LUKE 19

Jisu Leh Jakhias

1 # Mak 10:46 Jisu in Jerikho aluutche vanna sehsa. 2Mahchunna akming Jakhaias an ong kupakhat am; amahva akthloi roithrai mii, che kdoon mii. 3Che amah in Jisu tumeta a annatu insuul, chuta mii tammal khanna muh cheknohsa, alamva amahvah arep innim. 4Chuna amah in Jisu ta amuhnatu tatthei achunga kalsa; alamva mahlam tonga Jisu in thlengsam. 5Che Jisu in mahtonga athlenglai, amahta intoua anche ason, “Jakhias, intha a trumro; alamva mi invah nang inna tlungtu tlasang.” 6Chunna amah in intha trumma Jisu ta roomthok a aloulohpei. 7#Luk 5:29–30; 15:1–2Cheva mahchuta anmuh in annaam insoa trongsei, “Amah in alehchel inna rapkheikhat veia atlungnatu luutsa.” 8#Luk 7:13; 3:14Chunna Jakhias in inthoua Akpu kuunga ason, “Anro, Akpu, keiin kdoon tangkhaiva anrankuunga kamlanei, che keiin tunangkhat antata chimnoh a louangle saruk manli kamlengei.” 9#Luk 3:8; 13:16; Rom 4:16Mahchunna Jisu in akuunga ason, “Mi in mah innsung inna chaanring thlengsa, amakho Abraham vaa asa kupasa. 10#Met 18:11Alamva miiva Asa kupa in akmaang khata jonnatu mahche kalnatu thlengsa.”

Ra–ao Pumvaa Pandam

(Met 25:14–30)

11 # Met 25:14–30; Luk 9:51; 13:22; 17:11; 18:31; 9:27 Anmah in trong ita anrungeihlai, anmah kuunga pandam khat asonei, alamva amah in Jerusalem innaisa, mahche Ringpu vaa kurung huunna kak hanga indang usata anmah in amidon 12#Met 25:14–30; Mak 13:34Alamchunna amah in ason, “Phom inkaanga akpuui inkhat in kurungram aphahnatu khalmo ramlah ramboom inkhat a asehche, inlengsa. 13Amah roijuih somta aongche, ankuunga mina som malanna asonei, ‘Keiin kithleng nohmiil mah mina in malat a thrulhnave.’ 14Amah aramna mii in amahta intirh eia amah aknua trongphurhmii mathlah a anson, ‘Mahmii in kanchunga akpu veia paal dinoh ung.’ 15Amah in kurungramta aphahche inna anlengin, anmah in malat a anthrulnakha jikcha amichuung peime anromnatu, inbaobeh amlanna mii eita amahkuunga anthlengnatu am ongpei. 16Matsahna in amaikuunga ason, ‘Akpu, nang mina inkhat khanna mina som kamchuungpei’ 17#Luk 16:10chunna amah in akuunga ason, ‘Thra nitlohpei, akthra roijuih! Nangin thlou indihte a malot aja niveirella, khuuboom somchunga akchek amneh veirosa.’ 18Innih tihpi in thlenga ason, ‘Akpu, nang mina khanna mina ranga kamchuungpei.’ 19Che amah in akuunga ason, ‘Nangin khuuboom ranga chunga akchek amneh veirosa.’ 20Che aktleikhan thlenga ason, ‘Akpu, nang minakha maisa, keipuun apaara khit a kisih; 21alamva nangva karaang mii che, churella nangta niktrih ang; nangin nisihnoh pootta niloh, che nangin nivorhnoh pootta niluh.’ 22Amah in akuunga ason, ‘Nang nibaoa anthrutal khanna keiin kamlaal uche, thranoh roijuih! Keiin kisihnoh khata kiloh mahche keiin kivorhnoh khata kiluh ta nangin nirompei? 23Chuleva jarella kei baobehkha baobeh sihna thlaamma sinoh cheme, keiin kithlenglai mahkha akchuungsoh inruuia kamtlon uta.’ 24Chunna akomma akngir eita asonei, ‘Amahkuunga mina somkha loua mina som ak amkuunga malanve.’ 25(Chuta amahkuunga anson, ‘Akpu, amahta mina som amchesa!’) 26#Met 13:12; Mak 4:25; Luk 8:18‘Alamva keiin nankuunga kitihchou, mah chuvah ak am mii kuungah ralla kamlantu, chuta ak amnoh mii kuungnata amah in ste asihkhakho kilohtu. 27Keiin anmah anchunga akpu veia kipaallaia keijekna eita onna keithlenve che anmahta kei maikuunga that eive.’ ”

Raalchek a Jerusalem a Luut

(Met 21:1–11; Mak 11:1–11; Jon 12:12–19)

28 # Mak 10:32 Chunna amah in trongi asonche aknua, matsah a seh a Jerusalem phah a hangsa. 29#Met 21:1–9; Mak 11:1–10; Jon 12:12–18Amah in Chorophol Muulsoh innaia am Bethphake mahche Bethani annai in, aroi ankaarna innihta sonna amthlah ei. 30“Nanmaa a am khuusonna sehve, che nannih in mahchunna naluutlai tukhat inkho achuungnanoh samong ate inkhat inkhit a am nantuuktu, mahkha majak a onna thlenve. 31Che anmah in mai jarelna namijakmeta nanirui eile, nga tloh a sonve, ‘Akpu in maita darkaar am.’ ” 32#Luk 22:13Chunna amah in amthlah mii in seh a Jisu in ankuunga asonnanga antuukpei. 33Che anmah in samong ateta amijaklai, samong akpu in ankuunga asonei, “Jarelna nannih in samong ateta namijakme?” 34#Luk 7:13Chunna anmah in anson, “Akpu in maita darkaar am.” 35Che mahchuta Jisu kuunga anthlenpei, samong atechunga anmah anpuun thah a Jisu ta amichuungpei. 36Amah in chuunga aseh in, anmah anpuunrei lamma anlouthah. 37Pekva amah in akchek amneh a atlohthlouta anmuh in rool inkaanga onga Ringpu ta mapaak amithronpei, 38#Luk 13:35; 2:14“Akpu minga akthleng kurungkha doiphah veisa! Ringramma leh oi khatkho anaamtetu ralla ankaanga mapaak!” 39#Met 21:15–16Che miitam ankaar a Pharisi arouin amahta anson, “Lulok, niroita saaleiro.” 40Anmahta amsangei, “Keiin nankuunga kitihchou, anmah inta rim amseile, lungin ongusei.”

Jisu in Mathruunna Thlaam Amseeng

41 # Luk 13:33–34 Jisu in Jerusalem annai in khuupiita heianna mahchurel trap a ason. 42“Nangin mi in nangtal in leh oi niveirel thloukha romcheleva! Chuta ipekva nimit annata mahchu inthup a ammang. 43#Luk 21:21–24; 21:6Alamva nichunga oinang aknichu thlengtu, mah chuvah nang jekna mii in nangta kooi a paaltuei, che nangta inhiilla aram ramna mii naamte in nangta nankhaartu, 44#1 Pit 2:12Cheva nangleh nang nisa naamteta tukleia antuul usa. Che nangva asuunga lung inkhat in inkhatva achunga anmah in sinoh usei; alamva nangta nak an kithlenglai romnohche.”

Jisu in Mathruunna Thlaamma Seh

(Met 21:12–17; Mak 11:15–19; Jon 2:13–22)

45 # Met 21:12–13; Mak 11:15–17; Jon 2:13–17 Cheva amah in mathruunna thlaamma luut a, pootchei akjuurmii eita manom mathronna, 46asonei, “Mah i injihsa, keiinvah ngenna inn veitu, chuta nannih in mahchu inru inraanva akon namiveipei.”

47 # Mak 11:18; Luk 21:37; 22:53 Amah in mathruunna thlaammma aknirel amtheih ei. Akthloi thiimpuei, ringjih lulok ei che aklokmii ei in amahta mamaangnatu anjon; chuta anmah in antlohja antlohnatu amahta anjonta tuuk cheknohsei, 48chuta anmah in antlohja hangkha antlohnatu tuuknoh ei, alamva mii naamtein amah atrongkhanna inbeisei.

Currently Selected:

LUKE 19: TARAOBSI

Highlight

Copy