasachou, che nanpa in akditta tloh i nannih in namidon khasa. Amahvah akungnata mathronna miithat mii, amahkuunga akchim atlohnatu amnohluung, alamva amahkuuga akchimluung amnoh. Amah in amchinthivaa atronglaia, amah atak a am anono khata trong, alamva amahvah amchinthi, che amchin apasa. 45Chuta keiin nankuunga akchimkhata kisonrel, nannih in keita kamlotnohchou. 46#1 Jon 3:5; Jon 18:37Nannih nankaar a keita alehchel namithlaknoh angme? Keiin akchimta am angle, jarella kamlotnoh choume? 47Ringpu ata akveimii in Ringpu trongson arungeih; jarelna, nannihva Ringpu atanohchou churella Ringpu atrongta rungainohchou.”

Jisu Khatkho Abraham

48 # Jon 7:20; 10:20; 4:9 Judi in amahkuunga amisang, “Nangva Samaria na mii che chuche khousaar chuung miicheta nikuunga kansonni chimnoh ungme?” 49Jisu in amsang, “Keiva kousaar chuung noh ang; chuta keiva Pa ta injah ang, nannih inva keita kanjahnoh chou. 50Chuta kei kikroutu paarthratna jonnoh ang; mahchuta onna akjon Mii khat am amah in pichaar atlohtu. 51Keiin nannihta taktak a kisonchou, tunangkhat in kei kitrongta ngaak a majuih choule, mahmii khavah tikniakho kthi muhnohluung usa.” 52Judi in amahta anson, “Ipek inih in irompei mah chuvah nannihva khousaar chungsachou, Abraham in thisa, ringraankho thisei; chuta nangin nisonva, ‘Tunangkhat in keitrong ngaak a majuihleva, amah in kthi tiknikho matemnohtu.’ 53#Jon 4:12Kan pa Abraham athihche nuaa nangin liinsacheme? Ringraankho thisei! Nang nikrouta tu angmeta insooncheme?” 54Jisu in amsang, “Kei kikrouta paarthratna mavei angle, kipaar thratna i jakhat khonoh; keita paar kamthratva nannih in Pa ta nan ong keipa in paar kamthrat ang. 55Chuta nannih inva amahta romnohchou; keiinva amahta krom. Keiin amahta romnoh angta sonangle, keikho nannih nanga chinthi veisang; chuta keiva amahta krom churella amah atrongta ngaak a kamjuih. 56#Met 13:17; Hib 11:13Nannih nanpa Abraham in kei kiknita kmuhtu ta aroomthok; amah in ohchuta amuh a aroomthoksa.” 57#Jon 2:20Mahchunna Judi in akuunga anson, “Nangva kum sopngakho phahnoh mangche, che nangin Abraham ta nimuhpeime?” 58#Jon 1:1; 17:5,24Jisu in asonei, “Keiin nannihta taktak a kisonchou, Abraham apoknoh maa a kei louamsang.” 59#Jon 10:31; 11:8Chunna amahta andennatu lung anchunpei; chuta Jisu vah inthupsa, mahche mathruunna thlaamnata inthruhsa.

Currently Selected:

JOHN 8: TARAOBSI

Highlight

Copy