METHIU 20
20
Ngangli Billa Thloutloh Mii
1 #
Met 21:28,33 Ringram huunna khavah ngangli billa thloutloh mii aneknatu juktiing anranga anthruh rampu khanangsa. 2Amah in thlou aktlohtu miisoh nikhat kutlang baobeh injana hoonga amah in ngangli billa amseh ei. 3Che amah in pung kuvak atlaklai keithiil munna seh a jakhatkho tlohnoh a ngirra am amuh ei. 4Che amah in ankuunga asonei, “Nannihkho ngangli billa sehve che thlou tlohve chunna nanphahtu phukha kamlan uchou” chunna anmah in sehsei. 5Veikhatla amah in pung somleinih leh pung inthumvak akho amah in seh a juktiingna nanga atloh. 6Che pung rangavak jakhatkho tlonoh a talla ngirra am ankuungah asonei, “Nannih in jakhatkho tlonoh a jarella nikhat suuntla ngirra amchoume?” 7Anmah in akuungah asonei, “Alamva tukhat inkho kannihta thlou tlohnatu kanisonnoh ei.” Amah in ankuunga asonei, “Nannihkho ngangli billa sehve, che thlou tlohve nanphahtuphu kamlan uchou.” 8Chunna khulouhram aphahlai nganglibil akpuin amrel akputa ason, “Thlou aktlohmii onga juktoolnata matsah phah nikhat antlohman malaneiro. 9Che pung rangavak ah akthleng mii in nikhat kutlangna baobeh anphah. 10Chuta matsah a akthleng miiva thloia anphahphu, chuta aktleisoh intrimma baobeh anphah. 11Che anmah in mahchuta anphahlai, ram akpu kuunga insoa antih, 12Juktoolla akthleng mii in pung inkhatruta antlohning, che nangin anmahta nikhat antlohna amanleh kini insa kanimrat akdou kannihsoh nimtrim. 13#Met 22:12; 26:50Chunna ankaarna inkhatta amah in ason, Ruul o, keiin nankuunga chimnoh tlohnoh ang, nangleh keiin nikhat kutlang manna injanoh meme? 14Nangta jikchahme loua inlengrosa, nikuunga kimlan nanga juktoolna miikho malan kikdit. 15#Met 6:23; Mak 7:22Kitak in dia madonna kitloh i janohme? Chunohle kiril athratrelna nimit intaangsme? 16#Met 19:30; Mak 10:31; Luk 13:30Chunna juktool in matsahtu mahche matsah in juktooltu, alamva mii khalmo tam aong, chuta steruta achartu.”
Jisu in Athihche Aringsam Relna Veithum Tihpi Ason
(Mak 10:32–34; Luk 18:31–34)
17 #
Mak 10:32–34; Luk 18:31–34; Met 16:21; 17:12,22–23; 26:2 Chunnata Jisu in Jerusalem a sehsa, che aroi somleinihta ajea aphurhche lamma anmahta asonei, 18“Anve inih in Jerulalem a seh ume; che miivaa Asa kupata akthloi thiimpu mahche ringjih lulok ankut a amilantu, che amahta thatnatu amilantu, 19Che amahta aminuihnatu, ankhonnatu mahche thingkharh ah thatnatu Jental ankut ah amilantu, che nithum tihpia amah in veikhat kiringtu.”
Anuin Asa kupa Turelna Anih
(Mak 10:35–45)
20 #
Mak 10:35–41
#
Met 8:2; 9:18; 15:25; 18:26; Jon 9:38 Chunnata Jebedi vaa anuin asasoh inruuia Jisu kuungah thlenga, akhuk makamma mathruunna jangmekhat angen. 21#Met 19:28Che Jisu in akuungah ason, “Nangin jangnikdtime?” Amah in Jisu kuungah ason, “Mah kisakupa innih i nang kurung huunna ah inkhat in nikchangtonga che inkhat in nikveitonga inboknatu jathang malaneiro.” 22#Met 26:39; Jon 18:11Chuta Jisu in amsang, “Nangin jangta ninihme tihkho romnohche, keiin ki iinnasam chapla nannih in iin nanchek ume?” Che keiin kinlupna a nannih in inlup nanphahchek ume? Anmah in “Kanchektu” ta amisang. 23#Noon 12:2; Mad 1:9; Met 13:11Chunna Jisu in ankuungah asonei, “Nannih in kei chaplata nan iintu, chuta kikchangtong leh kikveitonga nanboknatu amlanva keitanoh. Chuta maiva Pa in amchaang anmahninga amlantu.” 24Chunna aroi som in mahchuta antheih lai unao innih anchunga amailung inhaangsa. 25#Mak 10:42–45; Luk 22:25–27Chuta Jisu in anmahta aongche asonei, “Nannih in nanrom mah chuvah aktlei Jental rampuui eiin miichunga akpu veia paallei, che anmah anchunga aktloh akhal eiin liinna anlenna. 26#Met 23:11; Mak 9:35; Luk 9:48; 22:26Nannih nankaar avah mahchunang veinoh. Chuta nannih nankaara tunangkhat in akliin vei dile amah khanna nannihtu roijuih hukveiso, 27che nankaara tunangkhat in akliin aveija khanna nannihtu roijuih hukvei tuei. 28#Met 26:28; 1 Tim 2:5–6; Jon 13:15–16; Tit 2:14; 1 Pit 1:18Miivaa Asa kupa in keita rou keitlohveta thlengnoh, chuta miita routlohnatu mahche miita thloknatu amah chaanta mathlah thlengsa.”
Mitcho Innihta Jisu in Amthratei
(Mak 10:46–52; Luk 18:35–43)
29 #
Mak 10:46–52; Luk 18:35–43; Met 9:27–31 Anmah in Jerikho nata inthruh a anseh in miitam in Jisu ta anjuihpei. 30Che anve, mitcho mii innih in lamkomma inbok a amsei, Jisu in lam vanna sehta antheih in onga antih, “Devit vaa Asa kupa o! Kannihta kanirilvolro!” 31Miitam in anmahta rim amveta ansaalei, chuta anmah in ral ralla onga antih, “Devit vaa Asa kupa Akpu o! Kannihta kanirilvolro!” 32Jisu in anngeihche anmahta asonei, “Keita nannih turel jangnamitlohja angme?” 33Anmah in Jisu kuungah antih, “Akpu, kanmit kanimmuhro.” 34Mahchunna anmahta arilvolsei, che anmah anmitta apalpei. Che kak hang anmit muh anphahpei, cheva amah aknuta anjuihpei.
Currently Selected:
METHIU 20: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
