Wok Sotfala stori blong buk ya
Sotfala stori blong buk ya
Buk ya, OL WOK BLONG OL APOSOL, Luk i raetem i go long wan man, nem blong hem Teofilas. Hemia seken buk we Luk i raetem, mo i kam biaen long fas buk blong hem, we nem blong hem GUD NIUS BLONG JISAS KRAES WE LUK I RAETEM. Buk ya Ol Wok blong Ol Aposol we sotfala nem blong hem OL WOK, i tokbaot ol fas wok blong ol aposol blong Jisas, we Tabu Spirit i bin lidim olgeta long wok blong talemaot gud nius, i stat long Jerusalem*, mo long olgeta ples long Judia* mo long Sameria*, gogo i finisim olgeta ples long wol (Ol Wok 1.8). Buk ya i wan stori blong ol fas Kristin we i stat long wan grup blong ol laen* blong Isrel* we oli bilif, mo i gru i kam bigwan, i kavremap olgeta ples long wol.
Long buk ya, Luk i wantem soemaot we olgeta we oli bilif, oli no agensem gavman blong Rom, we i rul long olgeta ples long taem ya. Mo hem i wantem soemaot we ol samting we ol laen blong Isrel ol bilif long hem, oli kamtru long gud nius ya we ol Kristin man oli bilif long hem.
Buk ya, i gat tri haf blong hem, we i soemaot we gud nius i stap goaot moa long ol ples, mo jos i stap gru oltaem. Faswan, i tokbaot jos we i stat long Jerusalem, biaen long taem ya we God i tekem Jisas i go antap long heven. Mo sekenwan, i tokbaot we wok i gru i kam bigwan, i kavremap olgeta ples long tufala rijon ya Judia mo Sameria. Mo las haf i tokbaot we wok i gohed i kavremap olgeta ples long Mediterenian, gogo kasem Rom.
Wan long ol bigfala samting we buk ya i tokbaot, hemia wok blong Tabu Spirit. Taem ol aposol oli stap yet long Jerusalem stret long Dei blong Pentekos*, Tabu Spirit i kam long olgeta, mo i givim paoa long olgeta. Mo biaen long taem ya, Tabu Spirit i gohed blong givhan long wok blong jos, mo i givhan long ol lida ya long wok blong olgeta.
Long buk ya, i gat ol toktok we ol aposol oli talemaot, mo i soemaot we ol tok blong olgeta i gat paoa, i jenisim laef blong ol man we oli bilif, mo i givhan long ol Kristin man blong oli joen wanples.
Ol haf blong buk ya
Jisas i givim las tok mo
promes blong hem long ol man blong hem 1.1-14
Oli jusumaot jenis blong Judas 1.15-26
Oli talemaot gud nius long Jerusalem 2.1—8.3
Oli talemaot gud nius long Judia
mo long Sameria 8.4—12.25
Ol wok blong Pol 13.1—28.31
Fas trip blong Pol 13.1—14.28
Kaonsel i holem miting long Jerusalem 15.1-35
Seken trip blong Pol 15.36—18.22
Nambatri trip blong Pol 18.23—21.16
Pol i stap long kalabus long Jerusalem,
mo long Sisari, mo long Rom 21.17—28.31
Currently Selected:
Wok Sotfala stori blong buk ya: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.