LUKE 14
14
Jisu in Akna Miikhatta Amthrat
1 #
Luk 7:36; 11:37; Mak 3:2 Sabatni inkhat a Jisu in buh asaaknatu rampuui inkhat Pharisi inna sehsa, chunna anmah in Jisu ta jih a amsei, 2Anve, Jisu maikuunga inthlinga kana mii khat am. 3#Met 12:10; Mak 3:4; Luk 6:9Mahchunna Jisu in ukil leh Pharisi ankuunga aruiei, “Sabat nia akna mathrat i tlohphume, chunoh a tlohphunohme?” 4Chuta anmah in rimta amsei, cheva amahta matuh a alohche mathrat a amsehpei. 5#Met 12:11; Luk 13:15Che ankuunga asonei, “Tunangkhat nansa kupata nohle nansiilchal khatta sabat nia kuha a tlale, sabatni slakho kak hanga aklounohtu tu amchoume?” 6Mahchuta anmah in masang cheknohsei.
Inruruh Khatkho Atakta Maliinnoh
7Kouhna a akthlengei in injahna phomma inboknatu anchar rella amah in pandam khat malanna asonnei, 8#Luk 11:43; 20:46“Tunangkhat in changvaang buhdoonna a nangta nakkouh eile, injahna phomma inboknohro, tunang arom amah in nangchung ralla injahna veimii akouhchekho aja; 9amah in nangkuunga thlenga nakson aja, ‘Mah injahna phom i mahmii ita mabokro,’ chunna athlangtla injahnanoh phomma nangin inlenna inbokha nikuunga injakna veitu. 10Chunna nangta nakouh eile, athlangtla injahnanoh phomma inbokro, che nangta nakouh innpuin nakmuhlai nakson aja, ‘Ruullo, injahna phomma kalla inbokro;’ chuleva nangsoh nanbokpijou naamte anmaikuunga nangta nanjahna veitu. 11#Met 23:12; Luk 18:14; Met 18:4; 1 Pit 5:6Alamva tunangkhat atak anroua amliinja mii khata inruruh amveitu, che tunangkhat atak anroua inruruh akveikhata amliintu.”
12 #
Jem 2:2–4
Che amahta akkouh mii khata ason, “Nangin mii buh namsaaknatu nohle buh nidoonnatu tlohchele, niruul nipaiei nohle ni uh ninaoei nohle nisakheiei nohle nanthringpi akdoon eita kouhnoh eiro, tunang arom, anmah inkho nangta veikhat nakouh a inlenga naksiin aja. 13#Luk 14:21Nangin buhdoon cheleva, anran anring, ankeh ankut miipuhnoh ei, mitchoei mahche marnop eita kouh eiro, 14chunna nangin doiphah veiuche, alamva anmah in nikuunga naksiin cheknoh tuei. Akchimlamseh ei in veikhat anringlaia Akpu in nang nilaiman nanksiintu.”
Ujouhoong Pandam
(Met 22:1–10)
15 #
Mad 19:9
Amahsoh inruuia tebor a anbokpijou inkhat in ohchuta atheih in, amahkuunga ason, “Ringpu kurung huunna a tol saa akphahsam anmahkha doiphah veisei.” 16#Met 22:1–10Chuta Jisu in akuunga ason, “Mii inkhat in ujouhoong veikhat atloh, chunna amah in miitam akouh ei; 17mahlai achunna ujouhoong turella akouh mii in anthlengnatu amah roijuihta mathlah a am ongei, ‘Thlengvesa, anaamte athlouraang chekirsa.’ 18Chuta anmah naamtein ril inkhatnanga anthlengnoh natu son amithronpei. Matsahna in amahkuunga ason, ‘Keiin lou inkhat kiklei, mahchuta seh a antang; keiin kingenche kei iprosa.’ 19Mahchuche aktlei inkhat in asonla, ‘Keiin siilchal aklang ranga kiklei, che keiin anmahta thranoh thra anmaantang; keiin kingenche kei ipro.’ 20#1 Kor 7:33Mahchuche aktlei inkhat in asonla, ‘Keiin kumei khat changvaanga kilohpekmang, chunna thleng cheknohsang.’ 21#Luk 14:13Chunna roijuih in thlenga amah akpukuung atongpei. Mahlai achunna innpuin amlung inhaanga roijuihta asonei, ‘Khuboomvaa ram anrol anrolla mahche, lamsuh lamsuh a intha seh a inran inriing, marnop mitcho mahche ketlik mii eita onna thlenve.’ 22Mahchu roijuih in kitlohpei chuta ipekkho inboknava ammang 23Mahche Akpu in roijuihta ason, ram anrol anrolla, lamsuh lamsuh a seh a keiinn asipnatu anmahta thlengnoh janohta sonna mathleng eive. 24Alamva keiin nannihta kitihchou kouh akphah mii tunangkhat inkho kei ujou hoongna buh aktui matemnoh tuei.”
Aroi veina Aman
(Met 10:37–38)
25Mahchuche aknua mii khalmo tam in Jisu soh inruuia sehsei. Che Jisu in inheia ankuunga asonei, 26#Met 10:37–38“Tunangkhat in kei kiknuta juihtang tihle anu apa, akmei asa, auh anao, asar ajuur, oi, amah ataktal luungkho intirh hangnoh leva amah in kiroivei cheknohtu. 27#Met 10:38; 16:24; Mak 8:34; Luk 9:23Amah thingkharhta phurhnoh a kiknu keijuihnoh amahkhan kiroivei cheknohtu. 28Alamva nannih nankaar a tunangkhat in inn inkaang tlohtang madonle mahchuta machekhem acheknatu matsah a inbokmaanna akluutsam huutnoh maan ume? 29Tunang in arom, amah in innmun amthronche mache acheknoh khanna ak anmii annaamte in 30mahmii i inntlohva amthronpei chuta mache cheknohsa ta amahta manuih hou aja. 31Chunohle tunangkhat kurung in aktlei kurung inkhatta raal intlohpitang madonle, amah raalmii akpulsom in amah jekna raalmii akpul sopnihta raal antlohpichek umeta matsah a inbokmaanna huutnoh ume? 32Raal intlohpi cheknoh tupotle raal asuuknoh maa a trongtloh mii mathlah a injana thlenna leh oi amnatu atlohtu tla khame. 33#Luk 18:29–30; Phil 3:7Alamchunna chunanga nannih nankaar a tunangkhat in amah in asihnaamte mathlahnoh miikhan kiroivei cheknohtu.”
I huuinanoh Machih
(Met 5:13; Mak 9:50)
34 #
Met 5:13; Mak 9:49–50; Met 11:15 “Machih i thra, chuta amah a alkhata maangleva, khatloh a imtui ume? 35Mahchu tuklei turelkho haar turelkho akanana amnohsa, mii in ilon uningsa. Tunangkhat in arungeihnatu amkuur am miikhan rungaiso.”
Currently Selected:
LUKE 14: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
