Jenesis 40

Josef i talemaot mining blong tu drim blong tu man, taem oli stap long kalabus

1Nao biaen lelebet, i gat tu man blong wok blong king we tufala i mekem king i kros long tufala. Tufala ya, wan i bos long ol man blong lukaot long waen blong king, mo wan i bos long ol man blong mekem bred* blong hem. 2King i kros long tufala ya, 3nao i putum tufala i go long kalabus ya we Potifa i bos long hem. Hemia sem kalabus ya we Josef i stap long hem. 4Nao Potifa i putum tufala long han blong Josef, blong hem i lukaot long tufala, mo tufala i stap longtaem long kalabus ya.

5Wan taem, taem tufala i stap yet long kalabus, long sem naet nomo, tufala i drim, we mining blong tufala drim ya i naranarafala. 6Nao long moning, taem Josef i kam luk tufala, hem i luk we tufala i stap harem nogud. 7Nao hem i askem long tufala se, “Mi mi luk we tingting blong yutufala i stap trabol tumas long wan samting. ?Wanem samting ya?”

8Mo tufala i talem se, “No, long naet ya, mitufala i drim, be long ples ya, i no gat man we i save talemaot mining blong drim blong mitufala.”

Nao hem i talem se, “Paoa blong talemaot mining blong drim, hem i stap long God blong mifala nomo. Yutufala i traem talemaot tufala drim ya long mi.”

9Nao man ya we bifo i bos long ol man blong lukaot long waen blong king, hem i talem se, “Long drim blong mi, mi mi luk wan rop blong grep.* 10Rop ya i gat tri han blong hem, nao taem ol han ya oli gat lif, wantaem nomo rop ya i karem flaoa, nao i gat ol frut blong hem oli raep. 11Mi mi stap holem kap ya we king i stap dring long hem, nao mi tekem ol frut blong rop ya, mi skwisimaot wota blong olgeta i go long kap ya, nao mi givim kap ya long hem.”

12Nao Josef i talem se, “Mining blong drim ya i olsem. Tri han blong rop ya, hemia tri dei ya. 13Bambae i no kasem tri dei yet, king bambae i tekemaot yu long kalabus ya, i lukluk long bisnes blong yu bakegen, nao bambae i putumap yu bakegen long wok ya we yu stap holem bifo. Bambae yu save givim kap blong hem long hem bakegen, olsem we yu stap mekem bifo, long taem ya we yu bos long ol man blong lukaot long waen blong hem. 14!Be sipos laef blong yu bambae i kam gud olsem, plis yu no fogetem mi! Plis yu kaen long mi bakegen, yu tokbaot mi long fes blong king, blong givhan long mi blong mi aot long kalabus ya. 15!Yu luk! Mi mi wan Hibru,* be taem ol man oli tekemaot mi long ples blong mifala, oli karemaot mi long fasin blong stil nomo. Mo long kantri ya tu, mi no mekem wan samting we i stret blong mi kalabus from.”

16Nao taem narafala man ya i luk we mining blong drim we Josef i talemaot i leftemap tingting blong man ya, hem i talem se, “Mi tu mi luk wan drim. Mi luk se mi stap wokbaot, mi stap karem tri basket bred long hed blong mi. 17Long basket ya antap, i gat ol naranarafala kek i stap, blong king i kakae. Be i gat ol pijin oli stap kakae olgeta.”

18Nao Josef i talem se, “Mining blong drim ya i olsem. Tri basket ya, hemia tri dei ya. 19Bambae i no kasem tri dei yet, king bambae i tekemaot yu long kalabus ya, i lukluk long bisnes blong yu bakegen, nao bambae i katemaot hed blong yu, mo i hangem bodi blong yu long wan pos. Mo ol pijin bambae oli kam kakae bodi blong yu.”

20Nao long namba tri dei blong hem, king ya i mekem wan lafet blong makem taem we hem i bon. Hem i mekem wan bigfala kakae, mo i singaot olgeta haeman blong hem oli kam. Mo long fes blong ol narafala haeman ya blong hem, hem i lukluk long bisnes blong tufala man ya blong hem bakegen, we tufala i stap long kalabus. 21Man ya we fastaem i bos long ol man blong lukaot long waen blong hem, hem i putumap hem bakegen long wok ya. 22Be man ya we fastaem i bos long ol man blong mekem bred blong hem, hem i sanem ol man blong hem blong oli go kilim hem i ded, nao oli hangem bodi blong hem long wan pos. Olgeta samting ya oli kamtru stret olsem we Josef i talem fastaem. 23Be man ya we i bos long ol man blong lukaot long waen blong king, hem i no moa tingbaot Josef bakegen, hem i fogetem hem olgeta.

Currently Selected:

Jenesis 40: BBR

Highlight

Copy