METHIU 21

Jisu in Raalchek a Jerusalem a Luut

(Mak 11:1–11; Luk 19:28–40; Jon 12:12–19)

1 # Mak 11:1–10; Luk 19:29–38; Jon 12:12–18 Anmah in Jerusalem annailai Jaitun muulla am khuu Betphake anphah in aroi innihta mathlah a asonei, 2“Nannih nanmaa a am khuusonna vaave che kak hanga nannih in samong apuileh atesoh inruuia khit a ansih nantuuktu, mahchuta majak a keikuung thlenve. 3Che tukhat in nannihta jarelname nanitihle, ‘Akpu in darkaar am’ tihve, che kak hanga amah in nanimlantu. 4Mah anaamte i ringraan in asonkha atlungnasa, mah chuvah nga tloh a ason, 5Jaion vaa asakumei kuungah sonve, ‘Anro, nang kurung in nikuungah thlengsa, amahvah inruruh mahche samong chunga chuung, samong ate inkhat, samong apui inkhat ah.’ ”

6Jisu in aroita amtheihna nujuih a anmah in seh a antlohpei; 7anmah in samong aruulta anthlenche achunga puun anthah, che Jisu in achunga chuungsa. 8Che miitam in anmah anpuunrei lamma anrouthah, mii arouin thingbaak tuk a lamma anrouthah 9#Luk 2:14; Met 21:15; 23:39Cheva miitam in amah amaa a che aknu akjuih in onga antih, “Devit vaa Asa kupa ah Hosana! Akpu minga akthleng miikha doiphah khasa! Ankaang remma Hosana.” 10Che Jisu in Jerusalem a alutlai, khuuboomna miinaam in derder tih a ansonpei, “Mahmii i tume?” 11#Jon 6:14; 7:40; Noon 3:22; Mak 6:15; Luk 13:33Chunna miitam in anson, “Mahmii i Kalili vaa Najareth na ringraan Jisu khare.”

Jisu in Mathruunna Thlaamma Luut

(Mak 11:15–19; Luk 19:45–48; Jon 2:13–22)

12 # Mak 11:15–17; Luk 19:45–46; Jon 2:13–17 Mahche Jisu in Ringpu mathruunna thlaamma luut a asuungah ak am mii pootjuur leh aklei anaamteta amnom, che baobeh akkhoi mii tebor leh khuinu juur anboknata malat a akthek ei 13Che Jisu in ankuungah asonei, “Mah i injih a amsa, ‘Kei innvah ngenna inn tih a in ongtu’ chuta nannih in inru inraanvaa anbu namiveipei.”

14Cheva mathruunna thlaamsuunga mitcho mahche kehtlik in Jisu kuungah thlengsei che anmahta amthratpei. 15#Luk 19:39; Met 21:9Chuta akthloi thiimpu mahche ringjih lulok eiin Jisu in atlohthlou khanna salungkhou seia “Hosana, Devit vaa Asa kupa!” tih anao in an ong anmuh in amilung inhaanga akuungah ason, 16“Anmah in ansonni nitheihme?” Jisu in ankuungah asonei, “Oi, kitheih, Anjih in ason, nangta nandomnatu andihnao mahche chuh in annarra thradek a nandomnatu namchaang,” tih i nannih in paanohchoume? 17#Mak 11:11–14; Luk 13:6–9Cheva Jisu in anmahta mah a khuuboom nata Bethani a sehsa, che mahchunna riiksa.

Jisu in Thotthingta Phool Atloh

(Mak 11:12–14,20–24)

18Juktiinga Jisu in khuuboomma anlenglai avon traamsa 19Che lamkomma thotthing inkhat amuh a akuunga avaa in aburnoh a jakhatkho tuuknohsa. Chunna thotthingta ason, “Veikhat inlenga nangin inrahnoh luungrosa!” Kak hanga thotthing in chaarsa. 20#Mak 11:20–24Aroi in mahchuta anmuh in salungkhoua anson, “Khatloh a thotthing in khalmo intha a achaar sameio?” 21#Met 17:20; Luk 17:6; 1 Kor 13:2; Jem 1:6Chunna Jisu in ankuunga asonei, “Keiin nannihta atak a kitihchou, nannih in malot a nanrilla chingna amnohchoule, thotthinga mainang nantlohchek khop noh a, chuta nannih in muul ita inlongbulh a tuiiboomma tlarota nanson inkho veitu. 22#Jon 14:13–14; 16:23Che nannih in malot a nanngen anaamte nannih in nanphahtu.”

Achek Amneh Jisu Rella Anrui

(Mak 11:27–33; Luk 20:1–8)

23 # Mak 11:27–33; Luk 20:1–8; Jon 2:18–22 Jisu in mathruunna thlaamma luut a miita amtheihlai, akthloi thiimpu mahche anparuul eiin akuungah thlenga anson, “Nangin jaknang akchek amneh ah mah thloui nitlohme? Che mah akchek amneh i tunang in nakpekme?” 24Chuta Jisu in ankuungah amsangei, “Kei inkho nankuungah naniruitang, mahchuta kamsangchoule jarella keiin mah akchek amneh thloui kitlohme kison uchou. 25Aklup John kha ramname? Ringram tingname chunoh a mii tingname?” Cheva anmah sengseeng intella insonsei, “Inih in ringram tingna” tihmale amah in initihtu, “Chunohle nannih in jarelna amahta malotnoh choume?” 26#Met 11:9; 14:5; Luk 1:76Chuta inih in “mii tingna” tihlamele miitamta trihme, alamva mii naamtein John ta ringraan inkhat antih. 27Chunna anmah in Jisu ta anson, “Kannih in romnoh ung.” Che Jisu in ankuungah asonei, “Keikho jaknang kichek kimneh a mah anaamte i kitlohme nanison nohtung.”

Asa kupa Innihvaa Pandam

28 # Met 20:1; 21:33 “Chuta nannih in jangnamidonme? Mii khat in asa kupa innih am; che amah in asa kupa anpaakuungah thlenga ason, ‘Kisakupa o, mi invah kei ngangli billa seh a thlou tlohro.’ 29Amah in amsang, ‘Kei sehnohtung,’ chuta kak amche aril athlengpeia sehsa. 30Chela asa kupa innih tihpi kuungah thlenga ason, ‘che amah in amsang,’ oi, ‘sehtung, lulok’ chuta amah in sehnohsa. 31Anmah innih kaara jaknangin anpa in amdon atlohme?” Amah in ason, “Matsahna in atloh.” Jisu in ankuungah asonei, “Keiin atak a kitihchou, mah chuvah roithraiei mahche kochanoh kumei eiin matsah a ringram huunna a luutuei. 32#Luk 3:12; 7:29–30Alamva John in akchimlamseh veia nankuungah athlengche nannih in malotnohchou, chuta roithrai mahche kochanoh kumei eiin amahta amilot; che nannih in mahchuta nanmuhlai nanril thlenga malotnohchou.”

Ngangli Billa Kochanoh Lampaar Saavaa Pandam

(Mak 12:1–12; Luk 20:9–19)

33 # Mak 12:1–12; Luk 20:9–19 “Aktlei pandam khatkho rungaive: Nganglibil aktloh rampu mii khat am. Amah in kooia pal amkhahche asuunga tuklei choua nganglirah soorna amthrun, che stlaan inkhat athong mahche nganglibil lampaarsa eita amsaal eiche amahvah aklah ram inkhat a sehsa. 34#Met 22:3Pekva nganglirah luhnatu lai aphah in, anluhpeira ta aroita nganglibil lampaarsaa miikuungah amthlahpei. 35Chunna lampaarsa eiin aroita suura inkhatta ankhon, inkhatta anthat, che aktlei inkhatta lunga anden. 36Matsahnachung ralla amah in aroi khatlakho amthlah, che anmah in matsahna nanga amah kuungah anloutlohpei. 37Chunna achena avah asa kupata anmah in injah tuei ta ankuungah amthlah. 38Chuta nganglibil lampaar aksaa eiin asa kupata anmuhlai, anmah sengseenga insonsei, ‘Mah i amah pipata thlengsa, inih in amahta ithatche achangphu sutreio.’ 39Che amahta ansuurpei, che nganglibil apaalla aminomche anthatpei. 40‘Chunna nganglibil Akpu in athlenglai, nganglibil lampaar aksaa mii eita amah in kha atloh tueime?’ 41#Met 8:11; Noon 13:46; 18:6; 28:28Anmah in anson, ‘Amah in akthranoh miichut eita amramtuei, che amah ngangli bilta aktlei miiting mathlah a nganglirah luhlai akrah amah kuungah amlantu miikuungah amsaaltu.’ ”

42 # Noon 4:11; 1 Pit 2:7 Jisu in ankuungah asonei, “Inntloh mii in akjanoh lungta amuvei akiingna amivei, mah i Akpu in amvei, che mahchu inih imit avah salungkhouna tih a nannih in ringjihta paanohluung choume? 43Churella nannihta kisonchou, ringram huunnakha nankuungnata inloutu che akrah anrahtu jaat in khat kuunga kimlentu. 44Che tunangkhat in mah lung achunga anloom miiva invuitu, chuta mah lungin tunangkhat in chuunga tlaleva, uphulnanga invuinektu.”

45Akthloi thiimpu mahche Pharisi eiin Jisu vaa pandam antheih lai, anmah rella trongsa tih a amrompei. 46Chuta anmah in Jisu ta namma suurnatu antlohta, anmah in miitamta trihsei, alamva anmah in Jisu ta ringraan inkhatsa ta anloh.

Currently Selected:

METHIU 21: TARAOBSI

Highlight

Copy