METHIU 24
24
Mathruunna Thlaam Maangsam rella Jisu in Trong
(Mak 13:1–2; Luk 21:5–6)
1 #
Mak 13:1–31; Luk 21:1–33 Jisu in mathruunna thlaam mathlah a asehlai, amah roijuih eiin akuungah thlenga mathruunna thlaamta amitheih. 2#Met 26:61; 27:39–40; Luk 19:44; Jon 2:19Chuta amah in ankuungah amsangei, “Nannih in anaamte nanmuh, muhnohrei choume? Tak a nankuungah kisonchou, lung khatin lungkhat chungah inthonga inmahnoh usa, anaamte inpilkirtu.”
Klah Knang Khatkho Chut
(Mak 13:3–13; Luk 21:7–19)
3 #
Luk 17:20; Met 13:39,40,49; 28:20; 16:27 Amah in chorophol muulchungah anboklai, roijuih eiin inruktea akuungah thlenga anson, “Mah i tik a suuk ume, che nangin nithleng nasam daang mahche chup achena samchu khatloh a suuk ume kanisonro.” 4Che Jisu in ankuungah amsangei, “Tukhat inkho chimnohting naniseh pinanohtu cheksilve. 5#Met 24:11,23–24; 1 Jon 2:18Alamva ‘Kei i Khrista sang ta kikminga khalmo thlengtuei,’ che mii aktamta invaia nanisehpitu. 6#Mad 6:3–8,12–17Che nannih in raal khatkho raalhou nantheihtu; romve mah chuvah nannih in inchoinohve; tihva mah i suuktutla, chuta achenavah nohmang. 7Alamva jatih khat in jatih khat chungah che kurungram khatin kurungram khatchunga innah insuul suuktu, aram aramma saakchaal che runaangnu thou suuktu. 8Anaamte i sapok in klah amthronnasa.
9 #
Met 10:17–18,22; Jon 15:18; 16:2 “Mahlai anmah in nannihta trihkhop klah knangting nanimlantu, mahche nanithattu, chuche jaat naamte in kei kikming rella nannihta nantirh tuei. 10Mahlai mii aktam in malot inlengtuei, che khatleh khat inloontuei, mahche khatleh khat intirh suuktuei. 11Chuche akchimnoh ringraan khalmo inthruh ah mii khalmo invaia ansehpituei. 12Che thranoh in araltu miiringvol inlengtu. 13#Met 10:22; Mad 2:7Chuta achena phah a akdou mii khata akaltu. 14#Met 28:19; Rom 10:18Chuche amah kurung huunnavaa akthra trongraan i jaat anaamte ah sakhi veinatu tukleiram pumtea inraantu; mahche achenakha thlengtu.”
Trihkhop a Klah Knang
(Mak 13:14–23; Luk 21:20–24)
15“Chunna ringraan Dainel kuungah amson intirhsa chimmnoh buurthlou in akseeng munna ngir nanmuhlai (akpaa in romeiso). 16Mahlai Judia a am mii inkho muulla tlaaneiso, 17#Luk 17:31innbunga am mii inkho innsuungah pootlou trumnoh eiso; 18chela nao anpooileh naosonrooi anmah turelvah khalmo lahnasa a! 19#Luk 23:29Che nao anpooileh naosonrooi anmah turelvah khalmo lahnasa a! 20Nannih in nantlaankha phalbi nohle inngeihni ah antuuk nanohtu ngenve. 21#Mad 7:14Alamva mahlai tukleiram amthron lainata ipekphahkho lousuuknoh, che vaknuakho suuknoh tupot, trihkhop a klah knang suuktu. 22Che mah aknieikha machomnoh leva, akringmii tukhatkho inkal phahnoh tuei; chuta acharche mii turelva aknieikha amchom usa. 23Chunna anve onna chunohle mah khanna Khrista amsa ta tukhat in nanisonle, mahchu malotnohve. 24Alamva Khrista khatkho ringraan veisin khalmo inthruhtuei che jaleva acharche miiluungkho invaia sehpinatu akliin daang leh salungkhouna khalmo amimuhtu. 25Anve, nankuungah matsahbeb a kisonpeichou. 26#Luk 17:22–24; Mad 1:7Chunna anmah in nankuungah ‘Anve, amahva raprilla amsa’ tih a nanisonle sehnohve. 27Alamva nisuuknata khu inthla in nitlaktonga kvaar nanmuhnanga miivaa Asa kupa in athlengkho mahchunang veitu. 28#Luk 17:37Akthi ruung amna a barmupii inlomma amtuei.”
Miivaa Asa kupa in Athlengna
(Mak 13:24–27; Luk 21:25–28)
29 #
Mad 6:12,13; 8:12 “Trihkhop a klah knang asuukche aknua kak hanga kni inthimtu, thla vaarnohtu, arsi in marvaannata tlatu, che marvaanna atuui anaam inloktu; 30#Met 16:27; Mad 1:7Chunna marvaanna miivaa Asa kupava daangkha anmuhtu, che tukleiramna jaat anaamte in sinthruui tuei, che miivaa Asa kupa in amah atuuileh akliin paarthrasoh inruuia marvaan sumphai chungah thlengkha anmuhtu; 31#1 Kor 15:52; 1 Thes 4:16che amah ringroita pik ul anring ahousoh inruuia acharmiita ringroi eiin marvaan adongna khatnata adongna khat phah a, tukleiram akiing manli nata anmitlontu.”
Thotthing Nata Para
(Mak 13:28–31; Luk 21:29–33)
32“Thotting nata para romve: Thotthing in abaak innoua abur asuunsamlai, thralpii innaisata nanrom. 33Chunanga, anaamte i nannih inkho nanmuhlai, Akpu in phalkuung phahsamma innaisata nanrom. 34#Met 16:28Marvaan khatkho thaleiva maang umang, chuta kei trongva tiknikho mangnoh luungtu. 35#Met 5:18; Luk 16:17Aknileh Pung tukhat Inkho romnoh.”
Akni Khatkho Pung Tukhat Inkho Romnoh
(Mak 13:32–37; Luk 17:26–30,34–36)
36 #
Noon 1:6–7
“Amahvaa akni khatkho pungkha ringramna ringroi inkho, Asa kupa inkho che tukhat inkho romnoh, chuta Apa khop in aromning. 37#Luk 17:26–27Noah laia aksuuk khananga, miivaa Asa kupa in athlenglai akho veitu. 38Alamva tuiiliin akni aphahnoh maa a saa iinna, changvaanga che chang mavaanga Noah in mulisuunga aluutnohmiil ammei, 39che tuiiliin thlengta romnoh a annaamteta tuii in atlaannanga miivaa Asa kupa in athlengkho mahchunanga veitu. 40#Luk 17:34–35Chunna louva mii innih amtuei; inkhatva alohtu che khatva amahtu. 41Kumei innih in buhsuk a amtuei; inkhatva alohtu che khatva amahtu. 42#Mak 13:35; Luk 12:40; Met 25:13Jih trangve, alamva nannihvaa Akpu in tik a thlengume romnohchou. 43#Luk 12:39–46; 1 Thes 5:2; Mad 3:3; 16:15; 2 Pit 3:10Chuta mah i romve, inn Akpu in jaknang khulouh a inruin thlengtu tih romle amah in loujih a che amah innta makhoinoh uta. 44Alamva nannihkho inchaanga amve che nannih in namidonnoh pungkhan miivaa Asa kupa in thlengtu.”
Amlot Leh Amlotnoh Roijuih
(Luk 12:41–48)
45 #
Met 25:21,23 “Chunna aksing mahche malot aja roijuihta amah Akpu in inn lou amsil malot aja roijuihchu tume? 46Amah Akpu in athlenglai routloh a ak am roijuihkha doiphah veisa. 47Tak a nankuungah kisonchou mahchunanga miikuungah amah Akpu in adoon akhaal naamte amsiltu. 48Chuta akthranoh roijuih in akroua insontu, ‘Kei Akpu in thilla thlengtu’, 49#Luk 21:34che amahsoh rou atlohpijou eita khon amithronpei, che tuiibuh inruiieisoh ansaak an iinjou, 50roijuih khanna amdonnoh aknileh aromnoh punga amah Akpu in thlengtu, 51#Met 8:12; 13:42,50; 22:13; 25:30; Luk 13:28mahche amahta innih suuk a atantu, che akthra veisin eisoh asihjoutu, mahchunna sinthruuia anha amikettu.”
Currently Selected:
METHIU 24: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
