METHIU 22
22
Changvaang Buhdoonvaa Pandam
(Luk 14:15–24)
1 #
Luk 14:16–24
Veikhatla Jisu in ankuungah pandam veia asonei, 2“Ringram kurung huunnakha kurung khat in asa kupa changvaangnatu amchaang nangsa. 3#Met 21:34Che changvaang anjaonantu mii akouh eita ongveta amah in aroita amthlah ei, chuta anmah in thleng indahsei. 4Anro, keiin siilchal leh sa annou kithatpei, che khulouhram buhdoon saaknatu kamchaangpei, che bilam chesang, changvaang thlengveta sonna an ongnatu veikhatlakho amah roijuihta amthlah ei. 5Chuta anmah in inleua anloh mahche ansehjana ah arouin anlouva, arouin anthlou aktleiah sehsei. 6Che roijuih anleita anmah in suur mathrit a anthat. 7Mahchuta kurung in atheihlai, amlung inhaangsa, che amah in raalmii mathlah a mii eikhata mamaangkirra amiramche ankhuuboomta meia anhaalpei. 8Chunna amah roijuih eita asonei, changvaangnatu athlourang chesa, chuta ikouh miiva matik chanohsei. 9Churella nannih in lamsuh lamsuh ah sehve, che nannih in nantuuk nantuukmii eita changvaangna ah kouh eive. 10#Met 13:47Mahchunna amah roijuih in lamsuh lamsuh a sehsei, che anmah in antuukmii naamte akthra mahche thranohta amichunkirpei, che changvaangna thlaampiia akthleng mii in sipsei.
11“Chuta kurung in akthleng miita annatu aluutlai, changvaangna puunrei aksilhnoh mii khat amuhpei; 12#Met 20:13; 26:50chunna amah kuungah ason, ‘Ruul o, changvaangna puunrei jaonoh a nangin khatloh a onna luutsacheme?’ Cheva amah in amsangna romnohsa. 13#Met 8:12; 13:42,50; 24:51; 25:30; Luk 13:28Cheva kurung in amah roijuihta asonei, ‘Akut akeh makaangve che amahta phurh a apaal anthimna a loonve, mahchunna aha maket a traptruui veitu.’ 14Alamva miitam aong, chuta steruta acharning.”
Roithaang Rella Rui
(Mak 12:13–17; Luk 20:20–26)
15 #
Mak 3:6; 8:15; 12:13–17; Luk 20:20–26 Chunnata Pharisi in seh a Jisu ta khatloh a atronga maman reimeta intelsei. 16Che anmah anroita Herot amiisoh inruuia Jisu kuunga mathlah a anson, “Lulok, kannih in nangva akchim cheta kanrom, che Ringpu vaa akchimlamta chimma namtheih, chuche tukhatkho nangin thousanohche, alamva nangin keimii miimii annohche.” 17Chunna nangin kanisonro jangta nimdonme? “Mah chuvah Keisaar kuungah roithaang malanni tlohphume chunoh a tlohphunohme?” 18Chuta Jisu in anmah anthratnohta aromma asonei, “Akthra veisin nannih in jarella keita chaang nan an angme? 19Roithaangna baobehkha kammuhve.” Chunna anmah in nikhat kutlangna baobeh inkhat amimuhpei. 20Che amah in ankuungah ansonei, “Mahkha tunangmii asak leh akmingme?” 21#Rom 13:7Anmah in anson, “Keisaar ta” che amah in asonei, “Chuleva, Keisaar taale Keisaar kuunga che Ringpu taale Ringpu kuungah malanve.” 22Anmah in ohchuta antheih in, salungkhousei, che Jisu ta anmahche inlengsei.
Thinata Ring Rella Rui
(Mak 12:18–27; Luk 20:27–40)
23 #
Mak 12:18–27; Luk 20:27–38; Noon 4:1–2; 23:6–10 #
Noon 23:8
Mahnital achunna thinata ring amnoh aktih Sadukiis in Jisu kuungah thlenga anrui, mahchuva, 24“Lulok, Moses in ason, ‘Mii inkhat in inn apaalche asa amnoh a thile, anmah unaoin akmeita changvaangso, che anmah unao turella ansa anphahnatu’ tih a ason. 25Anmah unao sirih kannihsoh ammei, anparem in changvaangche asa amnoh a thisa, amah akmeivah amah unao eisoh amjouei. 26Mahchunanga innih tihpi leh inthumtihpi mahche sirih tihpi phah nga tloh a suuksa. 27Anaamte i aknua kumeikho thisa. 28Chunnava thinata anringlai kumeikha anmah mii sirih suunga tunang akmei vei ume? Alamva annaamte in amahta anlohpei.”
29Chuta Jisu in ankuungah amsangei, “Nannih chimnosachou, alamva nannih in ringjihkho Ringpu vaa atuuikho romnohsachou. 30Alamva thinata anringlai anmah in changvaangnoh tuei chekho changvaanga inpenoh tuei, chuta anmahva ringramma am ringroi veiusei. 31Chuta thinata ring rella Ringpu in nanisonkha paanohchoume? 32Mah chuvah Keiva Abraham vaa Ringpu, Aisaak vaa Ringpu che Jakop vaa Ringpu sang. Amahva akthivaa Ringpu noh chuta akringvaa Ringpu.” 33#Met 7:28Miitam in mahchuta antheih in, amah in amtheih khanna salungkhousei.
Akliin Trongthuun
(Mak 12:28–34; Luk 10:25–28)
34 #
Mak 12:28–34; Luk 20:39–40; 10:25–28 Sadukiis in amah atrongta masang macheknohsei tih i Pharisi in antheih in, anmahseengta inchunsei. 35#Luk 7:30; 10:25–28; 11:45; 14:3Cheva anmah ankaarna ukil inkhat in Jisu ta chaang anna arui, 36“Lulok, trongsuur suunga jaknangin akliinrem trongthuunme?” 37Jisu in akuunga ason, “Nangin nang Akpu Ringpu ta niril pumte, nikli pumte mahche nimdon pumtesoh inruuia rilvolro.” 38Oh inna matsahrem mahche akliinrem trongthuunsa. 39#Met 19:19; Kal 5:14; Rom 13:9; Jem 2:8Che innih tihpiva, “Nangin nantongpi miita nitaktal nanga rilvolro. 40Mah trongthuun innih in trongsuur mahche ringraan in anson anaamte inthrungsa.”
Misaiah Relna Rui
(Mak 12:35–37; Luk 20:41–44)
41 #
Mak 12:35–37; Luk 20:41–44 Ipek Pharisi in inchunna an amlai, Jisu in trong aruiei, 42“Nannih in Khrista relna jangnamidonme? Amah i tunang asame?” Anmah in akuunga anson, “Devit vaa Asa kupa.” 43Amah in asonei, “Chuleva khatloh a Devit in Li vaa Akpu tih a aongume?” 44#Noon 2:34–35; Hib 1:13; 10:13“Akpu in kei Akpu ta ason, kikut kikchangtonga inbokro, nang jeknaeita nikeh majathuuia nisihnohmiil.” 45Devit in amahta “Akpu tih a ongleva khatloh a asa kupa vei ume?” 46#Mak 12:34; Luk 20:40Che amahni khannata tunangkhat inkho amahkuunga karaanga trong ruinohsei.
Currently Selected:
METHIU 22: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
