METHIU 23
23
Trongsuur Lulok leh Pharisi eita Amthritna
(Mak 12:38–39; Luk 11:43,46; 20:45–46)
1Che Jisu in miitam leh aroi ankuungah asonei, 2“Ringjih lulok mahche Pharisi eiin Moses anbokna a inbokei; 3Churella nannih in athlou veia nantlohnatu anmah in nanisonkha ngaak a tlohve, chuta anmah in antlohthlou nujuih avah tlohnohve, alamva anmah in trongvah anraan, chuta athlouvah tlohnoh ei. 4#Luk 11:46; Noon 15:10Alamva anmah in akrikpoot anphurh cheknoh lep a miidarchunga anthong. Chuta anmah antak inva ankut majung inkhat inkho puur indah ei. 5#Met 5:16; 6:1; 9:20Chuta anmah anthlou naamteva mii in anmuhnatu antloh. Anmah in ringjih trongta ankutbaang leh amichalla amijih mahche anluut insuul areia amikai. 6#Mak 12:38–39; Luk 20:46; 14:7–11; 11:43Anmah in aktuirem buhdoonna leh sinakok ah akthrarem inbokna a inbokvah andit. 7Keithiil munna mii in anmahta mathruunna, lulok lulokta ankuunga ongi andit. 8#Jem 3:1Chuta nannihtalva mii in lulokta naniongnoh eiso, alamva nannih lulokva Khrista inkhatning che nannih naamte unaochou. 9Thaleichungah tukhatkho pa ta ongnohve, alamva nan Pa inkhatning, amahvaa ringramma am. 10Nannihta akpu tih akho mii in naniongnohso, alamva nannihtu Akpu Khrista khalekning. 11#Met 20:26; Mak 9:35; 10:43; Luk 9:48; 22:26Tunangkhat nankaara anrolrem mii khanna nannihtu roijuih veitu; 12#Luk 14:11; 18:14; Met 18:4; 1 Pit 5:6che tunangkhat in anroua indom mii khata amniimtu che tunangkhat inruruh miikha akdomtu.”
Akthra Anveisin Relna Jisu in Amlaalei
(Mak 12:40; Luk 11:39–42,44,52; 20:47)
13 #
Luk 11:52
“Chuta ringjih lulok leh Pharisi akthra veisin nannihtu vei avah lahnasa a! Alamva nannih in ringram kurung huunnakha miita andah a nankhaarpei, nantak inkho mahkhan luutnohchou, che luuttangta akthleng miikho maluutnoh sachou. 14Ringjih lulok leh Pharisi akthra veisin nannihtu vei avah lahnasa a! Alamva nannih in trulmeinu ei inn louta namma nansut, che malot miiung nantihnatu soot nanngen. Churella nannih in akliinrem maraal nanphahtu. 15#Noon 2:10; 6:5; 13:43Ringjih lulok leh Pharisi akthra veisin nannihtu vei avah lahnasa a! Alamva nannih in tunangkhatta mathlengnatu tuiiboom mahche apaalla sehtlam hou, che amah in anthlenglai nannih in amahta nangchunga chuum innih ralla repnangvaa asa kupa namivei.
16 #
Met 5:33–37; 15:14 “Mitcho lamchingeio, nannihva lahnasa a! nannih in nanson, ‘Tunangkhat in mathruunna thlaamta sonna suita tlohleva, amah trongchet in amahta akaanpei.’ 17Kmong mitcho eio! Alamva ra–ao leh ra–aota amseeng mathruunna thlaamsoh jaknangin anrolme? 18Che nannih in nanson, ‘Tunangkhat in thiilkuungta sonna suita tlohle, mahchu jakhatnoh; chuta tukhat in thiilkuungah am kuttholta sonna tlohleva, amah trongchet in amahta akaanpei.’ 19Mitcho miieio! Alamva kutthol leh kuttholta amseeng thiilkuung i jakanang in anrolme? 20Chunna tunangkhat in thiilkuungta sonna suita aktloh in thiilkuung mahche achunga bilam ak am naamteta sonna suita atlohpei; 21che tunangkhat in mathruunna thlaamta sonna suita tlohleva, mahchuta che asuunga ak am anaamte jaoa suita atlohpei. 22#Met 5:34Che tunangkhat in ringramta sonna suita tlohleva, Ringpu khatkho mahchunga inbok a amkho sonna suita athohpei.
23 #
Luk 11:42
“Akthra veisin ringjih lulok leh Pharisi eio, nannih turella lahnasa a! Alamva nannih in jupal aiileh hop mahche jira vah somsuung inkhat namilanche akchimleh rilvoltheih che malot; ralla trongsuura akrikpootva nannih in inleuchou, aktlei ei inkho inleunoh a, nannih in nantlohtupot. 24Mitcho lamchingeio, barthlepva nannih in naminomche uuksava namiduul!
25 #
Luk 11:39–41; Mak 7:4 “Akthra veisin ringjih lulok leh pharisi eio, nannih turel lahnasa a! Alamva nannih in kam leh bukaan apaaltongva nantlen, chuta asuungtongva nannih in miithat leh akrou amdon tlungnatu suul in sipchou. 26Mitcho Pharisi eio! Matsah a kam leh pukaan asuungtongkha tlenmanve, mahchuche apaal tongkho tleng aja.
27 #
Luk 11:44; Noon 23:3 “Akthra veisin ringjih lulok leh Pharisi eio, nannih turel lahnasa a! Alamva nannihva apaaltonga ameel akthra, inngou intei rusuun nangjimchou, chuta asuung avah nannihva intlenlou mahche akthi miiruh sip a amnangchou. 28Chunna nannihkho apaaltongva mii kuungah akchimlamseh nangchou, chuta asuung avah akthra veisin leh kochanoh a sipchou.”
Jisu in Anmah Tandi Turella Aphoong
(Luk 11:47–51)
29 #
Luk 11:47–48; Noon 7:51–53 “Akthra veisin ringjih lulok leh Pharisi eio, nannih turelvah lahnasa a! Alamva nannih in ringraanei anrusuun namithrat che akchimei korou luungkho namithrat. 30Nanson lamang, ‘Inih in ipa ipu an amlaia louam meleva, inih in anmahsoh ringraan anthii mathlaakkha injaonoh utame.’ 31Nga tloh a nannih in ringraan akthatsungta nanroua sakhi namilan. 32Nannih in nanpa nanpuvaa an olnakha masipve. 33#Met 3:7; 12:34; Luk 3:7Muruul eio, ruulsok asa eio, khatloh a repnanga luutsamnata inlit nanchek ume? 34#Met 10:17,23; Luk 11:49–51Alamva keiin nankuungah ringraan leh aksing mii leh ringjih lulok eita kamthlah ei, nannih in arouva thingkharh a jamma nanthatsam, che arouin nannih sinakok ah naminangtu che khuupii khuupii a nanchuttu, 35#Hib 11:4Chunna nannih in nanthat akseeng munleh thiilkuung akaara akchim Abel thiinata Barakhi vaa asa Jekhariah thii thaleichunga aktla akchim thiinaamte nankuungah tlatu. 36#Met 10:23; 16:28; 24:34Tak a nankuungah kisonchou, mah ringnatluun anchunga tlatu.”
Jerusalem Rella Jisu in Arilvol hang
(Luk 13:34–35)
37 #
Luk 13:34–35
“O Jerusalem, Jerusalem, ringraan eita that a amchou che nannih turel kamthlah eita lung denna amchou! Jikcha intonga arpui in ateta amthlanuiah oh khananga keiin nansata pulla kikem uta chuta nannihva kamtlohnohchou! 38Anve, nannih nan innkha akroua chikkeng usa. 39#Met 21:9Alamva keiin kisonchou, ‘Akpu minga akthleng eikha doiphah vei tuei,’ ta nansonnohmiil nannih in inlenga keimuhnoh usachou.”
Currently Selected:
METHIU 23: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
