LUKE 15
15
Akmaang Sadam
(Met 18:12–14)
1 #
Luk 5:29–30; 19:7 Ipek roithrai khatkho alehchelei in amahkuunga innaisei. 2Cheva Pharisi khatkho ringjih lulok eiin inso a ansonpei, “Mahmii in alehchel eita louja a anmahsoh buh ansaakjou khame.”
3Chunna mah pandam ita ankuunga asonei: 4#Met 18:10–14“Nannih nankaar a mii inkhatva sadam reija asihnata inkhat amaang in, raprilla sopkulei ku ta mah a akmaang khata aktuuk nohmiil akjonnohtu mii tunang amchoume? 5Che mahchuta aktuuk in aroomthok a adaar a athongpei. 6Amah inna athlengin, amah aruul apaita che anthringpi eita onga asonei, ‘Keisoh roomthok jourei, alamva kei sadam akmaangkha kiktuukpei.’ 7#Jem 5:20; Luk 19:10; 15:10Chunanga keiin nankuunga kisonchou, oinang jimma rilthlengnoh kananoh mii sopkulei kunata alehchel mii inkhat in ril athlengrella ringram a roomthokna veitu.”
Akmaang Baobeh Apum
8“Chunohle kumei khat in harngou apumsom asih, mahsuunga apumkhat maangle, amah in meiser taar a mahchuta aktuuk nohmiil inn thra thir a jonnohrei ume? 9Mahchuta aktuuk in, amah aruul apaiei mahche anthringpi eita onga asonei, ‘Keisoh roomthok jourei, alamva keiin kammaang haarngou apumkha kiktuukpei.’ 10Chunanga keiin nankuunga kisonchou, oinang jimma rilthlenga alehchel mii inkhatrella Ringpu vaa ringroi anmaikuunga roomthokna veitu.”
Akmaang Asa kupa
11 #
Met 21:28
Mahche asonei, “Asa kupa innih doon mii khat am; 12anmah ankaarna maksi in apakuunga ason, ‘Pa o, nangin nidoon nikhaal suunga keiin kichangtu khaan kamlanrosa.’ Cheva amah alalchu anmah innih kuungah asempei. 13Nikhat ninih aknua, asa kupa maksi in achangkhaan naamte amtlonche, khalmo klah rapkheitla khuuboom khat ah sehsa, ohkhanna akanana amnoh a adoon naamte ahuuinapei. 14Amah in adoon naamte amthangkir cheva, mah ramboom achunna khalmo lahna buhchaal suuksa, che amah in avaatna thlengsa. 15Cheva ramboom achunna am mii khat kuunga aringnatu luut a amsa, innpuin amahta louva vokthlai akpe akseltu amthlahpei. 16Mahcheva vokthlai ansaakna a amahkho avon amvah jahangsa; tukhat inkho akuunga saakphu malannohsei. 17Chuta atak akroua arilla insonsa, ‘Keipa in mii chahchah tam thlou matloh a amah roijuih in inleisolh a saa iin anphah, chuta keiin onna traamkrel, dongkrella amsang! 18Keiin inthoua pakuunga sehtang, che pakuunga kisontu, “Pa o, keiin ringram mahche nangta jekna veia alehthlouta kitlohpei; 19Kei i nisakupa angta ong matik chanoh sang; nangin thlou namtloh niroi ei inkhatnanga keita keiloua keihuuina rosa.” ’ 20Cheva amah in inthoua apakuunga thlengsa. Chuta amah in intonga inlabeb a athlenglaia, apa in amuh a aringvol hangsa, cheva inthademma tlaanna amahta konna amchohpei. 21Mahchunna Asa kupa in apakuunga ason, ‘Pa o, keiin ringram mahche nangta jekna veia alehthlou kitlohpei; Kei i nisakupa angta ong matik chanoh sang.’ 22Chuta amah apa in aroieita asonei, ‘Akthrarem puunrei intha thlenna, amahta masilhve; akut a kutsi maneihve, che akeh a kehkhraang machuungve; 23mahche siilte annou thlenna thatve mahchu saa a roomthok jourei; 24#1 Tim 5:6; Eph 2:1; Luk 9:60alamva amah kisakupa i thinata inlengsa; amah in maangcheta, inlenga kiktuukpei.’ Cheva anmah in roomthok amithronpei.
25“Ipek asa kupa anpa in louva am; amah in inntonga thlenga inn anailai, amah in laa hoileh laamhou atheihpei. 26Chunna roijuih ankaar nata inkhatta onga mahchu jarelna meta arui. 27Chunna amah in ason, ‘Nang ninaokha thlengsa, chunna nipa in ninao kupata nanoh saanoh a ringa aphahrelna siilte annouta athatpei.’ 28Chunna amah in amlung inhaanga luut indahsa. Apa in inthruh a amahta amnem, 29chuta apakuunga amsang, ‘Anro, vachah soot kumsuunga nangta rou kitlohche, keiin nitrongson kamjuihnoh jakhatkho amnoh; kiruul kipai eisoh roomthok jounatu nikhatnikho siiltekhat rounakho kamlannohche. 30Chuta nisakupa in kochanoh miisoh inruuia nilal amthangche athlenglaiva, nangin amahturel siil annouta nithatpei!’ 31Mahchunna apa in akuunga ason, ‘Kisakupa o, nangva keisoh anirel amjoume, che keiin kisih anaamte i nangtaning. 32Chunna inih in tlanna iroomthoktal tupotsa, alamva ninao iva thinata kiringsa, che maangnata iktuukpei.’ ”
Currently Selected:
LUKE 15: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
