Luka 12

Yesu Gba Á̱bubuk Á̱niet

(Mat 10:26-31)

1Di̱n jen a̱ja, á̱kpa á̱niet ma̱ a̱di̱di̱t si̱ tung, ba̱ si̱ tyong Yesu á̱ keang ba̱ si̱ nwuo shai á̱ghyang. Yesu si̱ bwuak a̱ si̱ ya ngyorong mman ta̱m nggu na. A̱ si̱ gba mba nyia̱, “Nyi ta̱bam ma̱ng yit A̱fa̱risawa wu a̱ yet a̱bubuk nyia̱ mba wu a̱ni.

2Jen chobai nang kuzang kyang ku shya̱ di̱ kup a̱ni,

á̱ na khwuk hu kpa̱sai.

Ma a̱nia wa, a̱mgba̱m nkyang na̱ shya̱ di̱ niat a̱ni,

á̱ na tyai na kpa̱sai, konyan a̱ lyen.

3Kuzang kyang hwa nang nyi lyiat mi̱n dyin a̱tyetuk,

á̱ na fa̱k hu kpa̱sai a̱ta̱mam.

Ma a̱nia wa, kyang nang nyi chyuang mami a̱ka̱nyuo a̱ni,

á̱ na shei nhu mi̱ chet tazwa a̱ka̱nyuo.

A̱gwaza wa Myim á̱ Fa̱k A̱wun gu

4“Á̱kpa̱ndang nung ba nang n chat a̱ni, nyi yok fa̱k a̱wun á̱niet ba̱ hyaai á̱nietbishyi mi̱ swanta hu a̱ni bah. Kang ma̱ng a̱nia, da̱ mba ba̱ si̱ mi̱n nyia̱ nyin kyang ku swak a̱nia a̱ni bah. 5A̱wot n na ntak nyin a̱tyu a̱ myim nyi fa̱k a̱wun nggu ka a̱ni. Nyi fa̱k a̱wun A̱gwaza nia. Nggu wa ma̱nyin nggu byia̱ chet a̱ hyaai nyin mi̱ swanta hu, a̱wot a̱ sii ta swuan nyin ji ma̱ a̱nga̱ngak ndong sang sangba̱p#12:5 Lyuut cha̱chaat: Ga̱hena. Ma̱r 9:47.. A̱tsak a̱lyiat, nggu wa ma̱nyin nggu, nyi na fa̱k a̱wun nggu ka.

6“Yihwa yet zang á̱ga̱shoot a̱fwuon? Me á̱ ni̱ lyap na da̱ a̱byi kurum#12:6 Lyuut cha̱chaat: “A̱sa̱riyon a̱feang.” Wa̱i a̱lyiat: A̱sa̱riyon ku yet a̱bada̱dei kurum kya, di̱n jen Yesu ji. kya ma̱ a̱da̱dei a? A̱mgba̱m ma̱ng a̱nia, A̱gwaza bwung a̱ga̱shoot a̱nyiung ma̱ mba bah. 7A̱wot kuzang a̱tyin pyia̱ a̱nyiung ka̱ shya̱ a̱pyia̱ ang ka a̱ni; A̱gwaza fang a̱ si̱ lyen ka. Mat a̱nia, nyi yok fa̱k a̱wun bah. Nyi swak a̱sorong á̱ga̱shoot ma̱ng yet a̱tsatsak da̱ a̱vwuo A̱gwaza.

8“Mat a̱nia, n tak nyin a̱tsak a̱lyiat, konyan wa shim, a̱ si̱ tak ma̱ng á̱ghyang á̱niet kpa̱sai mi̱ swanta huni nang gu ngyet a̱tyu khwi nung wa; nung Nggwon A̱tyubishyi meang, n na ntak gu kpa̱sai a̱zaghyi a̱yaata̱m tswá A̱gwaza ba. 9Ma a̱nia wa, a̱tyu a̱ fwuo lyen nung mi̱ swanta huni a̱ni; nung meang, n na nfwuo lyen nggu a̱zaghyi a̱yaata̱m tswá A̱gwaza ba. 10Konyan wa lyiat Nggwon A̱tyubishyi a̱ka̱tuk a̱lyiat, á̱ na chi nggu ndyo. A̱wot a̱tyu a̱ lyiat A̱za̱za̱rak Ntswa wu lihyat a̱ni, á̱ na chi nggu ndyo bah.

11“A̱wot jen nang á̱ na nnat ma̱ng a̱nyin á̱ nyia̱ nyin shi̱ri̱ya mi̱ á̱tutu a̱tung A̱yahudawa, ma̱ng a̱zaghyi á̱gwam ma̱ng ntyok njhyang a̱ni; nyi yok dam si̱sak ji nyi na nnwuak shim ku ta̱fwat nang nyi na hyia̱ a̱ni bah. 12Mat A̱za̱za̱rak Ntswa wu wa na tyiet nyin di̱n jen a̱ja si̱sak ji nang nyi na nnwuak ba shim hu a̱ni.”

Kidee tazwa A̱bwuon A̱tyu Nzwa

13A̱jawa a̱ghyang a̱niet ma̱ á̱kpa á̱niet ka si̱ yorong Yesu nyia̱, “A̱tyu tyiet, ma̱sa̱kut hyia̱ ma̱ng a̱na̱nyiuk nung wu gu ka̱u gado nang a̱tyia̱ nzi̱t wu khwu a̱ ghwon nzi̱t ndyo a̱ni; gu nang nung a̱kwonu nung ka!”

14Yesu si̱ nwuak gu shim nyia̱, “A̱tuba nung, a̱nyan wa jong nung tyok n gyet a̱tyu zop a̱lyiat, n faat na tazwa nyin di̱ nkyang nang si̱ a̱nia a̱ni?” 15A̱jawa Yesu si̱ bu nyia̱ ma̱ng a̱mba, “Nyi ta̱bam! Nyi cham á̱pyia̱ nyin, nyi khap á̱pyia̱ nyin ma̱ng kuzang tangka̱i wuwok! Mat byia̱ nkyang ma̱ a̱di̱di̱t, huhwa yet a̱tsatsak shyichet bah.”

16A̱jawa Yesu si̱ lyiat ma̱ng a̱mba di̱ kidee nyia̱, “A̱tyu nzwa wa kap a̱byin ka̱ byia̱ bwum a̱ni, ka̱ si̱ nwuak gu yak gba̱mgbam! 17Mat a̱nia, a̱ si̱ nwuo a̱di̱dam mi̱ fwuo nggu hu nyia̱, ‘Yihwa myim n nyia̱? N byia̱ a̱yaagban nang n na ntyia̱ a̱mgba̱m yak huni a̱ni bah!’

18“A̱jawa gu si̱ nyia̱, ‘N dyen kyang hu n na nyia̱ a̱ni! N na mbi̱ri̱m a̱yaagban nung ba, a̱wot n nok a̱cha̱chet a̱yaagban á̱ghyang! Ka̱ n nyia̱ a̱nia, n na shya̱ a̱vwuo gba̱mgbam nang n na ntyia̱ a̱mgba̱m yak nung hu ma̱ng á̱kum nkyang ka a̱ni.

19“ ‘A̱wot n na mbwuok swan n hyia̱ ma̱ng a̱pyia̱ nung nyia̱, “A̱tuba nung, a bwuo yak gba̱mgbam nang a na ya mi̱ ndyia̱ ma̱ a̱di̱di̱t na̱ chobai a̱ni. Ma̱ninika, gwai, ya a tsa nswuo, a̱wot a fa̱k nyinyang a̱pyia̱ ang!” ’

20“A̱wot A̱gwaza si̱ nyia̱ ma̱ng a̱nggu, ‘Nwan a̱bwuon a̱yin! A na khwu a̱tyetuk a̱fwun kani! A̱mgba̱m yak hu nang a kap, a si̱ sak a̱ni; a̱nyan wa na byia̱ nhu?’

21“A̱tsak a̱lyiat, a̱nia wa ku na ndi ma̱ng a̱tyu a̱ tung a̱pyia̱ nggu zwá mi̱ swanta hu a̱ni, a̱wot da̱ nggu, a̱ byia̱ zwá da̱ a̱vwuo A̱gwaza bah.”

Yesu Tyiet tazwa Kurum ma̱ng Zwá jhyang

(Mat 6:25-34)

22A̱jawa Yesu si̱ bwuak, a̱ si̱ nyia̱ ma̱ng mman ta̱m nggu na, “Huhwa mbyia̱ nang n tak ma̱ng a̱nyin; nyi yok nyia̱ a̱fi̱fa tazwa shyichet nyin hu kuzang a̱tuk bah. Nyi bu yok nyia̱ a̱fi̱fa tazwa kyayak nang nyi na ya a̱ni, ku a̱yaatoot nang nyi na kup a̱ni bah. 23Mat, a̱tsatsak shyichet nyin hu swak kyayak ma̱ng yet. A̱wot nvam nyin na si̱ swak a̱yaatoot ma̱ng yet.

24“Nyi nwuan a̱yaankweak shansham nyi lii. Ba̱ chyui, ku ba̱ chak yak ba̱ tyia̱ ma̱ a̱yaagban bah. A̱mgba̱m ma̱ng a̱nia, A̱gwaza wa ni̱ nang mba kyayak hu. A̱wot nyin, nyi swak a̱ka̱man na ma̱ng yet ma̱ za̱nzan da̱ a̱vwuo A̱gwaza baa? 25A̱nyan wa ma̱ nyin, a̱mgba̱m a̱fi̱fa nyin wu, ka̱ doot a̱ mbeang a̱banjen ma̱ chunchwiit mi̱ swuan nggu ji? 26A̱wot ka̱ a̱fi̱fa nyin wu si̱ mi̱n nyia̱ a̱bachunchwiit kyang a̱nia bah; mi̱ yihwa mbyia̱ nang nyi nyia̱ a̱fi̱fa da̱ a̱cha̱chet nkyang wu?

27“Nyi bu nwuan nkywat a̱ka̱kwon na mi̱ kyai a̱yit hu, nyi li si̱sak ji nang na̱ ndaai a̱ni. Na̱ nyia̱ nta̱m bah, da̱ ná na̱ nok a̱pyia̱ na a̱yaatoot bah. A̱mgba̱m ma̱ng a̱nia, a̱gwam Solomon ma̱ng a̱gba̱ndang shisham shi nggu wu, a̱ ku khwi a̱yaatoot ba̱ yet a̱sham nang nkywat a̱ka̱kwon nani a̱ni bah. 28A̱wot ka̱ A̱gwaza tyei nkywat a̱ka̱kwon mi̱ kyai a̱yit shisham, nkywat na na̱ nshya̱ a̱fwun, a̱wot a̱tson á̱ wu tyia̱ na mi̱ ndong; ku myim nyi lyen za̱m nang gu na nnang nyin a̱yaatoot! Kwot! Yihwa mbyia̱ nang nyi nwuak fwuo ma̱ chunchwiit da̱ A̱gwaza!

29“Mat a̱nia, nyi yok nyia̱ a̱fi̱fa di̱ nkyang nang nyi na ya, ku nyi swuo a̱ni bah. Nyi bu yok nyia̱ a̱fi̱fa di̱ ntangka̱i nkyang a̱nia bah. 30Mat ntangka̱i nkyang nani nia nyia̱ tyok mi̱ nfwuo á̱niet ba̱ chyi A̱gwaza mi̱ a̱mgba̱m swanta hu a̱ni. A̱wot A̱tyia̱ nyin wu wa ka̱n dyen za̱m nang nyi nchat nkyang nani, a̱mgba̱m na!

31“Da̱ a̱kwonu a̱kya, si̱ nyi ya ntsa kup á̱ghyi di̱ chat Tyok A̱gwaza hu ma̱ng tsotswat nggu hu. A̱wot nggu meang, a̱ na mbeang nyin a̱mgba̱m á̱kum nkyang ka nang nyi chat a̱ni.

32“Mat a̱nia, nyin a̱bachunchwiit a̱sorong zón seap, nyi yok fa̱k a̱wun bah. Mat A̱tyia̱ nyin wu a̱ shya̱ tswazwa ka a̱ni, shya̱ ma̱ng a̱gba̱ndang a̱gwai a̱ na nwuak nyin Tyok nggu hu.

33“Nyi lyiap a̱mgba̱m zwá nang nyi byia̱ a̱ni, a̱wot nyi nang á̱kunak na kurum hu. Nyi na shya̱ zwá Ma A̱gwaza tswazwa! A̱wot gumaat tswazwa ji si̱ mi̱n kwop, ku ji̱ tyia̱ bwong bah. Zwá nyin ji, ji̱ shya̱ Ma A̱gwaza tswazwa a̱ni; a̱tang si̱ mi̱n nyiin, ku zwú ji ya bah. 34Mat, a̱vwuo ka nang nyi ntung zwá nyin ji a̱ni, a̱ja wa nang a̱di̱dam mi̱ nfwuo nyin wu nshya̱ mameang.

Nyi Swan Fwuong Bwuok A̱tyoli Yesu hu

(Mat 24:43-51; Ma̱r 13:33-37)

35“Nyi swan ma̱ng la̱p vam, nyi fwuong! A̱wot nyi bu ni̱ ntyei long mi̱ fí̱tila nyin ji, ji̱ ka sai kuzang jen; 36nang nyi nswan fwuong A̱tyoli nyin wu a̱ bwuok a̱ neet da̱ a̱vwuo song nyeang kya a̱ni. A̱jawa gu bye nshya̱ nyin nang nyi swan fwuong nyi ka nyiip nggu nyinyiit hu gu nwuo di̱n jen nang gu mbwuok a̱ si̱ lwi nyinyiit hu a̱ni. 37Á̱khwo ba ba̱ shya̱ di̱ swan fwuong bwuok a̱tyoli mba hu a̱ni, á̱ na nang ba zang. N tak nyin a̱tsak a̱lyiat; a̱tyoli wu ma̱ a̱pyia̱ nggu, na tyia̱ ba̱ swan, a̱wot gu kup a̱yaatoot nta̱m nggu ba, a̱ bai a̱ ka̱u mba nkyayak na, ba̱ ya!

38“Shimba a̱tyoli wu na bwuok a̱ bai ma̱ a̱ka̱wa̱tyia̱ a̱tyetuk ku mi̱ shong a̱tson hwa. A̱wot kuzang jen nang gu mbwuok, a̱ na nang á̱khwo ba ba̱ swan á̱ fwuong bwuok nggu hu a̱ni, zang.

39“A̱wot ku myim nyi fi̱k kidee jini: Ki̱ a̱tyoli a̱ghyang wa si̱ mi̱n dyen a̱cha̱chaat njen nang a̱tang chobai tsang a̱gbang nggu a̱tyetuk a̱ni; si̱ a̱tyoli wu na swan a̱ka̱tsak a̱cham. Kalak a̱tang wu a̱ du ngam nggu nyuo a̱mali di̱ mi̱ lyen.

40“Ma a̱nia wa, nyin meang, ku yet ta hwa nyi ni̱ nswan cham kuzang jen! Mat Nggwon A̱tyubishyi ka na bwuok a̱ bai di̱n jen nang nyi ndyen a̱ni bah.”

41A̱jawa Bitut si̱ lyip Yesu nyia̱, “A̱tyoli, nzi̱t mman ta̱m ang ni̱nia nang a lyiat ma̱ng a̱nzi̱t di̱ kidee jini ma̱nyin nzi̱t a? Ke ma̱ng konyan wa?”

42A̱wot A̱tyoli Yesu si̱ nwuak gu shim nyia̱, “A̱tsotswat a̱khwo a̱ byia̱ mumwang a̱ni; nggu wa nang a̱tyoli nggu wu ni̱ tyia̱ gu ta̱m kwak a̱son á̱kum á̱khwo ka, a̱wot a̱ bu ka̱u mba nkyayak ma̱ a̱cha̱chaat njen wu. 43Ka̱ a̱tyoli wu bwuok a̱ bai, a̱wot a̱ si̱ shya̱ nang a̱khwo nggu wu swan a̱cham a̱ nyia̱ a̱tan ta̱m; a̱tyoli wu na fa̱k nyinyang a̱khwo wu, a̱wot a̱ tan gu zang. 44N tak nyin a̱tsak a̱lyiat, a̱tyoli wu na tyia̱ a̱mgba̱m nkyang nang gu byia̱ a̱ni mbwak a̱khwo a̱wa.

45“A̱wot da̱ a̱kwonu a̱kya, ka̱ a̱khwo wu nyia̱ a̱di̱dam mi̱ nfwuo nggu, nyia̱, ‘A̱tyoli nung wu na bwuok a̱nggang bah. A̱ na labeang!’ A̱wot a̱ si̱ ta̱bat tsot á̱kum á̱khwo ka, a̱ si̱ byian jen di̱ ya a̱ tsa nswuo ma̱ng á̱niet hyeng a̱kan á̱ghyang; 46a̱jawa a̱tyoli a̱khwo a̱wa na bwuok a̱ bai gba̱ngba̱ng di̱n jen nang a̱khwo wu ntyia̱ fwuo a̱tyoli wu na bwuok a̱ni bah! A̱wot a̱tyoli wu na kpi̱ri̱p a̱khwo a̱wa di̱ chunchong, a̱ bu tyia̱ nggu swan swuo a̱bung ndung ma̱ng á̱niet lak fwuong!

47“A̱wot a̱khwo wu a̱ lyen kyang nang a̱tyoli nggu wu chat a̱ni, a̱wot a̱ si̱ lak swan a̱ka̱tsak a̱cham hu; da̱ nggu a̱ bu khwi a̱lyiat a̱tyoli na bah. A̱tyoli a̱wa na nyiak guu ma̱ng a̱gba̱ndang swuo a̱bung ba̱t.

48A̱wot a̱tyu da̱ a̱ lyen kyang a̱ni bah,

a̱wot a̱ si̱ nyia̱ kyang hu ku ghyuap a̱ni;

á̱ na nyiak gu ma̱ng tsot ma̱ chunchwiit.

A̱tyu nang A̱gwaza nang nggu a̱wat nyia̱ nta̱m ma̱ a̱di̱di̱t a̱ni;

ku myim a̱tyu a̱wa a̱ fang nta̱m nang gu nyia̱ a̱ni a̱zaghyi A̱gwaza.

Ma a̱nia wa, ma̱nang á̱ ntyia̱ nyin nkyang ma̱ a̱di̱di̱t mbwak a̱ni;

ma a̱nia wa, á̱ bu na mba̱ng nyin di̱ nkyang ma̱ a̱di̱di̱t mameang.

Yesu Tyia̱ Á̱niet ba̱ Ghai ma̱ng á̱ghyang

(Mat 10:34-36)

49“N bai n ka ntyia̱ long hwa mi̱ swanta hu. A̱wot n chat si̱ long hu ka̱n ta̱fi̱t ku si̱ ya a̱lya̱ra̱p ka! 50N byia̱ ba̱ptisman swuo a̱bung ba̱t ji̱ shya̱ á̱zanson nung a̱ni. A̱wot a̱kpi̱di̱dyi̱k nkpa̱t shya̱ a̱pyia̱ nung, si̱ nang n kpoot huu. 51Nyi fa nyia̱ n bai ma̱ng swat nyinyang hwa mi̱ swanta hu a? Kaai! N bai ma̱ng swat nyinyang hwa bah.

“Da̱ a̱kwonu a̱kya, n bai n tyia̱ á̱niet swanta ba ba̱ ghai, ba̱ bu yet á̱niet lak li á̱ghyang!

52Kyiak neet ma̱nini si̱ nat á̱zanson,

á̱niet a̱fwuon mami kyang bwak nyiung

na ghai ma̱ng á̱ghyang;

á̱niet a̱tat ma̱ mba na chat nung,

á̱niet a̱feang ma̱ mba ba̱ lak nung,

ku á̱niet a̱feang ma̱ mba ba̱ chat nung,

a̱wot á̱niet a̱tat ma̱ mba, ba̱ lak nung.

53A̱tyia̱ na ghai a̱ lak li nggwon a̱sam nggu.

A̱wot nggwon a̱sam ka̱ lak li a̱tyia̱.

Ma a̱nia wa, a̱yang na lak li nggwon a̱nap nggu.

A̱wot nggwon a̱nap ka̱ lak li a̱yang ka.

Ma a̱nia wa, a̱ya̱kwop na lak li a̱nyeang gu,

a̱wot a̱nyeang a̱ lak li a̱ya̱kwop gu.”

A̱lama Ngaan Jen wu

(Mat 16:2-3)

54A̱jawa Yesu si̱ bwuak, a̱ si̱ lyiat ma̱ng á̱kpa á̱niet ka di̱ kidee nyia̱, “Jen nang nyi ni̱ ndi á̱ni̱nian nza, ba̱ tyei li mi̱ fam jenshyung a̱ni, nyi ni̱ nyia̱, ‘Za na va.’ A̱wot a̱nia wa ku na ndi. 55Ma a̱nia wa, jen nyi ni̱ nfwuong wun ku hyap a̱ neet di̱ fam a̱tak a̱ni, nyi ni̱ nyia̱, ‘A̱vwuo ka na fi̱ri̱m a̱fwun.’ A̱wot a̱nia wa ku na ndi.

56“Nyin á̱bubuk á̱niet! Nyi lyen si̱sak nang nyi na nfi̱k a̱lama njen mi̱ swanta ma̱ng kyai tswazwa hu a̱ni. A̱wot nyi lyen si̱sak nang nyi na nfi̱k a̱tsatsak njen ma̱nini ji a̱ni bah.

57“Yihwa mbyia̱ nang nyi si̱ mi̱n fi̱k a̱tsatsak kyang a̱ myim nyi nyia̱ a̱ni bah? 58Jen nang a nshya̱ di̱ naat mi̱ tutu shi̱ri̱ya ma̱ng a̱tyu lak li ang wu a̱ni; si̱ a kwan a̱nggang a jhyi swat nyin hu ma̱ng a̱tyu lak li ang wu neet nang nyi ni̱ shya̱ di̱n vak. Kalak a̱tyu lak li ang wu a̱ du tyia̱ ang mbwak a̱tyu shi̱ri̱ya. A̱tyu shi̱ri̱ya wu meang, a̱ tyia̱ ang mbwak a̱gba̱ndang a̱tyu chok á̱khwo wu. A̱wot a̱ tyia̱ ang mi̱ jaru. 59A̱wot ka̱ ku li a̱nia, a na shot a̱ja bah; si̱ nang a tan a̱mgba̱m a̱byi kurum nang á̱ sak ang ndyo a̱ni mut!”

Currently Selected:

Luka 12: TyapNT

Highlight

Copy