Jenesis 37

Stori blong Josef, wetem ol brata blong hem

1Nao Jekob* i stap yet long kantri ya Kenan,* we papa blong hem i stap long hem bifo, 2mo stori blong ol pikinini blong hem i olsem.

Josef, hem i wan yang boe we i gat seventin yia blong hem, mo oltaem i stap joen wetem ol brata blong hem blong lukaot long ol sipsip mo ol nani blong papa blong olgeta. Ol brata blong hem oli pikinini blong Bilhaha mo Silpa, tu narafala woman blong papa blong olgeta, mo oltaem hem i stap ripotem olgeta long papa blong olgeta.

3Nao from we papa blong olgeta i bonem hem taem hem i olfala, hem i lavem hem moa, i winim we i lavem ol narafala brata ya blong hem. Nao hem i wokem wan longfala kot blong hem we i flas we i flas. 4Mo taem ol brata blong hem oli luk we papa blong olgeta i lavem hem moa, i winim we i lavem olgeta, olgeta oli no moa laekem hem nating, oli agens long hem, nao oli no moa save toktok gud long hem.

5-7Nao wan naet, hem i luk wan drim, mo nekis dei, hem i talemaot drim ya long ol brata blong hem. Hem i talem se, “Ei, olgeta. Yufala i traem harem drim blong mi. Las naet mi drim, mo mi luk we yumi evriwan i stap long wan garen wit, yumi stap fasem ol bandel blong wit ya we i gat kakae blong hem finis. Nao bandel ya we mi mi fasem i girap, i stanap stret, be ol bandel ya we yufala i fasem oli kam stanap raon long hem, nao oli bodaon long hem.”

Be taem olgeta oli harem tok ya, oli agens long hem moa. 8Nao oli talem long hem se, “?Weswe? ?Yu ting se bambae yu yu kam king, yu rulum mifala?” Nao oli stap agens long hem moa yet from ol drim blong hem, mo from ol tok we hem i stap talem.

9Nao biaen hem i luk wan narafala drim bakegen, mo i go talemaot long olgeta se, “Olgeta. Mi mi luk wan narafala drim, mo long drim ya, mi mi luk we san mo mun mo leven sta oli stap bodaon long mi.”

10Mo hem i talemaot drim ya long papa blong olgeta tu, nao papa blong olgeta i tok long hem, i talem se, “?Wanem drim ya? ?Yu ting se mi mo mama blong yu mo ol brata blong yu, bambae mifala i kam bodaon long yu? ?Wanem ya?” 11#Wok 7.9Nao ol brata blong hem oli stap jalus long hem, be oltaem papa blong olgeta i stap tingbaot ol samting ya.

Ol brata blong Josef oli salem hem blong i kam slef

12Nao wan taem, ol brata blong Josef oli go stap long ples ya Sekem, oli stap lukaot long ol sipsip mo ol nani blong papa blong olgeta. 13Nao papa blong olgeta i talem long Josef se, “Josef. Mi mi wantem blong yu go long ples ya we ol brata blong yu oli stap long hem, oli stap lukaot long ol anamol blong mi.”

Mo hem i talem se, “I gud. Mi save go.”

14Nao papa blong olgeta i talem long hem se, “Mi wantem blong yu go kasem sam nius long olgeta se oli stap gud mo ol anamol ya oli stap gud, no olsem wanem. Nao bambae yu kambak, yu kam talemaot long mi.” Nao hem i sanem hem i go.

Long taem ya, Jekob* olgeta oli stap long Hebron, long bigfala levelples ya daon long medel blong ol hil, nao Josef i aot long ples ya, i wokbaot i go. Mo taem hem i gotru long ples ya Sekem, 15hem i stap wokbaot long open ples afsaed long taon, nao wan man i faenem hem, i askem long hem se, “?Yu stap lukaot hu?”

16Mo hem i talem se, “Mi mi stap lukaot ol brata blong mi ya. Olgeta oli stap lukaot long ol sipsip mo ol nani blong papa blong mifala. ?Yu no luk olgeta samples?”

17Nao man ya i talem se, “Si, mi mi luk olgeta, be oli aot long ples ya finis. Mi harem oli talem se bambae oli go stap long ples ya Dotan.” Nao Josef i biaen long olgeta, mo taem hem i gotru long Dotan, hem i faenem olgeta.

18Be taem hem i stap longwe yet long olgeta, olgeta oli luk hem, nao oli stap mekem plan blong kilim hem i ded. 19Oli stap taltalem long olgeta se, “!Yu luk! Man blong drim ya i stap kam. 20I gud yumi go kilim hem i ded. I gat ol wel ya oli stap we oli drae finis. Yumi save sakem bodi blong hem i go long wan long olgeta. Bambae yumi go talem se wan wael anamol i kilim hem, i kakae hem. !Hemia bambae i blokem ol drim ya blong hem!”

21Be taem Ruben* i harem ol tok ya blong olgeta, hem i traem blong sevem Josef. 22Hem i talem se, “No, i nogud yumi kilim hem i ded. Bambae yumi no spolem hem. I moa gud yumi sakem hem i go stap nomo long wan wel long draeples ya.” Hem i talem olsem from we i mekem plan blong hem finis, se bambae i tekemaot hem long han blong olgeta, i tekem hem i gobak long papa blong olgeta. 23-24Nao taem Josef i kam klosap long olgeta, olgeta oli holem hem, oli pulumaot longfala kot ya blong hem, mo oli sakem hem i godaon long wan wel we i drae finis.

25Nao taem oli stap kakae, oli luk wan kampani blong ol laen* blong Ismael, we oli aot long Gilead, oli stap wokbaot i kam blong go long Ijip. Ol kamel blong olgeta oli karem fulap kago blong olgeta, we ol kago ya, ol lif blong tri we i gat gudfala tes, mo ol blad blong tri we i gat gudfala smel. 26Nao Juda* i talem long ol brata blong hem se, “Olgeta. Sipos yumi kilim brata ya blong yumi i ded, nao yumi stap haedem bisnes ya, bambae yumi no save winim wan samting. 27I moa gud yumi salemaot hem i go long han blong olgeta ya. Long fasin ya, bambae yumi no spolem hem. !Hem i brata blong yumi ya! !Yumi evriwan wan papa nomo!” Nao olgeta oli agri, 28#Wok 7.9mo taem ol man Midian ya oli kam klosap, olgeta oli go long wel ya, oli pulumaot Josef bakegen, oli salemaot hem i go long ol man ya, we praes blong hem, ten taosen vatu.*#37.28: Narafala rod blong tanem tok ya long en blong vas 27 go kasem fas haf blong vas 28 i olsem. Ol brata ya blong hem oli agri. 28 Be i gat ol man Midian oli kam klosap, oli go long wel ya, oli pulumaot Josef, oli salemaot hem i go long ol laen blong Ismael, we praes blong hem ten taosen vatu. Nao olgeta ya oli tekem hem i go long Ijip.

29Be taem Ruben i gobak long wel ya bakegen, hem i luk we Josef i no moa stap, nao i harem nogud tumas, we i stap terem* klos blong hem from. 30Hem i gobak long ol narafala brata ya blong hem, i talem se, “!Ei, olgeta! !Josef i no moa stap! ?Bambae mi mi mekem olsem wanem nao?”

31Nao oli tekem wan nani, oli kilim i ded, mo oli draonem kot blong Josef long blad blong hem. 32Nao oli tekem kot ya i gobak long papa blong olgeta, oli talem long hem se, “Papa, mifala i faenem kot ya. Yu traem luk. ?Hem i blong Josef?”

33Nao papa blong olgeta i luksave kot ya, mo i talem se, “!Yes, kot blong hem ya! !Pikinini blong mi ya, wan anamol i kilim hem! !Wan samting i kakae hem finis!” 34Nao hem i harem nogud tumas, i terem ol klos blong hem from, nao i putum ol rabis klos nomo, mo i stap krae longtaem from pikinini ya blong hem. 35Ol narafala pikinini blong hem, wetem olgeta dota blong hem oli kam blong traem mekem hem i harem gud bakegen, be hem i no save harem gud, i stap talem se, “Sipos mi ded, mi go long Hom* blong ol Dedman, be bambae mi stap krae yet from pikinini ya blong mi.” Nao hem i gohed, i stap krae from pikinini ya blong hem.

36Be long taem ya, ol man Midian ya oli tekem Josef i go long Ijip, oli salemaot hem bakegen, i kam slef blong wan haeman blong king blong kantri ya. Haeman ya, nem blong hem Potifa, mo hem i kapten blong ol gad blong haos blong king.

Currently Selected:

Jenesis 37: BBR

Highlight

Copy