Te Otinako 20
20
Tuua Ake Tebwina
(Te Tua 5.1-21)
1Ao E taetae te Atua ao E taku, 2“Bon te UEA Ngai ae Atuami, are I kaotinakoi ngkami mai Aikubita, are kam toronaki iai ngkoa.
3Tai manga taromauria te atua riki temanna b'a ti Ngai.
4“Tai karaoi ami bouannanti aika katotongan b'aini karawa, ke b'ain aonteaba, ke b'ain marawa are i aan te aba. 5Kam na aki bobaraaki nakoia bouannanti; ke n taromauriia, b'a bon te UEA ae Atuami Ngai, ae I taua ni nne i roumi. I katuaaia naba te koraki ake a ribaai ni karokoa naba kanoaia rikaaki, nakon te katenroro ao te kaaroro. 6Ma I kaota Au tangira nakon tengaa te roro#20.6 tengaa te roro; ke tengaa. aika a tangirai ma n ongotaeka nakon au tua.
7“Kam na tai kabongana arau i bukin m'akuri aika buakaka, b'a bon te UEA Ngai ae Atuami ae katuaaia akana a aki kabongana arau n te aro ae eti.#20.7 a aki kabonganaa arau n arona ae eti: E nanona naba iai uruan taian berita, taekinan te kewe i mwiin te taeka n tuea b'a e na taekina te koaua, kamanenaakin aran te UEA n te taeka ni kamaraia ke te taeka n tabunea, ao te kataia n taua aron te UEA ae te Atua n kamanenaakin arana. Bon te UEA Ngai ae Atuami, ao N na bon katuaaea ane e kamanenaa arau n aki akaaka.
8“Kam na kawakina te Taabati#20.8 Taabati; Aia Taabati Iutaia are te Kaonobong. ma n tabuia. 9Onobong ami bong ni m'akuri, 10ma te kaitiua ni bong, bon te bong ni motirawa ae katabuaki b'a au b'ai. Bon akea temanna ae na m'akuri n te bong anne. Kam na aki m'akuri iai ngkami ma ami ataei, ami toro, ami man ke ami iruwa akana maeka i abami. 11I karaoa aonnaba, karawa, taari, ao b'aai ni kabane ake i nanoia Ngai ae te UEA i nanon onobong. Ao bon anne bukina Ngai ae te UEA are I karaoa te Taabati ma n tabuia.
12“Karineia tamami ma tinami b'a a aonga n ab'ab'aki ami bong ni maiu i aon te aba are I anganingkami.
13“Ko na aki tiriaomata.
14“Ko na aki wenenibure.
15Ko na aki kimoa.
16Ko na aki bukina temanna n te aro ni kewe.
17Tai mataiakina ana auti te aomata temanna, ke n tataana buuna, ke ni mataiakina ana toro, ana tiibu, ana aati, ke ana b'ai ni kabane.”
Maakuia Aomata
(Te Tua 5.23-33)
18Ao a maaku aomata ao a kararoaia nako ngkana a ongo rebwen te baa, tangin te buu, ma n noora te iti ma te bubu man te maunga. 19Ao a taku nakoni Moote, “Ti rangi ni kakauongo ngkana ko taetae nako ira, ma ti rangi ni maaku ngkana E taetae te Atua nako ira, b'a ti na mate iai.”
20Ao e taku Moote, “Kam na aki maaku, E bon ti roko te Atua ni kan kataingkami ma ni karaoingkami b'a kam na teimatoa n ongotaeka i Rouna, b'a kam aonga n aki bure.” 21Ma a bon kararoaia nako aomata, ao bon ti Moote are nako ni kaaniia te nang are rotongitong are E mena iai te Atua.
Tuan Te Baonikarea
22Ao e mwiokoaki Moote iroun te Atua b'a e na kaangai nakoia Iteraera: “Kam a tia n noora arou Ngai ae te UEA n taetae nako imi mai karawa. 23Kam na aki karaoa atuami man te tirewa, ke te koora, b'a kam na manga taromauriia i rarikiu. 24Kam na karaoa te baonikarea man te tano i buku, ao kam na kabuoka i aona te karea ae ami tiibu,#20.24 te karea: N te boki n Ebera e taekin uoua aekaki n angakarea: te karea are kakukureian te UEA e taneiai n aranaki b'a “te karea are te kab'anin” ao te karea are buubutian te UEA ana kakab'aia “are e taneiai n aranaki b'a” “te karea n raoi”. ao ami kao b'a ami karea ae na kabuokaki ni kabane b'a taiani karea n raoi. N na bon kawaringkami ni kakab'aiaingkami n taabo ni kabane ake I a tia ni katabui b'a ami tabo n taromauri. 25Ngkana arona b'a kam karaoa baonikareau ae karaoaki man te atiibu, ao kam na aki karaoia man te atiibu ae koreaki, b'a ngkana kam kabongana te koorotiiti ni korea te atiibu iai, ao kam bon karikia iai b'a te b'ai ae aki tau ni kamanenaaki i buku. 26Kam na aki karaoa te baonikarea are iai kaintam'arakena nako iai; b'a ngkana kam karaoa anne, ao ai aron ae kam bon katereterei raoi ngkami iai.
Currently Selected:
Te Otinako 20: KNVB
Highlight
Share
Copy
Want to have your highlights saved across all your devices? Sign up or sign in
