METHIU 13
13
Chivorh Pandam
(Mak 4:1–9; Luk 8:4–8)
1 #
Mak 4:1–9; Luk 8:4–8; 5:1–3 Mahnital achunna Jisu in inn nata inthruh a tuiiboom komma inboksa. 2#Luk 5:1–3Che miitam in akuungah inlomma inchunsei, chunna amah in muli inkhat suunga luut a inboksa; che miitamvah tuiiboom apaalla ngirra amsei. 3Che amah in pandam jikcha tloh a ankuungah sonei, “Mii khat in chi avorhnatu sehsa. 4Che chi avorh in chi arouva lamkomma tla, cheva va in thlenga anchunpei. 5Arouin lungkaara tla, mahchunna philtam amnoh a intha moongei alamva tukleisuungah tluumma luutnoh, 6chuta kini in ansat in kaangsei; alamva akjung amnoh a chaarsei. 7Che arouin kuling kaara tlaei, che kuling in moonga ahipkirpei. 8Chuta aktleiva akthra leipiia tla a akrah khalmo inrahsei, che arouin ahuum inkhat ah ahuum reija, arouin sopruk, che arouin sopthum inrah. 9Tunangkhat in aroungeihnatu amkuur a am miikhan rungaiso.”
Pandamvaa Artha
(Mak 4:10–12; Luk 8:9–10)
10 #
Mak 4:10–12; Luk 8:9–10 Che aroiin amah kuungah thlenga ansonpei, “Jarelna ankuungah pandam veia trongcheme?” 11Jisu in amsangei, “Ringram huunna anthuptrong nanromnatu nankuungah mah i kamlanpeichou, chuta anmah ankuung avah malannoh angei. 12#Met 25:29; Mak 4:25; Luk 8:18; 19:26Alamva tunangkhat tam aksihkuungah kimlan mahche amah in ralthloia asih, chuta tunangkhat aksihnoh kuunga malannoh ang, chunna amah kuungah ak am khakho kilohtu. 13Churella ankuungah pandam veia trongsang. Alamva anmah in muhre rea muhnoh ei, theih rerea rungainoh ei, che lou theihnoh ei. 14#Mak 8:18; Jon 12:39–41; Noon 28:26–27Ringraan Isaiah in asonkha anmah ankuungah tlungsa mah chuvah: ‘Nannih in tak a rungaivah nanrungeihtu chuta lou theihnoh uchou, che muhvah nanmuhtu chuta romnoh uchou. 15Alamva amah anril i kitalsei, amikuur trangsei, che anmah anmit insiinsei, anmah anmit in muh ah, amikuur in rungaia anrilla amiluutche inhei tupotei. Chuleva anmahta keiin kamthrat tupotei.’
16 #
Luk 10:23–24; Jon 8:56; Hib 11:13; 1 Pit 1:10–12 “Mit a akmuh mahche makuur in aktheih eikha doi akphahsei. 17Alamva keiin nannihta atak a kisonchou, mah chuvah ringraan mahche akchimlamseh in nannih in nanmuh ita muh andit chuta muh phahnohsei, che nanrungeih ita rungai andit chuta rungai cheknohsei.”
Chivorhta Invuia Matheih
(Mak 4:13–20; Luk 8:11–15)
18 #
Mak 4:13–20; Luk 8:11–15 “Chunna chivorhna pandam i rungaive. 19Tunangkhat in kurung huunna trongta arungeih in rom acheknoh invah, akthranoh khatin thlenga arilsuunga avorhta sut a atlaanpei; mah chi akphah i lamkomma aktla chikhasa. 20Chuta lungkaara aktla chi in trong arungeihche intha a roomthoksoh inruuia arouloh; 21chulata akjung thuuk a tlanoh, churel kakruta adouning, alamva klah knang mahche trong irella inchut jikcha athlenglai amahningvah intha a aningdongna veisa. 22#Met 19:23; 1 Tim 6:9–10,17Pekva kuling kaara chi aktla in trong atheihche tukleiramma ringnaleh doon khaalna rilkhanna trongkhata akrah marahnohsa. 23Chuta akthra leipiia aktla chikhanna trongkhata arungeihche arom. Chunna athloua akrah inrah arouin reija, arouin sopruk, mahche arounin sopthum amsuuk.”
Inlou Kaarna Kihuvaa Pandam
24 #
Mak 4:26–29
Jisu in aktlei pandam daak a ankuungah asonei; “Ringram huunna i louvah akthra chivorh miikhatsoh amlak; 25chuta mii in an ihsuunga amah jekna in thlenga kihukaara inlouchi vorh a amahche inlengsa. 26Chuta chi in moonga anrollai, inloukho indangsa. 27Chunna lou Akpu vaa roijuih in amah kuungah thlenga ason, ‘Lulok, nanglouva akthra chita vorhnoh cheme? Che khatloh a inlouchita moongseime?’ 28Amahta ason, ‘Mah i jekna mii khat in atlohpei.’ Chunna amah roijuih in akuungah ason, ‘Chuleva kannih in seh a inlouta phoia matlonnatu nakson ungme?’ 29Chuta amah in asonei, ‘Ah, inlou nanphoi namitlonlai kihukho jaoa inphoitu.’ 30Chi luhnohmiil moongeiso! Chiluh aphahlai akvaat aksirmiita kisontuei, matsah a inlouta matlonna meia nanhaalnatu akhuh a kaanve, chuta kihuva kei tomsuunga bunve.”
Intrammuvaa Pandam
(Mak 4:30–32; Luk 13:18–19)
31 #
Mak 4:30–32; Luk 13:18–19; Met 17:20 Amah in aktlei pandam ankuungah malanna asonei, “Ringram kurung huunna i intramchita mii khat in alohche avorh khanangsa; 32Mah i chi anaamte kaara andihrem, chuta amoong laiva aktlei inlouchung inrolh che thing veisa, mahche marvaanna va in thlenga abaak ah anbu antloh.”
Chol Pandam
(Luk 13:20–21)
33 #
Luk 13:20–21; Kal 5:9 Amah in ankuungah aktlei pandam asonei, “Ringram huunna i kumei khat in chol adih kutrop inthumta buh stesoh anamnohmiil ampolh nangsa.”
Jisu in Pandam Ahuuina
(Mak 4:33–34)
34 #
Mak 4:33–34; Jon 10:6; 16:25 Mah naamte i Jisu in miitam ankuungah pandam veia trong, pandam jaonoh a amah in ankuungah trongnoh. 35Mah i ringraan in asonkhata atlungnatu relnasa, mah chuvah: “Keiin pandameita kisonnatu kbao aangtung. Tukleiram amthron lainata mathup a asih eita keiin kisontu.”
Anthup Lalvaa Pandam
36Cheva Jisu in miitamta mathlah a inn khat ah luutsa. Che aroi in amahkuunga thlenga anson, “Louna inlou pandamkha invuia kanimtheihro.” 37Anmahta amsangei, “Akthra chita akvorhkha miivaa Asa kupasa; 38#Jon 8:44; 1 Jon 3:10louin tukleiramsa, che akthra chi in kurung huunnavaa asa kupasei; inlouin akthranohvaa asa kupasei, 39inlouchi akvorhkha seitansa; akvaat aksir in tukleiramtu achenasa, mahche akvaat akluh in ringroisei. 40Chunna inlouta matlonna meiah haal khananga nga tloh a chupkha achena ah veitu. 41#Met 24:31Miivaa Asa kupa in amah ringroita amthlahtuei, che aleh ah tlaakna khatkho thranoh aktloh eita amah kurung huunna amunnata amtlontuei, 42#Met 13:50; 8:12; 22:13; 24:51; 25:30; Luk 13:28che anmahta kthih amnoh meimunna anthlaktuei; mahchunna traptruuia anha amikettu. 43Che akcimlamseh miiva anmah anpa kurung huunna ramma kini nanga intle usei. Tunkhat arungeihnatu amkuur am miikhan rungaiso.”
Inthup Lalvaa Pandam
44“Ringram huunna i lou inkhat ah inthup a am, mah chuvah tunangkhat in aktuukche veikhat mathup a asih lalnangsa; che amah in aroomthok rella seh a adoon naamte ajurhche lou inkhat aklei.
Antle Mukta vaa Pandam
45“Veikhatlakho, ringram huunnava kthra mukta inkhat jonna akjuur miinangsa, 46Amah in amantam muktakhat aktuukche seh a adoon naamte juura achuungnatu amlatmii nangsa.
Toro vaa Pandam
47 #
Met 13:40–42
“Veikhatlakho ringram huunnavah tuiiboomma toro denna alamtanga nga imtlon nangsa; 48toroin asiplai ngaman mii in tuiipaalla toro kaia inbok a akthrata pupok suungah anthun chuta akthranohvah anlon. 49Chunna chup achenakho nga tloh a veitu, ringroi in thlenga akthranoh eita akchimlamseh ankaar nata athrektuei.” 50Che anmahta meimunna athlaaktuei, mah amunkhanna anmah in traptruuia anha amikettu.
Amlui leh Akthar Lal
51Jisu in ankuunga asonei, “Mah anaamte i nannih in bahab tlasachoume?” Anmah in akuungah anson, “Oi, Akpu.” 52Chunna Jisu in ankuungah asonei, “Ohchurella ringram huunna rella akrom ringjih lulok anaamte innpu inkhat in amah lal akthar leh amlui amthruh nangsa.”
Najareth na Mii in Jisu ta Indah ei
(Mak 6:1–6; Luk 4:16–30)
53 #
Met 7:28; 11:1; 19:1; 26:1 Nga tloh a Jisu in pandam ita amcheche, aknua ohchunnata sehsa, 54#Mak 6:1–6; Luk 4:16–30che Jisu in amah ramboomma athlenglai, anmah sinakok ah anmahta amtheih ei, chunna anmah in salungkhoua anson, “Mahmii in ramna lousing leh akchek amneh thlouta aphahmeio?” 55Mahmii i thingchal inkhatvaa asa kupa nohme? Anuin Meri nohme? Che anao in Jems, Joses, Simon mahche Judas noh eime? 56che asar naamtein inihsoh inruuijounoh eime? Chunnava mahmii in ramnata anaamte i aphahmeio? 57#Jon 4:44Chunna amahta ril amisokpei. Chuta Jisu in ankuungah asonei, “Ringraan inkhatta amah ramboom tak in mahche ataploikung mii in injahnoh ei, 58anmah in amilotnoh kharella mah khanna salungkhouna thlou tlohnohsa.”
Currently Selected:
METHIU 13: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
