Te Otinako 15
15
Ana Anene Moote
1Ao a anenea te anene aei Moote ma Iteraera nakon te UEA:
“N anene nakon te UEA i bukina ngke E a tia n reke i Rouna te tokanikai ae kakannato;
E a tia n karenakoia taian aoti ma taan toka i aoia nako nanon taari.
2Bon otangau ae matoatoa te UEA;
boni Ngaia ae E a tia ni kamaiuai.
Bon Atuau, ao N na neboia,
Bon Tamau te Atua, ao N na anenea korakorana.
3Bon te tia buaka te UEA,
ao bon te UEA arana. 4“E tewenakoia aia taanga ni buaka kaain Aikubita i taari;
A b'ab'a i Taari are Uraura ana aobitia ake a bane aroia. #15.4 Taari are Uraura: Noora te taeka are 13.18.
5A rabunaki n taari ae nano;
a inako nako kabina n ai aron te atiibu.
6“E kakamaaku m'aakan baim are te atai te UEA,
e urua te kairiribai ni kamaerikirikia.
7Ko tewenakoia am kairiribai ni mimitongin am tokanikai;
ao e tii nako uran unim ni kabuokiia n ai aron te uteute ae m'au.
8Ko uka aon taari, ao e a ikoikorake n rietaata te ran;
e a teirake kaanga te o;
ao e a tabe ni matoa kabin taari are te kabanea n nano.
9E taku te kairiribai, ‘N na kakioia ma n raweia.
N na tib'ai kaub'aia ma n anai b'aai ni kabane aika I tangiri;
N na buuta au kabaang ma n anai b'aai ni kabane ake i rouia.’
10Ma ti teuana ikeikem te UEA, ao a b'ab'a naba kaain Aikubita;
a inako n ai aron te buange i nanon te ran ae marebu.
11“Te UEA, antai ae ai arom i buakoia atua?
Antai ae katotongko n arom ae Ko tabu ma ni mimitong?
Antai ae kona ni karaoi kakai ma m'akuri aika ab'ab'aki n aron am m'akuri?
12Ko arora nako baim ti te angaatai,
ao a kab'autaki naba ara kairiribai iroun te aonnaba.
13Ko kakaonimaki nakon Am berita, ao Ko kairiia aomata ake Ko kamaiuia;
Ko kaawakiniia ni korakoram ni karokoa rokoia i abam are tabu.
14A tia n ongo botannaomata, ao a ruru ni maaku;
ao a rootaki kaain Biritia n te maaku.
15A maaku taani kairiri i Etom;
a ruru m'anen Moaba ake a korakora;
ao a biu kaain Kanaan.
16A taonaki n te maaku ae moan te korakora.
A noora korakoran te UEA,
ao a tei n akea angin nanoia i bukin te maaku
ni karokoa banen raoi am aomata ni m'ananga i rarikiia
ake am aomata ngkoa ake Ko kainaomataia man te toronaki.
17Ko uotiia ni kariniia, ao Ko unikia i aon te maunga,
te tabo ike Ko a tia n rineia te UEA i bukin Am auti,
te Tembora are Ko boni kateia.
18Te UEA Ko na riki b'a te UEA n aki toki.”
Ana Anene Miriam
19A nakonako Iteraera i nanon taari i aon te tano ae m'au. Ma ngke a nako nanon taari aia kaa ni buaka kaain Aikubita, ma aia aoti ma taani kabutii; ao E a manga kaoka taari te UEA, ao E rabuniia.
20Ao e anaa ana timbere Nei Miriam are m'anen Aaron, ao a bane aine ni iria ni katangtang n te timbere ma ni m'am'aie. 21Ao e anene Nei Miriam nako ia:
“Anene nakon te UEA b'a E a tia ni karekea te tokanikai ae mimitong;
E a tia n tewenakoia taian aoti ma taan toka i aoia aoti i taari.”
Te Ran Ae Tarika
22Ao i mwiin anne, ao e kairiia Iteraera Moote man Taari are Uraura nakon te Rereua are Tiura. Ao a nakonako i nanon te rereua i nanon tenua te bong, ao e aki roko n te reke te ran i rouia. #15.22 Taari Are Uraura: Noora te taeka are n 13.18. 23Ao i mwiina, a roko n te tabo ae aranaki b'a Maara, ma e a manga rangi n tarika te ran ikekei n te aro are a aki kona ni mooi iai. Ao bon anne bukina are e aranaki iai b'a Maara.#15.23 Maara: Nanona n te taetae n Ebera bon tarika. 24Ao a ngurengure aomata nakoni Moote, ao a taku, “Tera ngkai ae ti nang mooi iai?” 25Ao e kakorakora n tataro Moote nakon te UEA, ao E kaota te m'akoro ni kai te UEA nako ina, ao e karenakoa te kai Moote nako nanon te ran; ao e a riki naba ni mam te ran arei.
Ao te UEA, E anganiia ikekei taian tua are a na maiuakinna, ao E boni kataia naba ikekei 26Ao E taku, “Ngkana kam na ongotaeka i Rou ni karaoi b'aai ni kabane ake I taku b'a a raoiroi, ao ni kaawakin au babaire, ao N na bon aki katuaaingkami n taian aoraki ake I karokoi ngkoa i aoia kaain Aikubita. Bon te UEA Ngai ae I kamaiungkami.” 27Ao i mwiina, a manga roko i Erim ike a mena iai 12 koburake n ran, ao itingaun taiani baam iai; ao a katei aia auti n rianna i bukin te ran.
Currently Selected:
Te Otinako 15: KNVB
Highlight
Share
Copy
Want to have your highlights saved across all your devices? Sign up or sign in
